Mikel Egigurenek eta Txabi Inzak irabazi dute Urriko Azken Astelehena Masterra
Giro itzela izan zuten atzo Gernika-Lumoko Jai Alai frontoian. Egigurenek eta Inzak Unai Lekerika gernikarraren eta Aritz Erkiaga ispastertarraren kontra lehiatu zuten finala. Emozio biziko finala izan zen, parekatua eta frontoia bete zuten zaleak gozarazi zituzten.
Hain zuzen, berdinketa hausteko hirugarren set-a jokatu behar izan zuten. Lehenengo set-a 15-9 irabazi zuten Lekek eta Erkiagak eta bigarrenean, 14-15 nagusitu ziren Egiguren eta Inza. Azken horiek 2-5 irabazi zuten berdinketa apurtzeko set-a.
Zapatuko finalerdian lesionatutako Gotzon Enbil zumaiarraren ordez lehiatu zuen atzoko finala Inza hendaiarrak. Hain zuzen, zapatuko azken tantoak lesionatuta jokatu zituen Enbilek.
2017ko Jai Alai World Tourreko fase erregularreko azken hitzordua izan da Urriko Azken Astelehena Masterra, eta dagoeneko argitu da azken fasera sailkatu diren lau bikoteak zeintzuk diren. Erkiaga-Ekhi, Beaskoetxea-Irastorza, Olharan-Lopez eta Egiguren-Inza bikoteek jokatuko dute azken fasea.
Mandiolaren debuta. Masterreko final handiaren aurretik, Jon Mandiola markina-xemeindarraren eta Aimar Aldazabal berriatuarraren eta Jokin Arbe eta Jonathan Etxebarrieta Etxeba markina-xemeindarren arteko partidua egon zen. Mandiola atzelariaren profesionaletako lehenengo partidua izan zen atzokoa. Daniako Jai Alai frontoiak kontratua eskaini dio, eta AEBtan jokatzeko bisatuaren zain dago.
Finalaurrekoak. Zapatu arratsaldean jokatu zituzten masterreko bi finalerdiak. Lekerikak eta Erkiagak Xabi Barandika gernikarrari eta Ekhi Martinez gasteiztarrari 2-0 irabazita (15-12 eta 15-14) lortu zuten finalerako txartela. Beste finalerdian Egiguren eta Enbil ere 2-0 (15-10 eta 15-13) nagusitu ziren Alex Hormaetxea bermeotarraren eta Txabi Inza hendaiarraren kontra.
Finalaurrekoak. Zapatu arratsaldean jokatu zituzten masterreko bi finalerdiak. Lekerikak eta Erkiagak Xabi Barandika gernikarrari eta Ekhi Martinez gasteiztarrari 2-0 irabazita (15-12 eta 15-14) lortu zuten finalerako txartela. Beste finalerdian Egiguren eta Enbil ere 2-0 (15-10 eta 15-13) nagusitu ziren Alex Hormaetxea bermeotarraren eta Txabi Inza hendaiarraren kontra. 
