57-81 galdu du Lointekek EuroCupeko lehenengo jardunaldian
Gironak talde indartsua dela erakutsi zuen beste behin. Talde katalanak Europako txapelketan esperientzia du, eta atzo iluntzeko partiduan igarri zen hori.
Gernika-Lumoko taldeak maila ona erakutsi zuen, baina jokalari berri asko izanda, oraindik ere taldea erabat osatzen ari dela ikusi zen kantxan. Taldera etorri berri direnen artean, Marina Basek, esate baterako, partidu ona egin zuen.
Zapore gazi-gozoa utzi zuen atzoko Lointeken EuroCupeko debutak. Izan ere, 24 puntuko aldeagaz partidua galdu arren, giro itzela sortu zuten harmailetan bildutako 1.500 bat zaleek. Gernika-Lumotik ere jende asko hurbildu zen Casillara, klub gernikarraren historiako hitzordu garrantzitsuenetakoa bertatik bertara bizitzera.
Ohorezko aurreskua dantzatu ostean hasi zen lehia. Emakumezkoen Ligako bi talde onenetarikoak zeuden aurrez aurre, eta lehia bizia espero zuten zaleek. Partidua hasi, eta Gironak berehala jaurti zien gernikarrei lehenengo abisua; Nuria Martinezek bi hiruko sartu zituen.
Bi minututan 0-8ko markagailuagaz Mario Lopez Lointek Gernika Bizkaiaren entrenatzaileak hutsartea eskatu zuen. Gero, Maria Pinak lortu zuen talde gernikarraren EuroCupeko lehenengo saskiratzea. Ondoren, Marina Basen txanda izan zen. Taldera etorri berria gogotsu aritu zen, bai eta Aishah Sutherland ere.
Bost puntuko aldeagaz amaitu zuten lehen laurdena (13-18). Hurrengo minutuetan Gironak erraz lortu zituen saskiratzeak, eta Lointek, ostera, motelago zebilen kantxan, jokaldiak osatzeko zailtasunez. Horren erakusle da, esate baterako, 18-29ko markagailua. Lopezek hutsartea eskatu zuen berriro, eta haren aginduen ostean, talde gernikarra lehiakorrago aritu zen. 31-39ko markagailuagaz amaitu zuten lehen zatia.
Atsedenaldiaren osteko lehenengo bi minutuetan partidua erabat korapilatu zen talde gernikarrarentzat. Girona Lointek estutzen zebilen, eta ondorioz, 0-7ko partziala lortu zuen. Gernika-Lumoko taldeko neskei ez zieten jokaldiak gauzatzen uzten. 31-46ko markagailua iraultzea ez zen erreza; Lointek eginahalean ibili zen, nahi bai baina ezin, eta bitartean, Gironak ez zuen huts egiten.
Lehia amaitzeko hamahiru minuturen faltan, 33-57ko markagailuagaz zeuden. Talde katalanak jaurtiketetan asmatu zuen, gernikarrak, ostera, ez zuen zorterik izan.
37-62ko markagailuagaz heldu ziren azken txanpara. Neurketa erabakita zegoen arren, Lointekeko jokalariek ez zuten amore eman, eta azken momentura arte ahalik eta itxura onena ematen ahalegindu ziren. Egun berezia zen, eta Lopezek taldeko lau bizkaitarrei (Lazaro, Vergara, Alberdi eta Ariztimuño) kantxan elkarrekin jokatzeko aukera eman zien.
Datorren astean bigarren jardunaldia
Atzoko porrota ahaztu eta ligari begira jartzeko momentua dute Lointekeko jokalariek (4. jardunaldia jokatuko dute asteburuan). Hain zuzen, zapatuan Leongo Embutidos Pajariel Bembibre PDM taldearen kantxan dute hitzordua (18:15).
Gero, datorren astean talde gernikarrak etxetik kanpo lehiatuko du EuroCup txapelketaren bigarren jardunaldia. Urriaren 19an (eguena) Hungariako VBW CEKK Cegled taldearen kontra jokatuko du (18:30).
Hirugarren jardunaldia Frantziako Basket Landesen kantxan jokatuko du, eta laugarren jardunaldia Gironan. Azken bi partiduak Bilbon jokatuko ditu Cegled eta Landesen kontra.
Taldekako fase honetatik multzo bakoitzeko lehen bi sailkatuak pasatuko dira hurrengo fasera.
Marina Bas Lointekeko jokalaria.
Argazkia: Gernika KESB.
Aishah Sutherland Lointekeko jokalaria.
Argazkia: Gernika KESB.
