Irailaren 10an egingo dituzte Gautegiz-Arteagako III. mendi martxa eta lasterketa
Mendi lasterketa Urdaibai Koparako bosgarren proba puntuagarria da.
Domeka da mendi martxetan zein lasterketan aurrez izena emateko azken eguna.
Aurretiaz izena emateko bi modu daude: udalerriko Egala tabernan edo Internet bidez urdaibaikopa.eus webgunean (arteagakomendimartxa.blogspot.com.es probaren webgunean ere lotura dago).
Hala, gehienezko parte hartzaile kopurua bete ezean, egunean bertan ere izena eman ahalko da. Lasterketan eta martxa laburrean 200 pertsonako gehienezko kopurua zehaztu dute, eta martxa luzean, berriz, 400 pertsonakoa.
Prezioak. Ibilaldi luzean eta lasterketan aurrez izena emanez gero, 10 euro ordaindu behar dira (14 euro egunean bertan), eta martxa laburrerako, ostera, 14 urtetik beherakoek 6 euro ordaindu behar dituzte, eta nagusiek 8 euro (egunean bertan 6 euro umeek eta 10 euro nagusiek).
Aurrez izena ematen dutenek martxaren kamiseta ziurtatuta izango dute, hala ere, egunean bertan izena ematen dutenei oparia emango diete.
17 kilometroko lasterketa izango da, eta korrikalariak 10:30ean irtengo dira Gaztelu-Zar elkartearen aurretik (09:30etik 10:15era jaso ahalko dituzte dortsalak).
Mendi martxa luzeko ibilbidea 15 kilometrokoa da, eta 09:30ean jarri dute irteera-ordua. Laburra, berriz, 6 kilometrokoa da, eta bertako parte hartzaileak 10:45ean aterako dira Gaztelu-Zar elkartearen paretik.
