Aishah Sutherland hegaleko pibota fitxatu berri du Lointek Gernika Bizkaiak
Gernika-Lumoko klubak gaur jakitera eman du fitxaketa, eta ordezkariek zehaztu dutenez, eguenean (abuztuak 31) hasiko dute denboraldi-aurrea.
Lidergorako ahalmena duen jokalaria da, eta erreboteetarako zein saskiratzeetarako duen abilezia eta Euro Cup txapelketan duen esperientzia taldearen jokoan igarriko direla uste dute Lointek Gernika Bizkaiaren arduradunek.
Hain zuzen ere, Mario Lopez entrenatzaileak adierazi duenez, aspalditik aritu dira Sutherland fitxatu guran: “Hiru denboraldi daramatzagu bere atzetik. Edozein egoeratara moldatzeko kapaz da, eta defentsarako dohainak dauzka; posizio desberdinetan defendatzeko gai da. Jokalari indartsua da, eta erasoan azkarra. Haren ekarpena erabakigarria izan daitekeela uste dut”.
Unibertsitatean zela Kansasen (AEB) hasi zuen saskibaloi ibilbidea eta 2012an heldu zen Europara. Italiako Orvieto taldean jokatu zuen bi denboralditan, eta handik Poloniako ligara saltoa eman zuen. Han Polkowice eta KS JAS FBG Sosnowiec taldeetan aritu zen. Iazko denboraldian Letoniako Ligako TTT Riga taldean jokatu zuen (liga irabazi zuten), Euro Cup txapelketan debutatuz. Batez beste 13,5 puntu eta 7,1 errebote lortu zituen Europako txapelketa horretan.
Bederatzi jokalari prest
Aste honetan denboraldi-aurreari ekiteko bederatzi jokalari prest ditu talde gernikarrak.
Uztailaren 21ean Talia Caldwell jokalariaren fitxaketaren berri eman zuen klubak, baina asteon jakitera eman dutenez, familia arazo batzuk tarteko azaroaren erdialdera arte ezin izango da taldeagaz lanean hasi. Ondorioz, haren lekua beteko duen jokalariren bat fitxatzea espero dute.
Caldwell Los Angelesekoa da, eta California Golden Bears-en hasi zen saskibaloian jokatzen. Poloniako Energa Torun taldean hasi zuen Europako ibilbidea, eta handik Greziako AS Koon Ippokratis taldera joan zen. 2015-2016 denboraldian Conquero taldean jokatu zuen, Erregina Kopako titulua lortuz. Iaz Israelgo Ramat Hasharon taldean aritu zen, baina lesio larri bat izan zuen.
Gaur gaurkoz hauek dira Lointek Gernika Bizkaiaren jokalariak:
- Joko antolatzaile edo baseak: Anna Gomez eta Itziar Ariztimuño.
- Eskoltak: Juana Molina eta Ameryst Alston.
- Hegaleko jokalariak: Naiara Diez eta Maria Pina.
- Hegaleko pibotak: Amaya Gastgaminza eta Aishah Sutherland.
- Pibotak: Yaiza Lazaro.
