Txomin Aranak irabazi du Arratzuko Enduroa

Aintzina Monasterio

2017/05/29

Borja Nietogaz lehia eduki zuen ereñarrak senior txapelketa kategorian, baina azkenean hamazortzi segundu eta 56 ehuneneko aldeagaz nagusitu zitzaion ereñarra. 26:46.63 denbora markatu zuen Aranak.

Halaber, Urko Garmendia hirugarren sailkatuaren eta Josu Baraibar laugarrenaren artean lehia estu egon zen; segundo bat eta 26 ehuneneko aldeagaz amaitu zuten proba. “Hirugarren eta bosgarren sailkatuen artean lehia polita egon zen, hirurak hamar segundoren barruan daude. Jendeak gozatu zuen”, azaldu dute Gernika Off Road-eko kideek. Iker Mintegia munitibartarrak ere lasterketa polita burutu zuela zehaztu dute, lesiotik bueltan “erritmo” apur bat falta izan zitzaion arren. Bestalde, 23 urtez azpikoen junior mailan, Jokin Aldamizetxebarria izan zen azkarrena, 22:18.04 denboragaz, eta haren atzetik amaitu zuen Markel Barainka bedarutarrak. Aldamizetxebarriarengandik zortzi segundo eta 82 ehunenera amaitu zuen lasterketa Barainkak. Senior kopan, berriz, Eneko Kaminok egin zuen denborarik onena: 21:38.16. Harengandik bederatzi segundo eta 42 ehunenera sailkatu zen Jon Ander Rodriguez. Iñigo Ugalde gernikarra seigarren sailkatu zen, 22:29.37 denboragaz. Beteranoen lehiari dagokionez, Alberto Macias izan zen azkarrena (21:36.42), eta harengandik zazpi segundo eta 23 ehunenera sailkatu zen Pedro Luis Gorospe. Julio Otazua munitibartarrak bosgarren amaitu zuen proba. Kategoria guztiak kontuan hartuta, 62 pilotuk parte hartu zuten atzoko lasterketan. Parte hartzaile gehienak senior mailetan lehiatu ziren: 17 pilotu txapelketakoan, eta 19 kopakoan. Antolatzaileek esan dutenez, lasterketan izandako bero sargoriak eragina izan zuen. Baina, orokorrean dena ondo atera zelako pozik daude: “Pilotuak ere pozik geratu ziren. Ibilbideagaz ere gustura; erraza izan zen eta eguraldiak ere ez zuen zaildu. Publiko aldetik ere jende nahiko batu zen; herriko jaiak izanda, giro polita egon zen”. Lasteketan ez zuten arazorik izan, baina beteranoen lasterketa hasi eta berehala Javier Ugaldek bularrean kolpe bat hartu zuen eta lasterketa utzi behar izan zuen. Ospitalera eroan zuten mediku azterketa egitera, baina kolpea baino ez zen izan.