Sokarri izan da onena Bermeon

Aintzina Monasterio

2017/02/13

Zapatu arratsaldean Bermeon jokatu zuten Euskadiko Goma Gaineko 8X8 Sokatira Txapelketaren 600 kiloko lehen jardunaldia. Beti Gazte eta Ibarra sailkatu ziren bigarren eta hirugarren, hurrenez hurren. Murueta A taldeak, berriz, Ñapurrak talde lapurtarragaz berdindu zuen, eta Murueta B azken sailkatu zen. Murueta taldeko sokatiralariek azaldu dutenez, pisu txikiagoetan konpetentzia gehiago dagoela igarri dute: “Maila altua dago, eta guk argi dugu nahiz eta iaz 600 kilokoan ondo ibili, zenbat eta pisu baxuagoan aukera gutxiago ditugula”.

Argazkia. Txebi Arriaga.

Bigarren jardunaldia hilaren 25ean Artaxoan dute, eta orduan argituko da zein taldek lortzen duten martxoaren 4ko finalerako txartela. Muruetakoek finalera sailkatzeko ahalegina egingo dutela nabarmendu dute. “Ezustekorik ezean A taldeak finala jokatuko du. Seguruenik zapatuko lehenengo seirak sailkatuko gara”. Talde denak ere finalera “duten guztia” ematera joango direla gogoratu dute, eta eurak ere talderik onena osatzen saiatuko direla. 640 kiloko finala Bestalde, atzo Gaztedik, Sokarrik eta Ibarrak lehiatu zuten 640 kiloko finala, Laukizen, eta Ibarra nagusitu zen. Sokarri bigarren sailkatu zen, eta Gaztedi hirugarren. Orain dela bi aste bertan behera utzi zuten finala, partaide batzuen arau haustearen ondorioz, eta diziplina batzordearen epaileak Murueta, Beti Gazte eta Zuraide zigortzea erabaki zuen. Hiru taldeei errekurtsoren bat jartzeko bost eguneko epea eman diete, eta Muruetakoak jakitera eman dute errekurtsoa aurkezteko asmoa dutela: “Finala zelan joan zen ikusita, espero genuen erabaki hori hartzea. Eguen arratsaldean esan ziguten erabakia, eta uste dugu gauzak ez direla ondo egin; hobeto egin ahal zela deritzogu. Errekurtsoa jartzeko aukera badugulako, baina, finala jokatu dute. Errekurtsoan gure burua defendatu eta gure arrazoiak azalduko ditugu, baina, ez dakigu erantzuna noiz helduko den”. Bermeoko sailkapena:

Sokarri 9 puntu
Beti Gazte 8 puntu
Ibarra 7 puntu
Gaztedi 6 puntu
Ñapurrak 4,5 puntu
Murueta A 4,5 puntu
Abadiño 3 puntu
Berriozar 2 puntu
Murueta B 1 puntu

ARGAZKI GALERIA (Argazkiak: Txebi Arriaga)