Lointek Gernikak Erregina Kopako finalaurdena du gaur, Al-Qazeresen aurka
21:00etan jokatuko dute gernikarrek Erregina Kopako finalaurdeneko partidua. Al-Qazeres Extremadura taldekoak izango dituzte aurrez aurre. Gaurko norgehiagoka garrantzitsua da gernikarrentzat; izan ere, Al-Qazeresen aurka Ligan jokatutako bi partidak galdu dituzte Mario Lopezenak. Hala ere, azken lau partidak irabazita, Gernikako taldea Erregina Kopa lehiatzera «momenturik onenean» helduko dela uste du Mario Lopez entrenatzaileak: «Autoestimua altu daukagu, baina bi aldiz irabazi digun taldearen aurka jokatuko dugu lehenengo finalaurdena. Errespetu handia ematen digun partidua da, baina oraingoan garaipena lortzeko konfiantza badaukagu».
Teledeporten eta TV Gironan emango dute gaur gaueko partidua. Irabaziz gero, Lointek Gernika Bizkaiako neskek Perfumerias Avenida taldea izango lukete aurkari finalerdian. Partidu hori zapatuan jokatuko lukete, 21:15ean. Salamancako taldea gorengo postuan da Ligako sailkapenean.
Finalerdietako bi partidetako irabazleek jokatuko dute Erregina Kopako finala. Domekan izango da hori, 20:30ean.
Momentu historikoa. Gironan (Katalunia) jokatuko da aurten Erregina Kopa. Perfumerias Avenida Salamanca, Spar Citylift Girona, Lointek Gernika Bizkaia, Lacturale Araski, Al-Qazeres Extremadura eta Star Center-Uni Ferrol saskibaloi taldeak bilduko ditu aurten. Gernikarrak lehiatzeko gogotsu kantxaratuko direla esan du Mario Lopez entrenatzaileak: «Barikuan partida ona jokatzea da asmoa, emozioak ondo kudeatzeko gai izan, eta garaipena lortu nahi dugu».
Joko ona erakustea, eta gozatzea dute asmo gernikarrek. Izan ere, Lopezek esan bezala, momentu historikoa bizi dute Lointek Gernika Bizkaiako neskek, eta esperientzia hori klubak eta herri osoak gozatzeko modukoa izatea gura du. «Hazten jarraitzeko beste pauso bat da Erregina Kopa lehiatzea, eta esperientzia hau denek gozatzeko modukoa da; bai jokalariek, teknikoek, zuzendaritza taldekoek, eta, zelan ez, zaleek ere», esan du.
Udal arduradunak taldeagaz, Gironara joan aurretik
Erlazionatutako edukiaMario Lopez: «Erregina Kopara unerik onenean helduko da taldea»
