Gernikako udal gobernuak «elkarrizketari atea itxi» diola salatu du EH Bilduk
EH Bilduk gutun bat bidali dio udal gobernuari 2017ko udal aurrekontuen lanketari buruz hitz egiteko bilera bat eskatuz, eta, gaur gaurkoz, erantzunik jaso ez duela salatu du koalizioakGernika-Lumoko udal gobernuak «elkarrizketari ateak itxi» izana s...
EH Bilduk gutun bat bidali dio udal gobernuari 2017ko udal aurrekontuen lanketari buruz hitz egiteko bilera bat eskatuz, eta, gaur gaurkoz, erantzunik jaso ez duela salatu du koalizioak
Gernika-Lumoko udal gobernuak «elkarrizketari ateak itxi» izana salatu du EH Bilduk, eta, era berean, gobernuaren eta oposizioaren arteko harremanak normalizatuak izateari ezetz esan izana ere kritikatu du.Koalizioak azaldu duenez, urtarrilaren 9an gutun bana bidali zien EAJri zein Jose Maria Gorroño alkatearen taldeari, 2017ko udal aurrekontuen lanketari buruz hitz egiteko bilera bat egitea eskatuz. Bi aste beranduago, baina, erantzunik jaso ez dutela kritikatu dute, eta, erantzun eza «errespetu falta» legez hartu dute.
Gutunean, aurrekontuaren proiektua lantzeko eta onartzeko prozedurak «hobetu daitezkeela eta hobetu behar direla» azaltzen zuen EH Bilduk; hala, beraien ustez, hobekuntza horra ailegatzeko beharrezkoak ziren gako nagusiak zeintzuk izan zitezkeen zehazten zuten.
Koalizioaren ustez, batetik, gardentasuna landu beharra dago udal aurrekontuetan, «diru kontuak argi eta modu ulergarrian herriari azalduz»; bestetik, herritarren eta elkarteen esku hartzea bultzatzea ezinbestekotzat ikusten du. «Dena den, gardentasun eta parte hartze horri ateak zabaltzea baino, udal gobernuak nahiago du bere bulegoetan hasi eta amaitzen den prozesuen bitartez, Gernika-Lumon gastatuko den diruaren inguruan erabakiak hartzea», azpimarratu du EH Bilduk.
Gutunagaz batera, gainera, bere ustez landu beharrekoen zerrenda igorri die EH Bilduk, «baina argi utziz helburua elkarrizketarako eta lasaitasunerako konfiantzazko gune bat sortzea dela».
Gogoeta bateratua
Aipatu gutunaren bidez, «lasai» hitz egitea proposatu diote udal gobernuari; «osoko bilkuraren eta kameren tentsioetatik aparte, mahai inguruan». Aurrekontuen prozeduraren inguruko gogoeta elkarregaz egin nahi du koalizioak, eta, «posible balitz, kontsensuzko prozedura bat adostu».
Izan ere, elkarrizketa eta partaidetza lehenesten jarraitzen duela dio EH Bilduk; hala, gobernuagaz harreman normalizatuak izateko konpromisoa berretsi du. Halaber, Gernikagaz zerikusia duen edozertaz berba egitekotan eta adostasuna bilatzekotan, «edozein momentutan eta edonora» joateko borondatea agertu du.
Udal gobernua, baina, «kontrako norabidean» doala kritikatu du, «herriko esparru ezberdinetatik herritarrak parte hartze gehiago eskatzen ari diren bitartean». Hala eta guztiz ere, gobernu taldean ere, «jarrera ezberdinak» ikusi dituztela aipatu dute; «EAJk gugaz esertzeko prestutasuna agertzen duen bitartean, Gorroñoren taldeak ez du nahi informaziorik ere partekatu nahi gugaz».
Horrenbestez, «aurrekontu parte hartzaileak eraikitzeko lanean jarraitzeko» prestutasuna erakutsi du koalizioak, eta biltzeko proposamenak indarrean jarraitzen duela gaineratu du; EH Bildurentzat «zenbakiek garrantzia duten arren, gehiago daukate horiek lantzeko moduak».
