"Dispertsioagaz amaitu arte, Etxera Trail urtero egitea da gure asmoa"
Dispertsioaren kontrako mendi martxa eta lasterketa egingo dituzte domekan, Gernika-Lumon. Joanes Goitisolo eta Ugaitz Mandaluniz probaren lantaldeko kideak dira, eta zehaztu dutenez, kirol proba hutsa egitea baino, jai giroa sortzea da helburua.
Kirola eta aldarrikapena lotuta, Etxera Trail mendi martxa eta lasterketa prestatu dituzue. Zein da helburua?
Helburua euskal presoak Euskal Herrira etorri behar direla aldarrikatuz herrian giro alaia sortzea da. Ideia ez da urte batean egin eta bertan bukatzea. Dispertsioaren kontrako aldarrikapen bat da, familiek ez ditzaten horrenbeste kilometro egin haiek ikusteko, horrek ekartzen duen arriskuagaz eta gastuagaz. Eta hori lortu arte urtero egiteko esperantza dugu. Zenbat eta jende gehiago egon prest laguntzeko hobeto.
Kirola eta jendartearen aldarrikapena uztartzearen ideia zelan sortu zitzaizuen?
Lagun talde bat berbetan geundela bururatu zitzaigun, eta martxa zelan aurrera atera pentsatzeko barikuetan batzen ginen. Apurka-apurka jende gehiago batzen joan da. Azaroan serioago hartzen hasi ginen: udaletxeagaz berba egin, lanak banatu, bakoitza gauza konkretuekin arduratu… Errege egunean egitekoak ginen, baina biharamunean euskararen aldeko Abidxadan martxa zegoenez, beranduago egitea erabaki genuen. Beti ere, neguan egitea da asmoa, eta jendearentzat urte hasierako ohitura moduan bihurtzea gura dugu. Jendeak jakin dezan urte hasieran beti egingo dela.
Lehenengoz antolatu duzue. Ze aurreikuspen duzue?
Hasierako aurreikuspena guztira 150 bat pertsona batzea zen, baina, batez ere eguraldia laguntzen badugu, uste dugu kopuru hori gaindituko dugula. Dagoeneko 100 pertsona inguruk eman dute izena. 275 pertsonentzat prestatuko ditugu opariak. Izena eman duten lehen 275 pertsonek buff bat jasoko dute. Lehenengo urtea denez, bakarrik Juan Calzada kaleko ostalariekin batu gara. Ez genekien zelan hasi; horregatik, astiro hasi gara, eta hurrengo urtean ostalari gehiagorekin berba egin behar badugu, egingo dugu.
Esaterako, dagoeneko izena eman dutenen artean nafarrak daude.
Bai, izan ere ez da eskualdeko kontua bakarrik; gure asmoa Euskal Herri osora zabaltzea da. Gure helburua Euskal Herriko puntu desberdinetako ahalik eta jende gehien batzea da. Esaterako, lehen egunetan izena eman zutenen artean jende gehiago zegoen hemendik kanpokoa bertokoak baino. Esperantza dugu urteak aurrera joan ahala gero eta jende gehiago animatzea.
Ahalik eta oihartzun handiena lortzeko bideoa ere prestatu duzue.
Bai, ahalik eta jende gehienengana heltzeko, batik bat, Facebook eta WhatsApp bidez kartela eta bideoa zabaltzen ari gara. Dena ondo ateratzea espero dugu, eta jendeak ikustea lan bat badagoela honen atzean. Jendea animatzea, eta denek probagaz zein jai giroagaz gozatzea espero dugu, egunaz gozatzea. Dena ondo antolatuta dagoela, eta pozik irten direla esateak poztuko gintuzke. Hurrengo urtean ere parte hartzeko gogoz amaitzea gura dugu.
Eguraldi onagaz, seguruenik, ume eta guraso gehiago animatuko dira. Hala ere, izena eman barik dauden askok esan digute kalean eguraldi txarra egin arren parte hartuko dutela.
Jai giroa sortzea aipatu dituzue, eta horretarako zenbait ostalariren laguntza duzue.
Ez da kirol proba hutsa; jai giroa sortzeko Juan Calzada kaleko ostalariekin batu ginen. Berba egin dugun guztiengandik baiezkoa jaso dugu, eta hori eskertzekoa da .Bestalde, Pasealekua jantziko dugu; ez dugu gura leku hotz bat izatea, eta horregatik, pankartak egin, eta ingurua apainduko dugu.
Pintxoak prestatuko dituzte ostalariek. Nola antolatu duzue hori?
Partaideei esku orri bana banatuko zaie eta bertan izango dute zehaztuta zein tabernatara joan behar duten. Horregaz batera, proba zergatik antolatu den azalduko zaie esku orrian, eta koordinatzailearen telefono zenbakia ere jarriko dugu, zeozer gertatuz gero hari deitzeko.
Martxen zein lasterketaren parte hartzaileei tiketak banatuko zaizkie eta horiekin Arrano, Ospa, Arima eta Aterpe tabernetan pintxo bina doan izango dituzte. Lagun Etxea domeketan itxita dagoenez, jatekoagaz lagunduko digute.
Zozketak ere egongo dira.
Parte hartzaile guztien artean hamar bat zozketa egingo ditugu. Asmoa da korrika edo martxan daudenen artean zozkatzea, eta heltzen direnerako saridunak izendatzea. Gauza arintzeko erabaki dugu horrela egitea. Izan ere, parte hartzaileak ordu desberdinetan heldu eta tabernetara joango dira. Bestalde, helmugara heltzean oinetakoak garbitzeko aukera eskainiko dugu Pasealekuan, baita dutxa hartzeko aukera ere Santanapen, 14:00ak arte.
PROBAREN DATUAK:
- IZEN EMATEA: www. herrikrosa-eus. Eguenera arte (00:00). Federatuek 6 euro, federatuta ez daudenek 8 euro (10 urtetik beherakoentzat doan). Domekan. 08:30etatik aurrera Pasealekuan. 10 euro denentzat.
- IRTEERA ORDUTEGIAK: Martxa luzea. 09:30ean Pasealekuan. Martxa laburra. 10:00etan Pasealekuan. Lasterketa. 10:30ean Pasealekuan.
- IBILBIDEAK: Martxa luzea eta lasterketa (15km). Pasealekua-Europako Herrialdeen Parkea-Santa Luzia (neutralizatua)-Erromatar bidea-Errigoiti-Madalena auzoa-Mallaga tontorra-Foruko Baldatika auzoa-Kosnoaga(Aixerrota)-Lumo-Allende-Europako Herrialdeen Parkea-Pasealekua. Martxa laburra (7km). Pasealekua-Forua (Zimela jatetxea)-Aixerrota-Lumo-Europako Herrialdeen Parkea-Pasealekua.
- ANOA POSTUAK 6. kilometroan. Errigoitiko Madalena auzoan. 11-12. kilometroan. Kosnoagan (likidoa bakarrik). sariak eta zozketak
- SARIAK: Lehenengoek: Marmolezko eta egurrezko garaikurrak. Bigarrenek: Produktu desberdinekin osatutako otzarak. Hirugarrenek: Gazta eta sagardoa. Zozketak: Ipar tabernan bi lagunentzako afariak (5), Basati Bike dendan deskontuak (4), Txopi Esku Terapiak-en masajeak (2).
