Bihar goizaldean hasiko dute Marijesiek bederatziurrena

Izaro Mendieta

2016/12/15

Gabon aurreko bederatziurrena egiteko prest dira, beste urte batez, Gernikako Marijesiak. Bihar goizaldean egingo dute lehen erronda, eta bederatzi goizaldez, herriko kaleak beraien doinuz alaitzen ariko dira. Betiko legez, bakarlariaren eta taldearen arteko elkarrizketa ekarriko dute Marijesiek. Iazko modura, lau bakarlari izango dira aurten ere: Iñaki Gonzalez Abadia, Denis Azkarate Eizagirre, Fernando Astoreka Aranburu eta Jose Antonio Uriarte Itxaso. Egun bakoitzean bakarlari batek parte hartuko du; hala, txandaka abestuko dute. Bihar goizaldean hasiko dute Marijesiek Gabon aurreko bederatziurrena. Denis Azkarate bakarlari dela, Errenteria auzorantz abiatuko da taldea. Ibilbidea aldatzen joango diren arren, egunero izango dute irteera puntu eta ordutegi bera: Andra Mari elizan batuko dira 04:00etan. Hala, bertatik, Errenteri auzoa bisitatuko dute bihar, 19an eta 23an. Abenduaren 17an eta 21ean, aldiz, Tiloetara joango dira, eta 18an, 20an, 22an eta 24an, azkenik, Lurgorrira. Gernika erdigunean bizi direnek, bestalde, egunero entzun ahal izango dituzte beraien etxeetatik Marijesiak. Bederatzi egunetan ahotsa nekatu ostean, azken egunean –abenduaren 24an, goizean– diru bilketa egingo dute. Aurten, Bilboko Miribilla auzoan lan egiten duen Bakuva elkarteari emango diote batutako dirua, eta Skooter Bilbainada elkartea izango da hori posible egingo duen bitartekaria. Bakuva elkartearen helburua bazterketa pairatzeko arriskua duten edota beharrizan larriak dituzten umeak gizarteratzea da; horretarako, askotariko ekintzak antolatuz. 2016ko errondak Abenduak 16. Bakarlaria: Denis Azkarate. Ibilbidea: Errenteria. Abenduak 17. Bakarlaria:?Fernando Astoreka. Ibilbidea: Tiloak. Abenduak 18. Bakarlaria: Denis Azkarate. Ibilbidea: Lurgorri-Santa Luzia. Abenduak 19. Bakarlaria:?Iñaki Gonzalez. Ibilbidea: Errenteria. Abenduak 20. Bakarlaria: Jose Antonio Uriarte. Ibilbidea:?Lurgorri. Abenduak 21. Bakarlaria:?Fernando Astoreka. Ibilbidea: Tiloak. Abenduak 22. Bakarlaria:?Iñaki Gonzalez. Ibilbidea: Lurgorri-Santa Luzia. Abenduak 23. Bakarlaria: Denis Azkarate. Ibilbidea: Errenteria. Abenduak 24 (04:00etan). Bakarlariak:?Fernando Astoreka eta Iñaki Gonzalez. Ibilbidea: Lurgorri. Abenduak 24 (07:00etan). Bakarlaria: Denis Azkarate. Ibilbidea: Gernika erdigunea. Abenduak 24 (10:00etan). Bakarlariak:?Denis Azkarate, Fernando Astoreka eta Iñaki Gonzalez. Ibilbidea: Gernika erdigunea.