Lointek Gernika Bizkaiak Malosten hutsik egin barik jarraitzen du
Talde gernikarrak 68-58 irabazi zion Embutidos Pajariel Bembibreri Malosten, zapatu arratsaldean. Ondorioz, Erregina Kopara sailkatzeko pauso garrantzitsua eman dute.
Etxeko beste partidetan ez bezala, zalantzaz beterik hasi zen etxeko taldea, eta horren erakusle da partida hasi eta hiru minutura zuten markagailua: 0-8. Mario Lopezek ohikoa ez den boskotea kantxaratu zuen: Asurmendi, Diez, Pina, Carter eta Lazaro.
Baina, baloia bereganatzeko eta kontraerasoko bina jokaldigaz zalantza guztiak alboratu, eta etxekoak suspertzen hasi ziren. Carterrek markagailuko aldea gutxitu zuen, eta Pinaren hirukoagaz puntu bakarreko aldeagaz aurretik jartzea lortu zuten (15-14). Defentsa sendotzeko helburuagaz, Lopez entrenatzaileak boskotean zenbait aldaketa egin zituen, eta 19-19ko berdinketagaz amaitu zuten lehen laurdena.
Baina, etxekoak ez zeuden gustura; kantxan beren jokoa egin ezinik aritu ziren partidako lehen minutuetan. Bembibreren Banks eta Gimeno jokalariak, arazo barik Leongo taldearentzat puntuak pilatzen zebiltzan, eta 26-27ko emaitzagaz Lopezek beste hutsarte bat eskatu zuen.
Lehen laurdena moduan, bigarrena ere berdinketagaz amaitu zen. 36-36ko emaitzagaz heldu ziren atsedenaldira. Garaipena etxean geratzeko hobeto jokatu behar zuela bazekien Malosteko taldeak, eta aldageletatik bueltan, erasoko jokaldiak sortzen ahalegindu zen, etenik barik. Modu berean, defentsa lana hobetu zutela ere igarri zen, aurkaria estu hartuta.
53-47ko markagailuagaz heldu ziren neurketaren azken ordu laurdenera. Azken minutuetan, etxeko jokalariek erlaxatu barik, beren ohiko jokoa erakutsi zuten. Garciak ez zuen arazorik izan Banks gelditzeko, eta Pinak Gimeno kontrolpean zuen. Gainera, Banksi partida osoa jokatu izanaren nekea igarri zitzaion, Fran Garciak hutsartea eskatu izana Bembibre gustura ez zegoenaren adierazle izan zen.
Sailkapenean hirugarren
2016-2017 denboraldia hasi zutenetik lehiatutako bederatzi jardunaldietatik bi galdu ditu Lointek Gernika Bizkaiak, eta 16 puntugaz sailkapeneko hirugarrena da. Puntu bat gehiagogaz, Perfumerias Avenida da bigarrena, eta 18 puntugaz Spar Citylift Girona da sailkapen buru.
Argazkilaria: Txebi Arriaga.
Argazkilaria: Txebi Arriaga.
