Jende asko batu da Gaur Foruan, sanmartinen baitako nekazal azokan

Olaia Zabalondo

2016/11/13

Barikuan hasi ziren Foruan San Martin jaiak ospatzen, eta gaur arratsaldean datorren urtera arte agurtuko dituzte. Gaur, baina, herritarrak kalera atera dira; inguruko herrietako lagun asko ere hurbildu dira Forura. Hain zuzen ere, XIV. Nekazal azoka hartu du goizeon Foruak. Horregatik, udaletxe inguruak jendez beteta ibili dira.

Foruko nekazal azokako postuetako bat

Baserritarrek zein artisauek beraien produktuak erakusteko eta saltzeko aukera edukiko dute, 21 salmahaitan. Taloa eta txorizoa dastatzeko aukera ere eduki dute bertaratutakoek, eta, eguerdian ilara luzea zegoen.

Karakol txapelketako irabazlea, udaleko ordezkariekin

Urdaibai Dantza Taldearen dantza emanaldiaren ostean, aizkolarien erakustaldia egon da herriko plazan. Erakustaldiaren ostean, berriz, Foruan ohikoa den karakol txapelketaren sari banaketa ekitaldia egin dute. Aurtengoa, txapelketaren 37. aldia izan da eta 11 kazola aurkeztu dituzte. Epaimahaiaren arabera, kazolarik gozoena Laka izenekoa izan da. Hala ere, guztientzako sariak egon dira gaurkoan. Laka izeneko kazolak hirugarren urtez jarraian jaso du Foruko karakol txapelketako lehenengo saria. Honakoa izan da kazolen sailkapena:

Laka
Celaya Zugadi
Miren (Bermeo)
Lopez
Txakarro
Sukarrieta
Atxondoa
Adriana
Kaskarrako
Estazinotsu
Txorikosta