Bermeo Balmasedaren kontra lehiatuko da asteburuan
Bermeok etxetik kanpo lehiatuko du bihar ligako seigarren jardunaldia. 17:30etatik aurrera jokatuko dute, La Baluga futbol zelaian.
Denboraldia ondo hasi dute bermeotarrek; orain arteko partida bat bera ere ez dute galdu.
Ondorioz, gaur gaurkoz, 3. mailako 4. multzoko sailkapeneko hirugarrena da , 11 puntugaz. Portugalete bigarrenak ere puntu kopuru bera du, eta bi puntu gehiagogaz Alaves B da sailkapen buru.
Balmasedak, berriz, zazpi puntu batu ditu orain arteko neurketetan, eta hamargarrena da sailkapenean.
Orain arteko jardunaldietan maila ona erakutsi arren, gola falta izan zaio Bermeori. Izan ere, aurreko bost jardunaldietatik hiru 1-0eko markagailuagaz irabazi ditu (beste biak 0-0 eta 1-1 amaitu ditu).
Aurreko asteburuan, esaterako, SCD Durangoren kontra jokatu zuen Itxas Ganen, eta partida amaitzeko bost bat minutu falta zirela sartu zuen Urkedik garaipenaren gola.
Denboraldia hasi dutenetik, Bermeok etxetik kanpo jokatzen duen hirugarren partida da biharkoa. Aurrekoa hilaren 18an jokatu zuen Gasteizen. C.D Vitoria eta Bermeoren arteko partida hutseko berdinketagaz amaitu zen. Hilaren 4an 0-1 nagusitu zen Santutxuren zelaian.
