Zubieta Errota liburutegiko ikastaroak urrian hasiko dira
Muxikako liburutegiak 2016-2017 ikasturteko ikastaroen zerrenda aurkeztu du, denetarik eskaintzen duen aukera zabalarekin. Ikastaroak urrian hasi eta maiatzera bitartean izango dira. Izena emateko epea zabalik dago irailaren 28a arte.
Gorputz ariketak hartzen dituzten ikastaroak honako hauek izango dira: pilates, zunba, zunba txiki eta yoga. Gitarra, panderoa eta trikitixa musika instrumentuak jotzen ikasteko klaseak ere egingo dituzte; baita bertsolaritzakoa ere, lau urtetik gorako haurrentzat. Trikitixakoa da zapatuetan emango den ikastaro bakarra.
Ariatza eskolan esku-lanen eta jostura ikastaroa ere egingo dute bariku eta eguen arratsaldeetan; eta haurrentzako pintura eta marrazketa tailerra emango dute. Sei eta hamabi urte bitarteko gazteentzat xakean jolasten ikasteko saioak egingo dituzte eguenetan, Zubieta Errotan.
Haurrentzako ingeleseko klaseak eta nagusientzako euskarazko klaseak ere emango dituzte. Goizeko ikastaroak Zubieta Errotan izango dira eta arratsaldeetakoak berriz Urretxindorra eskolan.
Herriko erretiratuek, ikasleek eta langabetuek bost euroko beherapena izango dute zenbait ikastarotan, eta taldeak sortzeko gutxieneko kopurua hamar eta zortzi pertsonen artekoa izango da. Ikastaroek hogei eta bost euro bitarteko prezioak izango dituzte, eta gehienak aste barruan izango dira, arratsaldeko ordutegiekin.
Izena emateko, interesatuek Zubieta Errotako liburutegira bertaratu beharko dira, arratsaldez, 16:00etatik 20:00etara.
