Errefuxiatuen alde, estropada egingo dute Ean
Siriako errefuxiatuak laguntzeko asmoz, estropada solidarioa egingo dute Ean, zapatu honetan. 12:00etan hasita, egun osorako egitaraua antolatu dute.
Estropadan parte hartu gura duenak 616985844 telefono zenbakian eman behar du izena. 10 euro ordaindu behar dira, eta batutako dirua Grezian elkartasun lanetan diharduen ‘Zaporeak’ taldeari emango diote. Talde horrek egunero 1.500 errefuxiatu baino gehiago elikatzen ditu.
Hain zuzen ere, taldeko kideak Ean egongo dira zapatuan, eatarrek haien proiektuak bertatik bertara ezagutzeko. Halaber, taldeko kamisetak salgai jarriko dituzte.
Kayak (bikoitza) lasterketa eta Paddle (sup) lasterketak egingo dituzte.
Iaz egin zuten estreinako estropada solidarioa, eta antolatzaileen berbetan, «arrakastatsua» izan zen. Giro paregabea sortu zuten, eta siriar errefuxiatuentzako diru bilketaren helburuak «soberan bete» zituzten.
Iaz gutxi gorabehera 1.200 euro batu zituzten, eta antolatzaileek zehaztu dutenez, aurten kopuru hori gainditzea espero dute.
EGITARAUA:
- 12:00 Estropadak.
- 15:00. Herri bazkaria.
- 17:00. Umeen jolasak.
- 22:00. Dj festa moilan eta BFT (Atxaundi azpian).
