Gautegiz-Arteagako mendi martxa eta lasterketaren izena emateak zabaldu dituzte
Irailaren 11an egingo dituzte martxak eta lasterketa Gaztelu Zar Elkartekoen eskutik. Martxetako zein lasterketako partaideek www.urdaibaikopa.eus helbidean edota udalerriko Egala tabernan eman behar dute izena.
Urdaibai Koparen laugarren proba izango da honakoa (bosgarrena eta azkena Foruan egingo dute irailaren 25ean).
Aurretik izena emateko azken eguna irailaren 7a da. Hala ere, proba bakoitzeko gehienezko parte hartzaile kopurua bete ezean, egunean bertan ere izena eman ahalko da.
Hain zuzen ere, martxa luzean 400 parte hartzailetan ipini dute muga, eta laburrean eta lasterketan, 200 partaidetan.
Aurretik izena ematen dutenek martxaren kamiseta jasoko dute eta neurria ziurtatuta izango dute. Baina, irailaren 4aren ondoren apuntatuz gero, dauden neurrikoak jasoko dituzte.
Lasterketan eta martxa luzean aurretik izena emanez gero, 10 euro ordaindu behar dira (14 euro egunean bertan). Martxa laburrari dagokionez, nagusiek 8 euro ordaindu behar dituzte (10 euro egunean bertan), eta 14 urtetik beherakoek 6 euro (egunean bertan ere 6 euro).
Korrikalariek 17 kilometroko lasterketa burutuko dute, 970 metroko desnibelari aurre eginez. 10:30ean hasiko dute proba.
Martxa luzea 15 kilometrokoa da, eta laburrak, ostera, 6 kilometro ditu. 09:30ean irtengo dira ibilbide luzeko partaideak Gaztelu-Zar elkartearen paretik, eta martxa laburrekoek 10:45ean dute irteera-ordua.
Ibilbidean zehar hornidura lekuak egongo dira, eta amaieran parte hartzaile guztientzat luntxa jarriko dute. Lasterketaren zein martxen partaideak herriko frontoian dutxatu ahalko dira.
