Goikoetxea-Inza eta Egiguren-Etcheto bikoteak sailkatu dira barikuko finalera
Jai Alai World Tourreko lehen Master Seriesaren finalerdiak jokatu zituzten zapatuan.
Bariku honetan, 20:30etatik aurrera lehiatuko dute finala. Horrekin batera, hirugarren posturako partidua jokatuko dute finalerdietako galtzaileek.
Barikuan, 19:30ean hasita, Lazybone Rambles-ek izango du frontoia musikagaz girotzearen ardura. Partidak amaitzean, berriz, TPR Dj-aren emanaldia egongo da.
Mikel Egiguren eta Nicolas Etcheto 15-5 eta 15-11 nagusitu ziren Christophe Olha eta Gotzon Enbilen kontra. Azken horiek ez ziren oso fin ibili, batez ere partiduaren lehenengo set-ean. Etchetok tantoa dominatu zuen atzean, eta Egigurenek erremate bikainak egin zituen.
Erritmo biziz hasi zuten partida, Etcheto atzean nagusitasuna erakusten, eta Egiguren tantoak alboz bukatzen. Olhak Egigureni sakea kentzeko zailtasunak izan zituen. Enbilek bere kalitatea agerian utzi zuen, baina, izan duen lesioaren ondorioz, erritmo apur bat falta izan zitzaion.
Beste finalerdian, Iñaki Osa Goikoetxea eta Txabi Inza Jean Olharan eta Ibai Erkiagaren kontra lehiatu ziren, eta 15-12 eta 15-13 irabazi zieten.
Oso partida ona jokatu zuen Erkiaga II-k, ondo ulertu zuen noren kontra ari ziren eta zer joko egitea komeni zitzaien. Olharan ere ez zen beldurtu Goikoetxea aurrean izanda. Ondo jokatuta, Goikoetxea eta Inzak bikote oso ona osatzen dutela agerian utzi zuten.
Partida berdindua izan zen. Olharan gazteak Goikoetxearen maila berean dagoela erakutsi zuen, eta partida ikusgarria jokatu zuen. Erkiaga lekeitiarrak ere partida bikaina burutu zuen, jokaldi guztiak oso ondo irakurriz. Goikoetxeak ez zuen bere egunik onena izan, baina, momenturik garrantzitsuenetan bikain agertu zen.
Bigarren Master Seriesa
Bestalde, hilaren 24ean (domeka) jokatuko dute bigarren Master Seriesaren lehen finalerdia. Hormaetxea eta Aldazabal Erik eta Lekerikaren kontra ariko dira nor baino.
Bigarren finalerdia, ostera, hilaren 30ean (zapatua) jokatuko dute Barandika-Amigorena eta Beaskoetxea-Txasio bikoteek.
Bigarren Master Seriesaren finala abuztuaren 5ean (barikua) izango da.
Bi Master Seriesen irabazleak ezagutu ostean, abuztuaren 12an (barikua) jokatuko dute final handia.
Argazkia: Jai Alai World Tour.
Argazkia: Jai Alai World Tour.
