San Joan jaietan ere kalera aterako dute Geuk eus kanpaina
San Joan egunean, barikuan, bideo-photocall karpa jarriko dute Eneperin. Bertan, Kalinpanek lagunduta, gura duten pertsonek euskaraz egiteko dituzten arrazoiak azaldu ahal izango dute. Karpa barruan bideoak grabatu ahalko dituzte, eta kanpoan, berriz, argazkiak atera daitezke.
Arrain Azokan abiarazi zuten Geuk eus kanpaina, eta aurreikuspenak bete zituzten. Hiru egunetan 163 bideo grabatu ziren eta 400 argazki atera zituzten.
Horien guztien edizio lanak amaituta daudela azaldu dute eta dagoeneko ikusgai jarri dituzte Euskara Sailaren webgunean: www.bermeo-euskaraz.eus
Jakinarazi dutenez, Geuk eus kanpainaren berri emateko eskuorri batzuk ere argitaratu dituzte, eta horiek San Joan egunean banatuko dituztela diote. Bertan, besteak beste, Arrain Azoka egunean egindako argazkiak eta bideoak ikus daitezke.
Euskara zinegotzi Juan Karlos Agirrek azaldutakoaren arabera, “eskuorri horien bitartez, herritarrak karpan parte hartzera animatzen ditugu, euskaraz bizitzeko dituzten arrazoiak azaltzeko”. Era berean, argazki horiekin guztiekin mosaiko handi bat osatzeko asmoa dagoela iragartzen dute eskuorrian.
Lagun talde bat bideo-photocall karpan, Kalinpanegaz. Argazkia: Bermeoko Udala
