Nazioarteko lehiaketa batean sariak jaso ditu Urretxindorrak
Erresuma Batuko Rutlan Water Nature Reserve-k antolatzen duen lehiaketan sariak hartu dituzte Urretxindorra herri eskolako ikasleek. Gautegiz Arteagako Bid Centerrekin batera, arrano arrantzalea ugaltzeko programan parte hartzen du Urretxindorrak. Era berean, proiektu bertsuak dituzten munduko beste eskola batzuekin harremanetan dira; tartean Erresuma Batuko eskola batekin.
Haien bitartez jakin zuten Rutland Water Nature Reserve egoitzak antolatutako lehiaketaren berri, eta parte hartu zuten. Lau kategoriatan banatu zituzten lanak, eta muxikarrek lauretan parte hartu zuten: Arrano arrantzalearen marrazkia, arrano arrantzaleari buruzko istorio laburra, arrano arrantzaleari buruzko olerkia eta arrano arrantzaleari buruzko artikulu zientifikoa ziren, hain zuzen, lehiaketako lau arloak.
Urretxindorrakoek 1. eta 2. sariak hartu dituzte artikulu zientifikoen atalean. Eskola arduradunek esan dutenez, “sari garrantzitsuak dira, kontuan hartuta atzerriko hizkuntza batean landutako lanak direla”.
Istorio laburren atalean 3. saria hartu dute. Eta aipamen berezia izan dute aurkeztutako marrazki batek eta olerki batek.
