Aisialdiaren jagole 25 urtez
1991n sortu zuten MB 2000 elkartea, aisialdi munduan zegoen beharrizan bati irtenbidea eman asmoz. Bermeoko eta Mundakako zenbait lagunek sortu zuten taldea, bi herrietara iristeko.Aisialdian beharrizan bat zegoelako sortu zen orain dela 25 urte MB 200...
1991n sortu zuten MB 2000 elkartea, aisialdi munduan zegoen beharrizan bati irtenbidea eman asmoz. Bermeoko eta Mundakako zenbait lagunek sortu zuten taldea, bi herrietara iristeko.
Aisialdian beharrizan bat zegoelako sortu zen orain dela 25 urte MB 2000 elkartea. Ordutik, han eta hemen, eta, batez ere, umeekin lanean ikusi ahal izan dituzte elkarteko kideak. Hala ere, horien lana ez da umeekin egiten duten horretara soilik mugatzen.Mundakako eta Bermeoko zenbait lagun batu eta Mundaka-Bermeo 2000. urteari begira (MB 2000) izenagaz sortu zuten elkartea 1991. urtean. «Busturialdean aisialdi munduan gabezia bat zegoela ikusten zuten taldea osatu zutenek, eta horregatik erabaki zuten elkartea sortzea», dio MB 2000 elkarteko kide Izaskun Sanz Etxebarriak. Hasieran, gainera, begiraleentzako eskola modura sortu zuten elkartea; helburua, aisialdiari begira lan egingo zukeen harrobia sortzea baitzen. Horregatik, elkartea arduratzen zen begiraleentzako ikastaroak emateaz.
IGIren diru laguntzak
Bermeoko ludoteka eta gaztelekua kudeatu izan dute; ludotekagaz jarraitu egiten dute, eta hirugarren adineko herritarrentzako aisialdirako jarduerak ere antolatu izan dituzte. Garai hartan, proiektuak aurrera eroateko, Itsasoko Gizarte Institutuaren (IGI) diru laguntzak hartzen zituztela azaldu dute. «Horiek murrizten joan heinean, proiektuak ere murriztu beharra eduki genituen», diote.
Hirugarren adinekoekin gaur egun Kabidxe dagoen lekuan egiten zuten lan, bai eta kofradia zaharrean ere. Azken urteetan, baina, «proiektua ez zen bideragarria», eta ezin izan dute horregaz jarraitu. MB 2000 elkartea, gainera, Sancti Spiritus zaharren egoitzako aisialdirako programagaz ere arduratu izan da urte askoan, bai eta zenbait ikastetxeetako jolas orduekin ere. «Gerora, baina, elkarteak norabidez aldatzea erabaki zuen. Hala, Mundakako ludoteka eta liburutegia eta Foruko kultur etxea kudeatzen hasi ginen. Hala ere, gaur egun Mundakako ludoteka ez dago gure ardurapean; beste biak bai», azaldu du Maribi Larrinaga Peñak.
Bermeoko Udalak ludotekarako eta gaztelekurako lokalak utzita, boluntario modura lan egiten zutela diote. Gogoratu dute hasierako urteetan udan bakarrik zabaltzen zituztela; «gerora joan da eskaintza urte guztira zabaltzen», aipatu dute. Orain, alderantziz gertatzen dela azaldu dute: «Orain arte eskaini dugun udako kaleko ludoteka ez da egongo, nahiz eta aukera ezberdinak proposatu ditugun. Pena bat da, udan beste modu bateko jarduerak egin ahal direlako».
Arlo askotan lan egin izan dutela diote: herriko eta auzoetako jaietan, umeentzako ekintzetan… «Laguntzeko prest gaude beti». Herriko kultur taldeek eskatuta ere, hainbat jardueratan parte hartzen dute; «ez daukagu inolako arazorik laguntzeko», diote. Ekainaren 18an eta 19an Izaro Bikers motozaleen Magurios Topaketetan eta Bermeoko Gure Esku Dagok uztailaren 2an egingo duen adierazpena herriratzeko jaialdian egongo direla azaldu dute, «umeek ere zer egin eduki dezaten».
20 lagun inguru
Andra Mari jaietako egitarauan ere laguntzen dute; playback txapelketak eta txokolatada herrikoia antolatzen dituzte, besteak beste. Eta Arrain Azokako umeen gunea antolatzen ere badaramatzate 17 urte inguru.
Taldean 20 lagun inguru ari dira lanean, «bakoitzak ahal duena ahal duenean egiten du, batzuek lanagatik edota ikasten ari direlako denbora gutxiago baitaukate».
Larrinagak dio 25 urtean aisialdi mundua aldatu egin dela: «Eskaintza handiagoa dago gaur egun, eta pribatizaziora jo dute gehienek. Negozio batean bihurtzen ari da aisialdia. Gu hasi ginean, udalak arduratzen ziren aisialdi munduagaz zerikusia zeukaten jarduera gehienak antolatzen».
Ilusioz hasi zuten ibilbidea orain dela 25 urte. «Orduan zerbait berria zen. Egitarau betea izaten genuen, eta ordurako desberdina zena».
Hastapenak, aipatu dutenez, ez ziren gogorrak izan, «umeak denetarako prest zeudelako». Gaur egun, gauzak antolatzeak askotan «beldurra» ematen diela dio Sanzek: «Argazki bat ateratzeko orduan ere arretaz ibili beharra daukagu, zerbait aipatzekotan».
Diotenez, gurasoen jarrera ere ez da orain 20 edo 25 urte modukoa: «Gehienak jatorrak diren arren, lehen ilusio handiagoa zeukaten. Egia da orain umeentzako dagoen eskaintza askoz ere handiagoa dela, eta ez direla gauzak lehengo modura baloratzen». Hala ere, ilusioz hasi zutena ilusioz jarraitzen dutela aipatu dute, «gogotsu, eta beti aurrera begira, gauzak antolatzen jarraitzeko prest». Ezinbestekoa den zerbitzua dela uste dute; beraz, «diru laguntzak gero eta murritzagoak izan arren», jarraitzeko asmoa agertu dute.
25. urteurrena ospatzeko, Alkartasuna Dantza Taldeagaz umeen kalejira egin zuten martxoan. Urrian, hala ere, taldeko kideen artean ospatuko dute urteurrena: «Momentuz beste ezer ez daukagu buruan».
