Ehunka ikasle batuko dituzte zapatuan eskolarteko olinpiadek
Bermeoko Udalaren Kirol Patronatuak eta Taraska Gazte zahar Atletismo taldeak antolatuta, eskolarteko XII. olinpiadetan parte hartzeko aukera izango dute zapatuan ehunka ikaslek. Aurten, Araneko kiroldegian egingo dituztela azaldu dute antolatzaileek. Eskolarteko olinpiaden helburua umeak atletismora hurbiltzea da, “modu dibertigarri batean, lehiakortasunik barik”, esan du Gazte zahar atletismo taldeko kide Jon Iturbek.
10:00etatk 12:00etara batuko dira, beraz, zapatuan, izena ematen duten 6 eta 12 urte bitarteko umeak, eta atletismoko proba ezberdinak egingo dituzte. Pisu eta disko jaurtiketetan eta altuera eta luzera jauzietan zelako abilezia duten erakutsi beharko dute parte hartzaileek. Ariketa horiez gain, lasterketa ere gingo dute. Hala ere, korrika egin beharreko metroen kopurua adinaren araberakoa izango da.
Proba horiek guztiak egiteko lau gune jarriko dituzte. Lehenengo gunean, jaurtiketak egingo dituzte Lehen Hezkuntzako lehenengo eta bigarren mailetako umeek. Bigarrenean, altuera jauziak egiten ibiliko dira hirugarren eta laugarren mailetako umeak. Bosgarren eta seigarren mailetako ikasleek luzera jauziak lehiatuko dituzte, hirugarren gunean. Azkenik, laugarren gunean, krosa egingo dute parte hartu gura duten guztiek.
Amaieran, ura emango diete parte hartzaileei, eta domina eta kamiseta bana ere jasoko dute.
Bestalde, ekimen horretan lagundu gura duten pertsona guztiek aukera izango dutela azaldu dute gaur egin duten aurkezpenean. Boluntario izan gura dutenek, kiroldegian eman ahal dute izena, edota egunean bertan probak hasi orduko.
Bestalde, asteburuan, Kirolari Ateak Zabalik ekimenaren baitan beste hainbat kirol erakustaldi izango dira herriko kaleetan. Hala, zapatuan bertan, arte martzialen gunea egongo da Lamerako kioskoan 11:30etik 13:00etara. Dantzen gunea, 12:00etatik 14:00etara jarriko dute Lameran; line dance, areto dantzen eta gimnasia erritmikoaren saio zuzenduak eta erakustaldiak egongo dira.
Domekan, berriz, Lameran, 12:00etatik 14:00etara, eskubaloiaren txanda izango da.
Gazte zahar atletismo taldeko Jon Iturbe eta Ana Uriarte eta Irune Ormaetxea kirol zinegotzia, gaur goizean egindako aurkezpenean
