Bermeo, Ondarroa eta Mutriku, Emusik jaialdiaren agertoki
Europako musika eskolen jaialdia da Emusik, eta 8.500 ikaslek parte hartuko dute. Maiatzaren 6an, Ondarroan eta Mutrikun egingo da jaialdia, eta maiatzaren 7an, BermeonBermeo, Ondarroa eta 58 herri Emusik jaialdiaren agertoki izango dira maiatzaren 6an...
Europako musika eskolen jaialdia da Emusik, eta 8.500 ikaslek parte hartuko dute. Maiatzaren 6an, Ondarroan eta Mutrikun egingo da jaialdia, eta maiatzaren 7an, Bermeon
Bermeo, Ondarroa eta 58 herri Emusik jaialdiaren agertoki izango dira maiatzaren 6an eta 7an. Musika Eskolen Europako jaialdia da, hain zuzen, Emusik. Horretan, Europako musika eskoletako 8.500 ikaslek parte hartuko dute Euskal Herrian barrena eskainiko dituzten 120 kontzertu baino gehiagotan.Ondarroak, Bermeok eta Mutrikuk kontzertu horietako batzuk hartuko dituzte. Maiatzaren 6an, barikuan, Ondarroaren eta Mutrikuren txanda izango da; eta maiatzaren 7an, berriz, Bermeorena.
Hurrenez hurren, Bermeo eta Ondarroako musika eskoletako zuzendari Estibalitz Arrizabalagak eta Iker Allurrek azaldutakoaren arabera, «Ondarroako eta Bermeoko udalek hitzarmen bat sinatu zuten DSS 2016 eta Donostiako musika eta dantza eskolako antolatzaileekin».
Donostian inaugurazioa
Emusik Donostia 2016 Europako Kultur Hiriburuaren proiektua dela zehaztu dute. Hala, aipatu jaialdiaren inaugurazio ofiziala Donostia Arena 2016 espazioan (Ilunbe) egingo dute, maiatzaren 6an, 11:00etan. Ikasleentzako ordutegi ona ez denez, bertako ordezkari bakarra Bermeoko Musika Eskolako Erroxape Abesbatza izango da. 8.500 musika ikaslerekin batera ariko dira inaugurazio ekitaldian. Topaketa horretan, musika eta dantza batuko dira errepertorio zabal batean. Donostiako martxa, Txanton piperri, Europako ereserkia eta Emusikerako bereziki konposatutako Musikatu Bizitza abestia jo eta abestuko dituzte, besteak beste.
Inaugurazio ekitaldiaren ostean, Emusiken parte hartzen duten Europako musika eskoletako ikasleek errezitaldiak eskainiko dituzte maiatzaren 6ko arratsaldean eta 7ko goizean. Herritarrei zuzendutako doako kontzertuak izango dira guztiak.
Bermeon eta Ondarroan honako taldeek parte hartuko dute: Escola Municipal de Musica La Selva del Camp perkusioa (Tarragona, Herrialde Katalanak), Escola Municipal de Musica de Mataro Big Band (Herrialde Katalanak), Espai Musical Burriac Argentonako (Herrialde Katalanak) haur koroa, Musik und Kuntstsuchule-Region Freudenstadt (Alemania) banda eta Jose Antonio Egia Bermeoko Musika Eskolako taldeak.
Kontzertu «dinamikoak» egin gura dituztela azaldu dute Bermeoko eta Ondarroako musika eskoletako zuzendariek. Hala, bi herrietan kalejirak antolatu dituzte.
Zaldupetik, Itsasaurrera
17:00etan iritsiko dira maiatzaren 6an taldeak Ondarroara, eta 17:30ak bitartean harrera egingo diete Zaldupeko aparkalekuan. Kalejira 18:00etan hasiko dute Zaldupetik, eta honako taldeek parte hartuko dute: Musika Eskolako eta Kresala elkarteko Banda, Big Banda, txistulariak, perkusio taldea, Alemaniarren Banda, trikitilariak, Herrialdeko Katalaneko haurren korua, Ondarroako Musika Eskolako umeak eta irakasleak, Kantaize Abesbatzeko kideak eta Emeki Koraleko kideak. Gainera, kalejira aurretik zein atzetik, Artelaneko erraldoiak ibiliko direla azaldu dute.
Kalejira Itsasaurre plazan amaituko da, eta kontzertuak 19:00etan hastea aurreikusi dute. Talde bakoitzak 20 minutu inguruko kontzertua eskainiko du. Saioari amaiera emateko, talde guztiek batera Europako Ereserkia eta Musikatu bizitza abestiak kantatuko dituzte.
Eguraldi txarra egingo balu, berriz, ez lukete kalejirarik egingo. 18:00ak aldera luntx bat emango liekete parte hartzaile guztiei, eta kontzertuaren ordua mantendu egingo lukete, baina Itsasaurren barik, kiroldegiko kantxan izango litzateke.
Klaustroa eta Erreten
Bermeora, aldiz, zapatuan etorriko dira Emusiken parte hartuko duten taldeak. Kalejira 10:30ean abiatuko da Musika Eskolatik. Musika Eskolako hainbat taldek parte hartuko dute. Hala ere, herritarrek ere parte har dezakete, eta eguaztenetan batzen ari dira probasaioak egiteko. 20:00etan batzen dira Musika Eskolan, eta ordu erdi inguruko probasaioa egiten dute.
Jaialdiak bi agertoki izango ditu Bermeon: Klaustroa eta Erreten parkea (euria balitz, Klaustroa eta Andra Mari eliza). Ondarroan modura, talde bakoitzak 20 minutuko kontzertua eskainiko du, eta talde guztiek batera abestuz amaituko dute Bermeon ere.
300 musikari inguruk parte hartuko dute jaialdi horretan, eta entzuleria ere kantuan jarri gura dute. Hala, tartean, Bermeoko kantuak ere kantatuko dituztela jakinarazi dute.
Emusik jaialdia maiatzaren 7an amaituko da, iluntzean. Saguesen egingo dute amaierako jaialdia, erraldoiekin. Arrizabalagak eta Allurrek esan dutenez, «Emusik jaialdi bat baino gehiago da; izan ere, musika batzen gaituen hizkuntza komuna da, eta aipatutako jaialdia premiatzat hartuta, aukera paregabea egongo da kultura eta hainbat herrialdetako ezagutzak eta esperientziak partekatzeko. Era berean, Europako herri ezberdinen arteko hurreratzea eta harremanak bultzatzeko aukera ere emango du».
Emusik jaialdia festa eta musika ospakizunak baino gehiago dela diote: «Jaialdiak ikusgarritasun handiagoa eman gura dio musika eskolek maila guztietan egiten duten lan nekaezinari».
Hala, Emusik jaialdiak musikagaz gozatzeko aukera paregabea eskainiko die herritarrei. Jaialdia berriro egingo duten ez dakite. Beraz, Bermeoko eta Ondarroako musika eskoletako zuzendariek herritar guztiak gonbidatu dituzte aurtengoan parte hartzera.
Mutrikun ere bai
Maiatzaren 2tik 6ra XVI. aste musikala ospatuko dute Mutrikun. Astelehenetik eguaztenera, Zabiel Kultur Etxean kontzertuak eskainiko dituzte, 19:00etatik aurrera, eta eguenean, ostera, Zabiel Plazan egingo da kontzertua. «Kontzertu hauetan gure ikasleek urtean egindako lanaren fruituak erakusteko eta entzuteko paregabea izango da», azaldu dute Musika Eskolako arduradunek.
Eta aste musikalari bukaera emateko, Emusik jaialdiaren barruan, Europako hainbat gazteren kontzertua egingo da, maiatzaren 6an, 16:30ean, Goiko Plazan.
Mutrikun ez eze, Markina-Xemeinen ere hainbat ekintza egingo direla aurreratu dute. Jaialdian parte hartuko duten musikariek, esaterako, Markina-Xemeinen egongo dira lotan.
