Oliba-olio birjina estra erosteko aukera dakar oraingoan Errigorak

Nafarroa hegoaldeak berezko dituen produktuak gure eguneroko kontsumo ohituretara ekartzen darrai Errigorak, Nafarroa hegoaldeko uzta eskutik eskura izeneko kanpainaren bidez. Oraingoan, oliba-olio birjina estra ekologikoa edo konbentzionala eskuratzeko kanpaina zabaldu du. Martxoaren 2ra bitartean eskatu ahalko dira bost litroko bidoiak, “ekoizle zein kontsumitzaileentzat bidezkoa den prezioan”. 2014an, egindako lehen kanpainan, errota bakarrak parte hartu zuen, baina urtez urte ekoizleak gehitzen joan da Errigora. Hala, iaz bi errotak ekoiztutako olioa saldu zuen, eta aurten lau errotaren olioa dakar: Cascanteko La casa del aceiterena, Ablitasgo kooperatibarena, San Isidro del Pinarreko Bardeak-ena eta Arroitzeko Ekolorena. Errotek duten prezio berean salduko ditu bidoiak Errigorak; hain zuzen, bidoi ekologikoa 32 euroan, eta konbentzionala 22,5 euroan.

Errigorako salmahaia, Gernika-Lumon

Aurrerantzean gehiago batu daitezkeen arren, 50 bat herrik parte hartuko dute kanpainan; tartean, Eak, Gernika-Lumok eta Bermeok. Eskaerak ohiko lekuetan egin beharko dira; ikastetxe, euskaltegi, lantoki, taberna, denda eta abarretan banatuko diren eskuorriak beteta. Halaber, www.errigora.eus webgunearen bitartez ere bidera daitezke eskabideak. “Olioa jasotzeko eguna eta lekua eskaera egiterakoan zehaztuko da, eta ordainketa ere orduantxe egin beharko da”. Aipatutako lekuetan ez ezik, kalean ere egongo da Nafarroa hegoaldeko olioa eskuratzeko aukera. Astelehenean, adibidez, Gernika-Lumoko Merkatu plazaren aurrean jarri zuten salmahaia, eta, eskabideak bideratzeaz gain, olioa dastatzeko aukera ere eman zuten. Zehaztu dutenez, datorren astelehenean ere han izango dira, 09:30etik 13:00etara bitartean. Kanpaina bat, helburu asko Nafarroa hegoaldeko produktuak eskatzeko aukera emateaz gain, “kontsumo eredua aldatzeko gonbitea” da Eskutik eskura kanpaina, eta baita “kontsumitzaile arduratsuak herriz herri saretzeko saiakera” ere. “Auzolana bitartekari, talde handietan antolatuta, eskaera handiak bideratzeko modu bat” eskaintzen du Errigorak. “Orain arte, 50 bat herritan 3.000 etxe inguru saretu gara eta, iazkoan, 9.100 bidoi banatu genituen; 45.500 litro olio”. Hala, norbanakoari on egiteko ez ezik, “gure inguru hurbilari” ere on egiteko modua da Eskutik eskura. Batetik, eskatzaile bakoitzak kalitatezko produktua jasoko duela nabarmendu du Errigorak, “euskaraz etiketatuta eta ekoizlearen jatorrizko prezioan”. Bestetik, denen artean, “bertako ekoizpenari bultzadatxoa emango” zaiola, “ingurumena zaintzen lagunduko” dugula eta “euskal lurraldeen arteko harremanak sustatzen” ariko garela dio. Azkenik, “euskarari ere on egingo diogu, ekoizleak euskarara oraindik gehiago erakarriz”.