Santa Agedako koplak nonahi
Makilagaz edo makila gabe, gaur, Santa Ageda bezperan, santa eskean ari direnak asko eta asko dira bertoko herrietan.
Busturialdeko herrietako txoko ugaritan entzungo dira gaur Santa Agedako koplak. Goizean zein arratsaldean, elkarte, talde, eragile zein norbanakoak izango dira kaleak euren doinuez alaitzen. Esaterako, Bermeoko Erroxape Emakumeen Elkarteko kideak goizean ibili dira kalez kale.
Santa Ageda bezperako hitzordura hutsik egin ez, eta eskualdeko ikastetxeetako ikasle gehienak kalera aterako dira gaur. Batzuk, goizean ibili dira kantu kantari, beste batzuek, ordea, arratsaldean egingo dute.
Ohikoena Santa Ageda bezperan kalera ateratzea bada ere, Busturialdeko hainbat herritan astebururako utzi dituzte taldean batu eta koplak abestearena. Esaterako, Eako Natxitua auzoan, bihar, santuaren egunean bertan aterako dira abestera. Are gehiago, trikitilariak eta herri bazkaria ere edukiko dituzte. Ajangizen, Arratzun, Ereñon eta Ibarrangelun zapatuan jarri dute hitzordua, eta Nabarnizen, aldiz, domekan.
