Iazko irabazleak, antolatzaileekin eta Bermeoko Udaleko ordezkariekin
Bermeoko Erroxape Emakumeen Elkarteak narrazio laburren lehiaketa antolatu du beste behin ere. Aurtengoa lehiaketaren 21. edizioa da, eta horretan parte hartu gura dutenek otsailaren 16ko 20:00ak baino lehen aurkeztu beharko dituzte lanak. Elkartetik jakinarazi dutenez, lau lekutan utzi daitezke lanak: Erroxape Elkartearen egoitzan (Erreten parkean), udal liburutegian, Gizarte eta Kultura Etxean edota Bermeoko 115 posta kutxan.
18 urtetik gorako edozein gizon zein emakumeek parte hartu ahalko dute narrazio laburren lehiaketa horretan. Kontakizunak, aurrekoetan legez, euskaraz zein gazteleraz izan daitezke; betiere, inoiz argitaratu bakoak izan beharko dira eta jatorrizkoak.
Erroxapek antolatutako lehiaketa horretan parte hartu gura duten horiek zenbait baldintza bete beharko dituzte lanok aurkezterako orduan. Hala, lanok orrialde bakarrean idatzita egon beharko dute, eta derrigorrez, tarte bikoitza erabili behar izango dute. Narrazioek, 4 eta 6 orri bitarteko luzera eduki beharko dituzte, eta orrialde bakoitzak ezin izango ditu 1.200 karaktere baino gehiago eduki. Jarritako irizpide horiek guztiak betetzen ez dituzten lanak, zuzenean lehiaketatik kanpo utziko dituztela azaldu dute antolatzaileek.
Parte hartzaile bakoitzak kontakizunaren 3 kopia aurkeztu beharko ditu; lanak, bestetik, izenburua eta egilearen ezizena daroan kartazal baten barruan aurkeztu beharko dira. Kartazal horretan, gainera, lana bera ez ezik, egilearen datuak (izen-abizenak, helbidea eta telefonoa) biltzen dituen beste kartazal bat sartu beharko ditu interesatuak.
Antolatzaileek jakinarazi dutenez, egile bakoitzaren lan bat bakarrik saritu ahalko du epaimahaiak, eta saria hutsik geratzea ere posible liteke. Epaimahaiko kideak, gainera, ezin izango dira lehiaketara aurkeztu.
Euskarazko 13 lan eta gaztelerazko zortzi aurkeztu zituzten iazko lehiaketara.
Sari banaketa ekitaldia martxoaren 8ko ekintzen barruan egingo dutela zehaztu dute Erroxape elkartetik.
SARIAK:
Euskarazkoa
Irabazlea. 200 euro eta garaikurra.
Finalista. 100 euro eta garaikurra.
Akzesita. garaikurra
Gaztelerazkoa
Irabazlea. 200 euro eta garaikurra.
Finalista. 100 euro eta garaikurra.
Akzesita. garaikurra
