Desagertutako gizonezkoaren arrastorik ez dago oraindik

Busturialdeko Hitza

2015/03/13

Enekoitz Bastegieta

Martitzenaz geroztik dago desagertuta Enekoitz Bastegieta gernikarra, eta oraindik haren bila jarraitzen du Ertzaintzak. Eguaztenean hasi zen polizia haren bila, senideek salaketa jarri. Inguruko mendi ingutuetan ari dira bilaketa egiten ertzainen patruilak, eta Ondarroako komisladegikoak ere horretan ari dira Lea-Artibaiko inguruetatik. Hala ere, bilaketa ofizial bat agintzeko datu nahikorik ez dutela baieztatu dio Segurtasun sailak Hitzari. Ikerketa bat zabaldu dute, eta guraso eta ingurukoen artean ere informazioa batzen ari da Ertzaintza. Izan ere, Segurtasun sailak azaldu duenez, Bastegieta non eta nola desagertu den ez dakite, eta hipotesi eta aukera denak zabalik dituzte oraindik. Ustez, bizikletan ibiltzera joan zen Bastegieta, martitzen eguerdian, hilaren 10ean, eta haren berririk ez dago ordutik. Denda baten jabea da desagertutakoa, eta erakusleihoan jarri zuen bizikletan ibili ondoren bueltatuko zela zioen oharra. Alabaina, itzuli ez zela ohartuta, eta gauean dendako pertsiana zarratu gabe zegoenez, haren etxera joan ziren hurbilekoak. Atea zabalik aurkitu zuten, telebista piztuta, baina gizonezkoaren, bizikletaren eta haren ibilgailuaren arrastorik ez. Hori dela eta, salaketa jarri zuten.