Parte hartze prozesuaren baitan, inkestak jasoko dituzte foruarrek etxean

Olaia Zabalondo

2015/02/19

Hainbat herritar hurbildu ziren parte hartze prozesuaren lehenengo batzarrera. Argazkia: Foruko Udala

Foruko Udalak herritarrekin batera diseinatu gura du Hiri-Antolamendurako Plan Orokorra (HAPO). Horretarako, parte hartze prozesu bat abiarazi du. Prozesu horren baitako lehenengo urratsa eman dute jada, hau da, herritarrei prozesuaren nondik norakoak azaltzea. Bigarren pausoa ere martxan dute dagoeneko, hain zuzen, inkestak bidali dituzte etxeetara. Herritarrek etxeetan hartuko dituzten inkesten bitartez, horiek herriko arlo ezberdinen inguruan dituzten iritziak jaso gura ditu udalak: “herritarrek pribatutasun eta anonimotasun bermea izan ditzaten”, diote udaletik. Inkestak jasotzeko, bestalde, Foruko Udalak hiru buzoi jarri ditu, honako lekuetan: udaletxean, Kultur Etxean eta Baldatikako Ludotekan. Horiek jasotzeko azken eguna martxoaren 2a izango dela jakinarazi dute. Gura duenak, udalaren webgunetik ere eskuratu ahalko du inkesta orria: www.forua.net. HAPO berria garatzeko diagnostiko parte hartzailearen baitan, martxoaren 14an, zapatuan, parte hartze tailer bat egingo dutela azaldu dute. Hala, udaletik herritarrak horretan parte hartzera deitu dituzte.