Cabezafuego y los Brutalesek eta Oskar Benasek joko dute Trinkete Antitxokoan
Trinkete Antitxokoak musika emanaldia hartuko du, bihar (urtarrilak 30), 21:30etik aurrera. Hain zuzen, Cabezafuego y los Brutales eta Oskar Benas izango dira taula gainean. Jaialdiaren barruan, Trinketeko zozketako zenbaki saridunen berri ere emango dute.
Iñigo Cabezafuego Iruñeako musikaria da. Jugos Lixiviados, Half Foot Outside… taldeetan aurretik ibilia bazen ere, Mermaid talde lisergikoarekin egin zen ezaguna Euskal Herriko rock eszenan. Gerora etorri ziren, bestalde, Basque Country Pharaons, Royal Canal, Bizardunak, Atom Rhumba, eta beste asko. Duela bizpahiru urte kantu propioak sortzen eta bakarka jotzen hasi zen. Duela gutxi diska bat kaleratu du. Camina conmigo dauka izena, eta orain hirukote formatuan lana aurkezten dihardu. Rocka, popa, folka, punkaeta umorea uztartzen ditu musikariak.
Oskar Benas, bestalde, Irungo (Gipuzkoa) musikaria da. Bartzelona (Herrialde Katalanak) izan du bizileku azken urte hauetan guztietan, baina une honetan Leonen (Espainia) bizi da. Musikaria izateaz gain, marrazkilaria eta diseinatzaile grafikoa ere bada gipuzkoarra. Maika Makovski musikariaren taldeko kide izateaz gain, bakarka ere aritzen da Oscar Benas.
Bestalde, hainbat musikarigaz ere parte hartu du, tartean Fermin Muguruzagaz. La Bemba Blanch, The Solanos, Ziza Teh eta Trainsalpine Boys taldeen sortzaileetako bat ere bada musikaria.
