Euskaraz bizitzeko nahia aldarrikatzeko, kalera
Berritasunekin etorri da aurten Bermeon egin den Euskaraz bizi nahi dut eguna. Xixili gimnastika taldekoek koreografia jarri zioten izen bera daraman abestiari eta jarduera horren inguruan «giro polita» sortu zela esan dute antolatzaileek.
Gaztetxoek ere, lehenengoz, ginkana batean parte hartzeko aukera izan zuten, herrian zehar, batetik bestera, Bermeoko esaera zaharrak osatzen ibili ziren.
Herriko txikienak ere lanean ibili ziren Lameran, marrazkiekin hormairudi bat osatu baitzuten. Mendi ibilaldian jende gutxiagok parte hartu bazuen ere, Lameran egindako lasterketan parte hartze handiagoa izan zela azaldu dute. Mendi ibilaldian, Bermeoko Sollube 707 mendi taldekoez gain, Mundakako eta Busturiko mendi taldekoek ere parte hartu zuten.
Egun horregaz, antolatzaileek euskararen aldeko kontzientziazioa bultzatzea dute helburu, eta asko izan ziren zapatuan kalera atera ziren herritarrak euskaraz bizitzeko nahia dutela aldarrikatzeko.
-
- Argazkilaria: Sollube 707
-
- Argazkilaria: Sollube 707
-
- Argazkilaria: Sollube 707
-
- Argazkilaria: Sollube 707
-
- Argazkilaria: Euskera Saila
