Ur isuri batek kalteak sortu ditu Pasealekuan
Seber Altube auditorioko eskola zaharretara –Gaztetxea zena– sartu dira lapurrak goizaldean, eta iturgintzako hainbat gauza apurtu eta eraman dituzte: iturriak, hodiak… Horrek ur isuri handia sortu duela esan du Gernika-Lumoko alkate Jose Mari Gorroñok, hainbat kalte sortuz. Eskola barruan ura pilatu da, eta behean dauden Pasealekuko arkupeetara ura erortzen hasi da.
Jubilatuek eta Elai-Alai dantzari taldeak erabiltzen duten lokalean ere kalte materialak sortu dira. Entseatzeko guneaz gain, erropak gordetzen dituzten tarteko solairura ere sartu da ura, eta armario batzuetara ere ura sartu da. Arropak handik atera behar izan dituztela esan dute Elai-Alaiko kideek.
Gorroñok esan legez, udaletxeko teknikariek txostena egingo dute orain.
