Hiru musika talde dakartza aurten Gabonak Rock Fest jaialdiak Bermeora
Aurreko urteetan legez, Gabonak Rock Fest jaialdia hartuko du aurten ere Bermeok, Kapilla Elkartearen eskutik. Bigarren urtez, Bermeoko Kafe Antzokian izango da, zapatuan.
21:00etan hasiko dute jaia Gabonak Rock Fest: Tribute Night izenburupean, eta ordutik aurrera, hiru talderen musikaz gozatzeko aukera izango da. Hain zuzen, Metalmania, Renegades eta Black Star taldeak izango dira taula gainean aurten. Zuzeneko emonaldi horien ostean, barriz, DJ Dataren rock-metal session saioa izango da.
Bertaratu nahi duenak aurretiaz zein lehiatilan erosi ahalko ditu sarrerak, 7 euro eta 10 euroren truke, hurrenez hurren. Aurretiaz erosi gura dituenak Bermeoko Kafe Antzokian, Irudi, Luma eta Zarata dendetan eta Katu tabernan ditu salgai eta baita Gernika-Lumoko Ospa tabernan ere. Horrez gain, www.kulturalive.com webgunean ere erosi ahalko ditu.
