250 ibiltarik parte hartu dute Artikako I. Mendi Martxan

Busturialdeko Hitza

Busturialdea

2013/10/30

Artike Bizirik auzo elkarteak antolatuta, hamalau kilometroko mendi martxa egin zuten domekan Bermeon. Artika auzoa ezagutzera ematea izanik asmoa, helburua ondo baino hobeto bete dute antolatzaileek, 250 pertsonak egin baitzuten antzinako hiltegitik Infrisa enpresarainoko ibilbidea. Lehenengoz antolatu dute Artikako Mendi Martxa, baina emaitza pozteko modukoa izan da. Izan ere, Imanol Rodriguez Artike Bizirik auzo elkarteko kideak azaldu duenez, “aurreikuspenak gainditu” dituzte. “Parte hartzaileak pozik gelditu ziren, eta baita antolatzaileok ere”. Hori dela eta, ez dute baztertzen datorren urtean martxa berriro antolatzea, betiere, ekonomikoki posible izanez gero.