Lizeo Antzokian aurkeztuko du Audiencek bere azken lana, uztailaren 6an

https://www.youtube.com/watch?v=2PT2d4AD1vg

Busturialdeko Hitza

Busturialdea

2013/06/25

Audience taldea. Argazkilaria: Zigor Etxebarria

Joan den astean Mistress Games lana aurkeztu zuen Bilbon Gernika-Lumoko Audience taldeak, eta orain, bere seigarren diskoaren edukina zuzenean entzuteko aukera emango du, uztailaren 6an Lizeo Antzokiko oholtza gainera igoko baita taldea.

Zazpi abesti bildu dituzte Gaizka Insunzak, Hannot Mintegiak, Ager Insunzak, Andoni Lauzirikak eta Mikel Sagarnak lan barrian. “Neurriz, lan ertaina izan arren, bere txikitasunean handi” azaldu da Audience, beste behin: “Eroso, handikerian txiki agertzetik urrundu nahian edo”. 2013ko martxoaren 28tik apirilaren 1era Andoaingo Garate estudioan grabatu eta nahastu dute, Kaki Arkarazoren gidaritzapean. Diskoko When I Rule The Word abestia, ostera, estudio berean nahastu bazuten be, 2013ko urtarrilaren 5ean Oiartzunen grabatu zuten, Mikel eta Igor Eceizagaz.

“Zerk bihurtzen ditu horren ezberdin binilo bat jartzea, sarean bideoz bideo aritzea edo kotxean irratia entzutea?”. Galdera horri erantzuteko, Audiencen lan barriak euskarrien inguruko joko bat proposatzen du; hala, 7’’tako biniloa, CDa eta udatik aurrera eskuragarri izango den abesti bat deskargatzeko kodea biltzen ditu Mistress Games bildumak.