Martxoan estreinatuko du ETB-1ek Txapela buruan saioa. 100 lagun baino gehiagoren artean aukeratutako lau gaztek hamabost eguneko Interrail bidaia egingo dute, eta haiek Europan barrena izandako esperientzia erakutsiko du saioak. Bertan parte hartuko du, beste hirugaz batera, Maitane Uriarte gernikarrak.
Zelan bururatu zitzaizun casting-era aurkeztea?
Gasteizen geundela, lagun baten nebak saioaren barri emon zigun sare sozialen bitartez, itzulpegintzako ikasleak izanik guretzako aproposa zela esanez. Hasieran txantxatzat hartu genuen, baina gero aurkeztea erabaki genuen. Azkenean, batzuk aurkeztu ginen eta beste batzuk ez, eta hala suertatu da.
Telebistan emongo dute saioa. Ez da hori oztopo izango zuretzat? Inoiz pentsatu izan al duzu halako bidaia batean parte hartuko zenuenik?
Noiz edo noiz Interraila egingo nuela banekien, baina ez telebistak grabatutakoa. Nik uste dut inoiz ez duela inork imajinatu bidaia hala egitea. Beharbada, Parisen geundela, noizbait txantxetan esan izan dugu Callejeros viajeros saiora deituko genuela, baina, halanda be, ez duzu imajinatzen.
100 lagun baino gehiagok parte hartu duzue casting-ean eta lau pertsona aukeratu dituzte, horien artean zu. Zergatik aukeratu zaituztela uste duzu?
Hasiera batean ez nuen jakin zer-nolako profila bilatzen zuten. Guk gauza bakarra geneukan buruan: Interrail bat egin beharko genuela, dena ordainduko zigutela eta esperientzia itzela izan zitekeela. Ez nuen jakin hizkuntza asko dakizkien pertsona bila zebiltzan ala ez, edo joko gehiago emon lezakeen pertsona bat gurago zuten… Bidaiatzeko gogoa daukan pertsona bat hautatu gura izan dutela ohartu naiz; aukera bat izan eta aprobetxatzen dakiena, alegia. Gainera, telebista oztopo bezala ikusiko ez duen pertsona bat be gura zuten.
Halakoa al zara zu?
Casting-ean aipatu bezala, ikasle izan zein ez izan, Interrail horiek asko balio dute; denbora atera behar da, gainera. Horregatik, telebistagaz zein telebista barik aukera aprobetxatu behar nuela iruditu zitzaidan.
Gaur abiatuko zarete Euskal Herritik. Zer egin beharko duzue bidaian zehar?
Ez dakigu zehatz-mehatz nondik nora ibiliko garen, guri be ez digutelako ezer zehatzik esan. Hartara, emozio gehiago izango dugu bidaian zehar. Hamabost eguneko bidaia lau zatitan banatu dute, eta parte hartzaile bakoitzari ibilbide bana bidali digute. Beraz, nik nire ibilbidea dakit, baina ez gainontzekoena. Azkenengo momentura arte guk be ez dugu jakingo nora goazen, eta hori izango da politena. Sare sozialen bidez adierazi dute zein leku bisitatzeko aukera izango dugun, baina soilik leku batzuk aipatu dituzte; esaterako, Suitza, Varsovia, Budapest, Berlin… Baina gehiagorik ez dakigu. Azken finean, gidari lana egin beharko dugu, eta leku bakoitzean dauden euskaldunekin harremanatean jarri beharko gara. Eurekin harremanetan jartzeko datuak eman dizkigute dagoeneko. Eurekin hitzordua jarri eta euren istorioa kontatu beharko digute.
Nolako bidaia izango dela uste duzu?
Uste dut nire biziko bidaiarik onenetarikoa izango dela. Erasmus ikasketak baino hobea izatea zaila dela deritzot; dena den, uste dut itzelezko esperientzia izango dela eta ez dudala inoiz ahaztuko. Tren bat hartuko dugu, eta ez dugu jakingo nora goazen; zuzenekoa izango da guztia. Gainera, aukera aprobetxatzeko gogo gehiago emoten dit gazte askok joan nahi izan dutela eta aukeratutako lauren artean ni nagoela jakiteak.
Erasmus proiektua aipatu duzu. Nolako esperientzia bizi izan zenuen?
Parisen egon nintzen ikasturte batez, eta esperientzia ikaragarria bizi izan nuen. Euskal Herrian bueltan izan nintzenean, aldaketa handia nabaritu nuen. Lehen arduratzen ninduten tontakeriek orain ez naute hainbeste arduratzen. Beste pentsamolde batekin bueltatu nintzen. Hasieran ez ninduten ulertzen eta gerora, ulertzen nindutenean, asko baloratzen nuen jendeagaz komunikatu ahal izatea. Momentu horretan, nituen muga guztiak guztiz apurtu nituen. Etxera bueltan, konturatu nintzen dena berdin egon arren, norbera aldatu dela.
Hainbat hizkuntza ikasten ari zara, ezta?
Ingelesagaz hasi nintzen. Gerora, frantsesari heldu nion ikastolan, unibertsitatean gehiago sakondu, eta ikasi Parisen egin nuen. Orain, ostera, italiera eta alemaniera ikasten hasi naiz.
Garrantzitsua izango da hizkuntzak menperatzea gaur abiatuko duzuen bidaia horretarako, ezta?
Nik uste dut batetik baino gehiagotik aterako nauela. Hizkuntza batek beti laguntzen du.
Hizkuntzak jakiteaz gain, komunikatzeko gaitasuna be izan beharko duzu, ezta?
Hori be hartu dute kontuan casting-ean jendea aukeratzeko orduan; izan be, lotsa puntu bat guztiok daukagu, baina momentu jakin batzuetan lotsa alde batera utzi beharra dago. Komunikatu beharra dagoenean, komunikatu egin behar da. Hizkuntza batean ez zarela komunikatzen? Ez dio axola, zeinu hizkuntzan bada be, lortuko duzu.
Heldu da eguna. Beldurrik?
Egia esan, ez dut inongo beldurrik. Inoiz baino seguruago noa bidaia batera. Beste hiru parte hartzaile jatorrekin noa, eta taldea be itzela da. Komunikatu behar bagara, lauron artean lortuko dugu.
Dagoeneko ezagutzen dituzu gainontzeko parte hartzaileak. Nolako hartu-emona izan duzue?
Hernanin batu ginen, eta oso ondo moldatu ginen. Hasieran oso lotsatuta egon ginen, baina ikusi genuen gure artean hainbat ezugarrik bat egiten dutela. Itzulpengintza ikasketak egiten zabiltza.
Nola moldatuko zara bidaia eta ikasketak uztartzeko?
Ikasketekin zer egingo nuen beldur nintzen; casting-era aurkezteko, buruan zalantza hori neukan. Baina, uste dut tutoretzatara joanda eta ondo antolatuta ez dudala arazorik izango.
Ingurukoek eta familiak zer esan dizute bidaiaz?
Hasieran eurak be beldur ziren, ez genekielako zein motako saioa izango zen. Jendeak ez zuen espero ni casting-era aurkeztea; izan be, momentuko erabakia izan zen. Bestela, oso pozik daude ingurukoak. Nire tokian jarrita, aukera paregabea dela badakite guztiek.
Azkenik, zein toki bisitatzea gustatuko litzaizuke?
Hasteko, Parisera bueltatzeak ilusio ikaragarria egingo lidake; Erasmusa pasatu eta gero be bueltatu nintzen eta beste hainbatetan bueltatuko nintzateke. Bestalde, inoiz ez naiz ibili, esaterako, Varsovia aldetik. Elur asko egiten duen lekuetatik ibiltzea be asko gustatuko litzaidake, Europa iparraldetik, esaterako.
