Koldo Carbonell Ajangizko alkateak atzo jakinarazi zuenez, “Eusko Jaurlaritzak, Bizkaiko Foru Aldundiak edo Finsa-Inamak ez dute inongo proiekturik aurkeztu enpresa Ajangizko eta Mendatako lurretan kokatzeko”. Ajangizko Udaletxean egindako agerraldian adierazi bezala, “herri bion arteko industrigunea denon ahotan ibili arren, Udalak ez dauka horren berririk”. Komunikabideen bitartez izan dute albistearen berri. Carbonellentzat, egoera ez da bidezkoa. Ajangizko udalaren autonomia errespetatu gabe horrelako proposamenak egitea, udalaren “erabaki eskumenaren aurka” doala uste du. Alkateak azaldu zuenez, “Ajangizko Udala, Hiria Antolatzeko Plan Orokorra (HAPO) lantzen ari da”. Plan horretan, halan da be, ez da industrigunea aurreikusten, inolako “proiekturik ez dagoelako”. Ildo horretatik, proiekturen bat aurkeztuz gero, seriotasun osoz aztertuko dutela esan zuen Carbonellek. “Eskualde honek, denon arteko elkarlana behar du irtenbideak bilatzeko ahaleginean eta Ajangizko Udala laguntzeko prest dago” esan zuen. Finsa-Inama Ajangizen kokatu ahal izateko, halan da be, udalak zenbait baldintza jarri zituen. Lehenengo, proiektua aurkeztu beharko dute eta “enpresaren ezaugarriak” zehaztasun osoz azaldu beharko dituzte arduradunek. Horrelako enpresa batek ingurumen eta osasun arloko legedia “zorroztasunez” bete behar duela argudiatzen du, emisioek bizilagunengan sor ditzaketen “kalteak garrantzitsuak” direlako. “Kezka handiz” bizi dute egoera Ajangizko Udalak “kezka handiz” bizi du Finsa-Inamaren egoera. 160 lanpostu zuzen eta zeharkako lanpostu asko “jokoan” daudela argudiatzen dute, baina [...]
Koldo Carbonell Ajangizko alkateak atzo jakinarazi zuenez, “Eusko Jaurlaritzak, Bizkaiko Foru Aldundiak edo Finsa-Inamak ez dute inongo proiekturik aurkeztu enpresa Ajangizko eta Mendatako lurretan kokatzeko”. Ajangizko Udaletxean egindako agerraldian adierazi bezala, “herri bion arteko industrigunea denon ahotan ibili arren, Udalak ez dauka horren berririk”. Komunikabideen bitartez izan dute albistearen berri.
Carbonellentzat, egoera ez da bidezkoa. Ajangizko udalaren autonomia errespetatu gabe horrelako proposamenak egitea, udalaren “erabaki eskumenaren aurka” doala uste du. Alkateak azaldu zuenez, “Ajangizko Udala, Hiria Antolatzeko Plan Orokorra (HAPO) lantzen ari da”. Plan horretan, halan da be, ez da industrigunea aurreikusten, inolako “proiekturik ez dagoelako”.
Ildo horretatik, proiekturen bat aurkeztuz gero, seriotasun osoz aztertuko dutela esan zuen Carbonellek. “Eskualde honek, denon arteko elkarlana behar du irtenbideak bilatzeko ahaleginean eta Ajangizko Udala laguntzeko prest dago” esan zuen.
Finsa-Inama Ajangizen kokatu ahal izateko, halan da be, udalak zenbait baldintza jarri zituen. Lehenengo, proiektua aurkeztu beharko dute eta “enpresaren ezaugarriak” zehaztasun osoz azaldu beharko dituzte arduradunek. Horrelako enpresa batek ingurumen eta osasun arloko legedia “zorroztasunez” bete behar duela argudiatzen du, emisioek bizilagunengan sor ditzaketen “kalteak garrantzitsuak” direlako.
“Kezka handiz” bizi dute egoera
Ajangizko Udalak “kezka handiz” bizi du Finsa-Inamaren egoera. 160 lanpostu zuzen eta zeharkako lanpostu asko “jokoan” daudela argudiatzen dute, baina inor ez da udalagaz harremanetan jarri.
Finsa-Inamaren egoeraz gain, Busturialdeko industriguneen egoera be “tamalgarria” da Ajangizko Udalaren ustetan. “Enpresa batzuk itxi egin dituzte, beste batzuk lekualdatu egin behar izan dituzte eta berton geratzen diren enpresa gehienak zailtasunak dituzte”.
Industriaren gainbeheragaz lotuta, langabezia tasak gora egin du eta arazo horri irtenbidea emoteko laguntza eskeini du Ajangizko Udalak. “Gazteek beste eskualde batzutara joan behar izaten dute lan bila, prekaritatea zabaltzen doa eta etorkizuna iluna da” adierazi zuen Carbonellek.
