Lurraldea zaintzeko bost erakunde diruz lagunduko ditu Ingurumen sailak
Eusko Jaurlaritzako Ingurumen sailak lurraldea zaintzeko bost erakunderen lana babestuko du. Euskal Autonomia Erkidegoan estrainekoz jarri du martxan Ingurumen sailak eredu hori, eta Urdaibain abiarazi du proiektu pilotua. Horren bitartez, lurraren jab...
Eusko Jaurlaritzako Ingurumen sailak lurraldea zaintzeko bost erakunderen lana babestuko du. Euskal Autonomia Erkidegoan estrainekoz jarri du martxan Ingurumen sailak eredu hori, eta Urdaibain abiarazi du proiektu pilotua. Horren bitartez, lurraren jabeek eta irabazasmorik gabeko erakundeek akordioa sinatu dute, lurraldea zaintzeko.
Gaur egin dute Udetxean proiektu pilotu horren emaitzen aurkezpena, eta aurten lurraldea zaintzeko bost erakunderen lana laguntzea onartu du bulego teknikoak. Bost horiek diru laguntzak jasoko dituzte, “aurkeztutako aurrekontuaren %70a, kasu gehienetan”, bulegoko arduradunek zehaztu dutenez. Laguntza horiek bihar egingo dituzte publiko. “Onartuta dagoen une horretan diru laguntzaren %60a hartuko dute entitateek, eta falta den %40a jarduerak amaitutakoan; hau da, bulego teknikoko arduradunek lanaren emaitzak aztertu ostean”.
Basoa Fundazioa, Aranzadi Zientzia elkartea, Busturiko Udala, Euskal Espeleologoen elkargoa eta Urdaibai Fundazioa dira, lurjabe pribatuekin batera, Urdaibaiko lurraldea zaintzeko eta babesteko konpromisoa hartu dutenak. Denen artean, guztira, hamabost proiektu garatuko dituzte: Ereñon, Muxikan, Busturian, Gautegiz Arteagan, Foruan eta Bermeon.
Horiek guztiak finantzatzeko 180.000 auroko aurrekontua du Eusko Jaurlaritzako Biodibertsitate eta Ingurumen Partaidetzarako departamentuak. Hango zuzendari German Alonsok azaldu duenez, “aurrekontua eskas geratu zaigu, eta datorren urterako 330.000 euroko aurrekontuagaz egingo dugu deialdia”.
