Larruzko Paletako Bizkaiko I Txapelketa hasi du Olatz Arrizabalaga gernikarrak
Asteburuan hasi da jokoan Bizkaiko Foru Aldundiak antolatutako Andrazkoen larru-paletako I. Bizkaia Torneoa. 12 pilotarik parte hartuko dute, 6 bikotek, eta euren artean egongo dira Olatz Arrizabalaga gernikarra eta Leire Etxaniz etxebarritarra, bikotean.
Zapatuan [abenduak 8] hasi zuten norgehiagoka Etxanizek eta Arrizabalagak. Bi partida jokatu ziren Arrizabalaga-Etxaniz eta Araiztegi-Mendizabalen artekoa alde batetik, eta Irazustabarrena-Huici eta Larrarte-Erasunen artekoa, bestetik. Hauek bezala, torneoko zazpi partidak Bizkaia Frontoian jokatuko dira.
Ez dute txapelketa ondo hasi Arrizabalagak eta Etxanizek. 8 tantoko hiru set jokatu zituzten eta 8-4, 8-6 eta 8-1 galdu zituzten hirurak. Datorren zapatuan [abenduak 15] edukiko dute bigarren aukera, 11:00etatik aurrera jokatuko den torneoaren bigarren jardunaldian. Bi partida egongo dira: Ibañez-Laura Saez eta Arrizabalaga-Etxaniz bikoteen artekoa, eta Nagore-Maria Saez eta Larrarte-Erasun bikoteen artekoa. Horretarako prestatuago joateko ahalegina egingo dutela adierazi dute Etxebarriko eta Gernika-Lumoko palistek.
Hirugarren jardunaldia abenduaren 22an izango da. Azken horretan Ibañez-Laura Saez eta Araiztegi-Mendizabal bikoteak eta Irazustabarrena-Huici eta Nagore- Maria Saez bikoteak neurtuko dira. Finala, berriz, abenduaren 29an izango da, Bizkaia Frontoian.
Andrazkoen esku-pilotako I. Bizkaia torneoan egin zen bezala, larru-paletakoan parte hartzeko ere kiroletako lan-kontratua izango dute pilotariek, lehenengoz. “Torneo honekin Bizkaiko Foru Aldundiak emakumeek kirolean izan duten presentzia eta ibilbidea bultzatu gura du, eta agerian jarri”, azaldu dute.
Andrazkoan larru paletako I. Bizkaia Torneoko parte hartzaileak Lorea Bilbao Euskara eta Kulturako foru diputatuagaz. Argazkia: Bizkaiko Foru Aldundia
