Dena prest dago Ispasterren, herritarrak erabakitzen hasteko
Gure Esku Dagok herri galdeketa egingo du domekan, Ispasterren. Era berean, asteburuan Adierazpen Egunak ospatuko dituzte bertoko zenbait udalerritanHiru egun barru 591 ispastertarrek erabakitzeko eskubidearen bidean beste pauso bat emango dute. Geuk e...
Gure Esku Dagok herri galdeketa egingo du domekan, Ispasterren. Era berean, asteburuan Adierazpen Egunak ospatuko dituzte bertoko zenbait udalerritan
Hiru egun barru 591 ispastertarrek erabakitzeko eskubidearen bidean beste pauso bat emango dute. Geuk erabaki lelopean, Gure Esku Dagok herri galdeketa egingo du, eta domekan dena ondo irteteko azken lanetan dabiltza egunotan Ispasterko Gure Esku Dagoko kideak.Kanpoko frontoian karpak jarriko dituzte, eta botoa ematera doazen herritarrek bertan izango dituzte hautestontziak. Nahi al duzu Euskal Estatu burujabe bateko herritarra izan? Galdera horri erantzun beharko diote. 09:00etatik 20:00ak arte egongo da botoa emateko aukera.
Goizean goizetik, egun berezia dela igarriko dute herrian. 09:00etan txistularien eta txalapartarien doinuek esnatuko dute Ispaster. Izan ere, jai eguna izatea nahi dute Gure Esku Dagoko kideek, eta goizetik gauera arte jai giroa izango da nagusi.
«Dena dugu prest. Azken egunotan domekako ekintzak prestatzen aritu gara, txosnako txandak lotzen…», azaldu dute Ispasterko Gure Esku Dagoko kideek.
Ekitaldiez gain, egun guztian musikak girotuko du herria, eta eguerdian pintxoak eta okela errea dastatzeko aukera egongo da. Herritarren arteko herri kirol dema ere egingo dute plazan. Hiru taldetan banatuko dira; 30 urte artekoak, 30-45 urte artekoak, eta 45 urtetik gorakoak.
Arratsaldean, umeentzako tailerrak eta puzgarriak jarriko dituzte plazan, eta bolo txapelketan eta igelaren jokoan ere dibertitzeko aukera edukiko dute.
«Domekako ekitaldiak prestatzeko laguntza handia izan dugu. Egongo den guztia jendea bere borondatez laguntzen dabilelako da. Alde horretatik oso pozik gaude; jendearen partaidetzagaz pozik gaude».
Ispasterren zein Euskal Herriko beste herri batzuetan galdeketak behar bezala gauzatzen direla bermatzeko begiraleak egongo dira. «Herriz herri ibiliko dira, beraz, ez dakigu zein ordutan etorriko diren gurera». Gure Esku Dago nazionaleko eta Jarraipen Batzordeko ordezkari bana ere Ispasterren egongo dira.
Azken hilabetean ekitaldi ugari egin dituzte E5era begira. Geuk erabaki kanta sortu eta lip dup-a grabatu dituzte, giza katea egin dute, auzoz auzo, etxez etxe informazioa zabal azaldu dute…
«Aurreko asteburuan berriro hurbildu ginen bizilagunengana. Parte hartzera animatzeagaz batera, etxez etxe botoa emateko zer behar duten azaldu genien». 16 urtetik gorakoa izatea eta Ispasterren erroldatuta egotea dira parte hartzeko baldintza bakarrak. «NANean Ispaster jartzen ez badu, erroldatze-ziurtagiria aurkeztu beharko dute».
Gaur domekako egitaraua banatuko dute etxerik etxe. Auto karabanan joango dira musikagaz lagunduta, auzorik auzo giroa berotzen hasteko. «Batez ere jendeak parte hartzea azpimarratu nahi dugu, ahalik-eta jende gehienak botoa ematea. Jendea animatu dadila, guk ere badugula zeresan erakusteko. Gure eguna izango da; gozatu egin behar dugu, eta gure iritzia eman».
Domekan Ispasterrera bertaratzerik ez dutenek sare sozialen bitartez jaso ahalko dute hango berri, Facebook-en (Gure Esku Dago Ispaster) eta Twitter-en (@Gureskuispaster).
Adierazpen egunak
Era berean, domekan Gure Esku Dagoren ekitaldiak burutuko dituzte Busturian, Gernika-Lumon, Mendexan, Lekeition eta Etxebarrian. Gernika-Lumon izan ezik besteetan adierazpenak prest dituzte, eta herritarren aurrean aurkeztuko dituzte.
Gernika-Lumon talde txikietan batuko dira Merkurion, eta denen artean hausnarketa egingo dute, gero adierazpena osatzeko asmoz. Gainera, Gernika-Lumo erabakitzeko eskubidearen alde dagoela ikusarazteko, bideo bat plazaratu dute.
Halaber, Adierazpen Egunak ospatuko dituzte zapatuan, Aulestin, Markina-Xemeinen, Mutrikun eta Ondarroan. Elkarte eta eragile ezberdinen eta herritarren parte hartzeagaz adostu dituzte adierazpenak.
Harmailaz harmaila, erabakitzera! lelopean batuko dira aulestiarrak, eta Santa Eufemiarako harmailetan jarriko dira erabakitzeko eskubidearen aldarri- kapena egiteko. Bestalde, GED-ko kideek erabakitze eskubidearen aldeko argazkia ateratzeko dei egin diete herritarrei, kaleko panelean ipintzeko. Argazkiak WhatsApp bidez 676 72 40 60 telefonora bidali behar dira, eta GEDkoek inprimatu eta panelean jarriko dituzte.
Ondarroan ere prest dute adierazpena, eta Gure Esku Dagoko kideen asmoa bertaratzen dena dantzan eta kantuan jartzea da. Horrez gain, Gure Esku Dagoko logoak margotzeko aukera izango dute haurrek, eta horiek, ostean, sare batean eskegiko dituzte.
Busturian, Altamirako plazan batu, eta Mape errekatik sei kilometroko ibilbidea eginez hasiko dute eguna, herriko mendi taldearen eskutik.
Gero, 12:30ean egingo dute adierazpena herriratzeko jaia, Altamirako plazan. Busturiko txirrindulari taldekoek jokoak egingo dituzte, Irrintzi Alai dantza taldekoek erakustaldia, eta Matxinada taldekoek pintxoak prestatuko dituzte. Hautetsontzi handi bat irudikatu dute prest dituzten oihalekin, eta hautetsontzi txiki bat ere ibiliko da herritarren eskutik eskura.
Ekitaldiaren amaieran, Julen Kalzadak irakurriko du busturiarrek landutako adierazpena, eta pankarta handi batean denen bistara jarriko dute.
