Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

NA eta pasaportea berritzeko aukera eskainiko dute

Busturialdeko Hitza — 2026-05-13 10:00:19

Foruko eta Busturiko bizilagunek Nortasun Agiria eta pasaportea beraien udalerrian bertan berritzeko aukera izango dute ekainean. Polizia Nazionalaren bulego mugikorrak bi udalerriak bisitatuko dute, bertan erroldatutakoei izapidea errazteko helburuagaz.

Ekainaren 23an [martitzena] egongo da bulego mugikorra Foruan, udaletxe ondoan, 09:00etatik 14:00etara bitartean. Edozein foruarrek berriztu ahalko ditu agiriak, beti ere aurretik hitzordua hartuta badu; horretarako, ekainaren 19a [barikua] baino lehen 96-625 51 80 telefono zenbakira deitu beharko da.

Busturiarrek, bestalde, ekainaren 25erako [eguena] dute ipinita hitzordua. Bulego mugikorra Axpen kokatuko dute, udaletxe ondoan, 09:00etatik 13:00etara; izena emateko udaletxera deitu beharko da —94-687 00 50—, ekainaren 15a [astelehena] baino lehen.

Agiriak berritu gura duten herritarrek argazki eguneratua eta agiri zaharra eraman beharko dituzte hitzordura. Ordainketari dagokionez, soilik eskudiruz ordaindu ahalko da: NA berritzearen kostua 12 eurokoa eta pasaportea berritzearena, berriz, 30 eurokoa.

Unax Bilbaoren kartelak iragarriko ditu jaiak

Busturialdeko Hitza — 2026-05-13 09:00:27

Busturiko jaiek badute azal berria. Unax Bilbao da aurten San Antonioko, San Kristobaleko, Axpeko, Altamirako, Paresiko, Altamirako eta San Bartolomeko jaiak iragarriko dituen kartelaren egilea.

Kartel lehiaketara aurkeztu diren proposamenen artean gailendu da Bilbaorena, eta egileak 400 euroko saria jasoko du. Epaimahaia Nagore Lartitegik, Alazne Bilbaok eta Rosa Mari Gabantxok osatu dute, eta Aitor Aretxaga Busturiko alkateak hiru emakumeek egindako lana eskertudie. Horrez gain, irabazlea zoriondu eta beraien proposamenak aurkeztu dituzten parte hartzaile guztiei ere eskerrak eman dizkie.

Naturari etikotasunaren bisoretik begiratuz

Busturialdeko Hitza — 2026-05-08 13:37:47

Smartphonea eskuan, edonor sentitzen da argazkilari gaur egun. Benetako argazkilariek, baina, begia bisore optikoan jarri aurretik dute argazkia buruan; argazkiaren bila doaz. Bigarren multzo horretakoak dira Alemaniako Natura Argazkilarien Elkarteak antolatzen duen Wildlife Photographer of The Year lehiaketan parte hartzen duten profesionalak.

Oinarrietan argi islatuta agertzen da argazkilariari eskatzen zaiona: natura “modu sortzaile, zaindu eta etikoan” islatzea. “Naturaren errelitatea” da, hain zuzen ere, Ekoetxea Urdabain ikusgai dagoen erakusketa bisitatzera doazenek ikusi ahal izango dutena. Wildlife Photographer of the Year 2025 erakusketak iaz saritu zituzten lanetako batzuk bildu ditu.

Animaliak, paisaiak… Argazkilarien esku dago fokua non ipini. Edonola ere, “balio etikodun” bilduma osatu asmoz, lehiaketaren sustatzaileek ez dute gatibu, disekatuta edota edozein irabazi asmogaz ustiatzen diren animalien argazkirik onartzen. Per Gätzschmannen Kastoreak udaberrian argazkia da horren adibide: “Europako kastore bikote baten portaera soziala ikusi nuen. Sarritan besarkatzen zuten elkar, eta atzamarrekin leunki apaintzen ziren”.

Paisaien aldaketak betirako dokumentatuta geratzea bilatzen dute beste argazkilari batzuek, adibidez, Zoltan Gergerlyk, Bukaresteko bihotz berdea argazkiagaz. Bukaresteko parke natural baten argazkia da, “babesleku berde” bihurtutakoa. Argazkilariak bere ikuskera azaldu du erakusketan: “Parkeak hiriaren bihotz berdea marrazten du eta hori naturaren erresilientziaren eta rewildingak hiri inguruetan duen ahalmen eraldatzailearen sinbolo indartsua da”.

Hala, goi-mailako argazkilaritzaz gozatzeaz gain, erakusketak toki eta animalia espezien xehetasunak ezagutzeko aukera izango du, baita norberak bisorea non jartzen duenaz hausnartzeko ere

Inurri txikien jaia, ederra bezain aberatsa

Busturialdeko Hitza — 2026-05-07 15:50:35

“Iñurrien antzera pauso txikiz aurrera, amestera”, dio ETS musikaren abesti ezagunak, eta txikitasunetik amestea zer den ondo baino hobeto dakite eskola txikiek. Iñurri lana egiten dute egunez egun, eta emaitza oparoak lortzeko gai direla erakusten dute. Gaur [maiatzak 7], inurri horien topaleku izan da Gautegiz Arteaga: XIX. Busturialdeko Eskola Txikien Jaia ospatu dute.

Gautegiz-Arteagako Montorre Eskolak antolatu du aurtengo hitzordua, eta Urretxindorra (Muxika), Uzelai (Busturia), Mundaka eta Haizeder (Ea-Elantxobe-Ibarrangelu) eskolako lagunekin giro ederrean elkartu ziren. Gutxi gora behera 500 ikasle inguru bat egin dute jaian, baina irakasle, guraso eta laguntzaileekin ia 800 lagun elkartu dira.

10:15ean Montorre Eskolakoen harreragaz hasi dute jaialdia, herriko plazan, eta jarraian, horiek bertsoak eta koplak abestu dituzte, eta elkarrekin talde argazkia atera dute. Ondoren, dantza entseguak egin, eta 11:30ean hasi dute dantza ikuskizuna.

Betiko moduan, adin tarteetan banatuta egin dute dantzan. 2-3 urte bitarteko umeek Kilimak abestiaren erritmora dantzatu dute, eta 4-5 urte bitartekoek Ene Kantak-en Ikasle berri bat abestiarenera. Gero, Lehen Hezkuntzakoak atera dira plazaren erdira. Lehenengo ziklokoek The Uski’s eskualdeko taldearen Horrelako aukeratu dute euren koreografia eskaintzeko, bigarren ziklokoek Goazenen Dantza dezagun hil arte eta hirugarren ziklokoek Duplaren Ongi etorri.

Gero, berriz, jolasetarako eta tailerretarako tartea hartu dute, txokotan banatuta; batzuk herriko plazan elkartu dira, eta beste batzuk, ostera, parkean.

13:15ean elkarrekin bazkaldu ostean, 15:30ean agurtzeko ordua heldu zaie. Amaierako ekitaldia bertsoekin eta biribilketan elkartuta girotu dute, eta Gautegiz Arteagakoek Muxikakoei pasatu diete lekukoa; izan ere, datorren urtean Urretxindorra Herri Eskolan elkartuko dira euren jai handia ospatzeko.

Herritarren zientziak eta komunitatearen parte-hartzeak hegazti migratzaileen kontserbazioan duten garrantzia azpimarratuko dute asteburuan

Busturialdeko Hitza — 2026-05-06 06:43:12

Hegazti bakoitzak balio du – Zure behaketek garrantzia dute! lelopean dator aurtengo Hegazti Migratzaileen Mundu Eguna, eta beste urte batez, Gautegiz Arteagako Urdaibai Bird Centerrek eta Busturiko Ekoetxea Urdaibaik egun horregaz bat eginez, eskaintza berezia prestatu dute domekarako (maiatzak 10).

Urdaibai Bird Centerren zentroko sarrera doakoa izango da 10:00etatik 18:00etara bitartean, eta hegaztien eraztunketa zientifikoaren erakustaldia egingo dute, 10:00etatik 12:00etara. Parte hartzeko, ez da aldez aurretik izena eman behar.

Aurten, hegaztiak ez ezik, haiek babesteko jende askok egiten duen “ahalegin handia” ere ospatu nahi dute, leloak herritarren zientziak eta komunitatearen parte-hartzeak hegazti migratzaileen kontserbazioan duten garrantzia azpimarratzen baitu.

Horregatik, Urdaibai Eraztuntze Taldeak hegaztien eraztunketa zientifikoaren arloan egiten duen “lan garrantzitsua” nabarmendu dute Urdaibai Bird Centerreko arduradunek. Eraztuntzaile adituek eta prestakuntzan dauden kideek osatutako talde horrek 2002an ekin zion lanari, eta hegaztien populazioei buruzko datu “baliotsuak” biltzen ditu etengabeko lanean: “Eraztunketa-saioan, bisitariek haien lan eskerga gertutik ezagutzeko aukera izango dute. Hegazti migratzaileek jasaten dituzten mehatxuei eta haien habitatak babesteko beharrari buruzko kontzientzia zabaltzeko gurekin bat egiteko eskatu nahi diegu bisitariei”. Era berean, hegazti migratzaileak babesteko mezua igorri dute, “hegazti bakoitzak balio duelako, eta behaketa bakoitzak berebiziko garrantzia duelako”.

Bestalde, Hegaztien behaketa paduran irteera prestatu dute Ekoetxea Urdaibain. Domekan, 10:30etik 13:30era bitartean ibiliko dira San Kristobal auzoko paduretan barrena. Parte hartu gura dutenek aurretiaz izena eman behar dute ekoetxea.eus webgunean, eta 2 euro ordaindu behar dira. Arduradunen berbetan, ekosistema horren aberastasuna eta bertan bizi diren hegaztiak ezagutzeko “aukera paregabea” izango da; izan ere, ibilbidean zehar, parte-hartzaileek bertatik bertara ezagutuko dute migrazio-ibilbideek eta naturgune horien kontserbazioak daukaten garrantzia: “Esperientzia irisgarria eta hezitzailea da, naturarekin bete-betean bat eginik. Publiko guztientzat pentsatutako esperientzia da, eta naturarekin ikastera, behatzera eta konektatzera gonbidatzen du, edertasun handiko leku batean”.

Langile espezializatuek azalpen “irisgarriak eta aberasgarriak” emango dituzte, eta ingurune naturalarekiko errespetuzko begirada “kontzientea” sustatuko dute. Parte hartzen dutenek ingurune natural pribilegiatu horretan barneratuta, paduraren errealitatea, biodibertsitatea eta kontserbazioaren garrantzia gertutik ezagutuko dituzte: “Ibilbidean zehar, pasabide, atsedenleku edo habia egiteko gune hori erabiltzen duten hainbat hegazti espezie ikusiko ditugu, migrazio-ibilbideek oreka ekologikoan daukaten funtsezko zeregina ulertuz”.

Busturiko jaiak iragarriko dituen kartelaren bila dabiltza

Busturialdeko Hitza — 2026-05-04 12:48:27

Busturiko Jai Batzordeak aurtengo jaiak iragarriko dituen kartela aukeratzeko lehiaketa antolatu du, eta interesdunek barikuko [maiatzak 8] 20:00ak arte dute parte hartzeko aukera. Lanak Altamirako Kultur Etxean aurkeztu beharko dira, 09:00etatik 11:30era edota 16:00etatik 20:00etara arteko ordutegian.

Parte hartzaile bakoitzak gehienez bi lan aurkeztu ahal izango ditu, bere gustuko gaia eta teknikak jarraitute. Proposamenak DIN A2 formatuan aurkeztu beharko dira, euskarri zurrunean, eta autorearen sinadurarik barik. Kartazal itxian entregatzeko eskatu dute, gainean lanari izena emango dion leloa ipinita; barruan, berriz, egilearen curriculum laburra, telefono zenbakia eta NAren kopia sartu beharko dira.

Kartel irabazlearen egileak 400 euroko saria jasoko du eta Busturiko Udalak eta jai batzordeak osatutako epaimahaiak izango du irabazlea aukeratzeko ardura. Jakinarazi dutenez, epaia “apelaezina” izango da. Edonola ere, epaimahaikideek kartelek “behar besteko kalitate teknikorik ez duela” erabakiz gero, lehiaketa sari gabe geratu daiteke. Kasu horretan, epaimahaiak beste artista bati eskatu diezaioke kartela egitea. Argitu dutenez, “zalantzazko autoretza” duten lanak, pertsonen duintasunaren kontra doazenak edota plagio direla uste diren lanak “edozein unetan” lehiaketatik kanpo utzi ahal izango dituzte.

Irabazlea izendatuta, kartela udalaren jabetzakoa izatera igaroko da, ontzat emango baita egileak kartela ustiatzeko eskubideak udalari laga dizkiola, erreprodukzio, banaketa eta komunikazio publikoen modalitatean. Horrez gain, kartelak inprimatzeko orduan, beharrezko burutzapen teknikoen edo tonalitateetan aldaketa egiteko baimena izango du udalak, aurretik egilearekin kontsultatuta eta haren lankidetzarekin.

Lehiaketara aurkeztu eta sarituak izan diren lan orijinalak, berriz, uztailaren 31ra bitartean jaso ahal izango dituzte egileek, 09:00etatik 14:00etara arteko ordutegian. Data hori igarota, udalak “askatasun osoz” erabili ahal izango ditu autoreek batu ez dituzten kartelak: “Udalak ez da izango ekarritao materialek garraio, manipulazio, gordeketa edo antzekoren baten ondorioz jasan ditzaketen kalteen erantzule”, nabarmendu dute.

Busturia Ur-Zelai Futbol Kluba, bigarren mailara

Busturialdeko Hitza — 2026-04-23 14:17:56

Busturia Ur-Zelai Futbol Kluba erregional kategoriako bigarren mailako taldea da. Hirugarren mailan beraien onena emanda, maila igoera lortu dute busturiarrek eta zaleen berotasunean ospatu zuten zapatuan [apirilak 18], Itxas-Adarren. Busturiko Udalak bat egin zuen ospakizunekin, eta publikoki aitortu gura izan ditu udalerriko futbol taldearen lorpenak, kirolaren benetako balioak emaitzak gainditen dituela erakutsi dutelako: “Udalak publikoki aitortu nahi du taldea, bere dedikazioagtik eta gure herriaren balioak harrotasunez ordezkatzeagatik”.

Gune nagusiak kirol eliteetan zentratzen diren testuinguru batean, Aitor Aretxaga Busturiko alkateak Ur-Zelaiko jokalarien “ahalegina, konstantzia eta konpromisoa aitortu” nahi izan ditu, baita zuzendaritzaren kudeaketa eta “dedikazio lan bikaina” ere: “Zuen lana harro egoteko modukoa da udalerri osoarentzat, kirol arrakastagatik eta laguntasuna, mugak gainditzea eta herrian sustraitzea sustatzen dituelako, eta aldi berean, gure gizarte eta eta kirol ehuna indartzen dituelako”.

Herritarrekin ospatu zuten igoera zapatuanBermeoko Udala

Futbolarekiko pasioa ikasketekin, lanagaz eta bestelako erantzukizunekin uztartzen duten jokalariek osatzen dute “baliabide mugatuak” dituen Busturia Ur-Zelai Futbol Kluba; edonola ere, “berezko zailtasunei aurre” egiteko gai izan direla nabarmendu du Busturiko Udalak: “Taldearen ibilbidea etengabeko ahaleginaren, diziplinaren eta ilusioaren isla garbia da”.

Berdegunean lortutako emaitzez haratago, futbol taldeak Busturiako “lotura sozialak indartu” ditu, Itxas-Adar herritarren topagune bihurtu baita. Partida bakoitza kolektiboki partekatzeko, laguntzeko eta ospatzeko aukera gisa bizi izan dute: “Busturiaren ezaugarri diren kidetasun eta kohesio soziala indartu dira”.

Busturialdea margolari baten ikuspuntutik ezagutuz

Busturialdeko Hitza — 2026-04-21 14:25:19

Eskualdea inspirazio iturri nagusi duelarik, 300 margolan inguru egin ditu Rosa Mari Gabantxo margolari bermeotarrak bere ibilbidean zehar. Margoztea eta artelanak sortzea du pasio, eta berarentzat egiten duen lana bada ere, bere mundu artistikoko atea zabaltzen die maiz Busturialdeko herritarrei, han eta hemen erakusketak eginda. Aurten Busturian antolatu du erakusketa, eta apirilaren 30a [eguena] bitartean bisitatu daiteke, kultur etxean, astelehenetik barikura, 09:00etatik 11:00etara eta 16:00etatik 20:30era arteko ordutegian.

Erakusketara bertaratzen direnek Urdaibain zehar bidaiatzeko aukera izango dute, erakusketa osatzen duten 43 margolanetan zehar Busturiako, Gernika-Lumoko, Mundakako, Sukarrietako, Muruetako edo Bermeoko bazterrak Gabantxoren begirada artistikotik ikusi ahal izango baitira. Horrez gain, Euskal Herriko beste hainbat txoko ere margolan bihurtu ditu margolariak, Bilboko Guggenheim museoa edota Donostiako Eduardo Txillidaren Haizearen Orrazia eskultura, kasu. Gabantxok Benito Barruetaren omenez egindako lana ere ikusgai dago Busturiko Kultur Etxean.

Barrueta Arte Elkarteko kidea da Gabantxo, eta urteetan zehar margotzeko hamaika teknika garatu ditu, horietako asko Busturian ikusgai dauden lanetan antzeman daitezkeenak: arkatza paperean, akuarela likidoa, collage akrilikoa, akrilikoa oihalean, paperean zein erliebean, akuarela, hiru dimentsiotako erliebea… Teknika horiek margolan bihurtzeko prozesuan, atzera eta aurrera ibili ohi da Gabantxo: “Normalean argazki bat hartzen dut oinarri, baina nik ikusten dut zer eta ze ikuspuntugaz margotuko dudan, sarri lekura bertara joanda”.

Busturian ikusgai dauden lanak urte ezberdinetan egindakoak badira ere, oro har Gabantxok azken sei urteetan landu ditu: “Danetarik dago, azkenaldian margotu ditudan batzuk, eta estimuan ditudan beste batzuk. 2020an erakusketa egin nuen hemen, eta pandemia etorri zenez berton gelditu zen. Lan hauek ordutik aurrera egindakoak dira”.

Bere artelanak ikustera hurbiltzen diren herritarrengandik jasotako feedbackarekin pozik dago bermeotarra: “Erakusketa gustatzen zaie, eta askok goizeko argia nola islatzen dudan nabarmentzen dute”. Ikusleekin harreman berezia sortzen ahalegintzen da Gabantxo, eta horregatik, erakusketetara bertaratzen direnen artean bere artelaneako bat zozkatzen du: “Erakusketa zer iruditu zaien eta beraien margolan gustukoena zein den adierazi behar dute, beraien telefono zenbakia jarri eta zozketan parte hartu”. Zozketan sarituak ez direnek ere, egilearekin harremanetan jarri eta margolanak erosteko aukera ere badute.

Emakumeen ahotsa aktibatzeko galdetegia zabaldu du udalak

Busturialdeko Hitza — 2026-04-20 13:16:40

Udalerrian emakumeen espazioak indartu eta eta horiei zuzendutako ekimenak elkarlanean antolatzeko helburuagaz, Busturiko Udalak herriko emakumeen interesak, beharrak eta parte hartzeko aukerak ezagutzeko galdetegia zabaldu du.

Internet bidez —karteletan jarritako QRaren bitartez— erantzun daitekeen galdetegiarekin Busturiko emakumeen parte hartze aktiboa sustatu gura dutela jakinarazi dute udaletik, baita “ahalduntze kolektiboa indartu” ere. Horretarako, belaunaldi ezberdinen arteko elkarrizketa eta elkarlana bultzatu eta emakumeentzako “espazio propio eta autonomoak” sortuko dituzte.

Prozesu horretan herriko emakumeen iritzia jasotzea “funtsezkoa” dela aldarrikatu dute udaletik, eta emakumeen espazioan indartzen laguntzeko eskaera luzatu die emakume busturiarrei. Izan ere, jasotako erantzunekin “emakume helduen taldea” sendotu gura dute, baita gazteentzako espazio berriak sortu ere. Bien bateragune izango diren belaunaldi ezberdinen arteko topaketak ere bultzatuko dituztela adierazi dute: “Proiektu hau emakumeen esku egotea eta denboran iraunkorra izatea lortuko dugu”.

"Busturiak ez du bere historia ahaztu"

Busturialdeko Hitza — 2026-04-13 15:44:37

Anjel Lekuona busturiarra omendu dute gaur [apirilak 13] Altamirako plazan, bere omenezko totemaren ondoan. 1945eko apirilaren 9an fusilatu zuten Lekuona, Hradištkoko (Txekiar Errepublika) Hirugarren Reich-eko kontzentrazio esparruan preso zegoela, 36ko gerraren ondorioz Frantzian erbesteratuta egon, eta bertatik deportatu ondoren. Omenaldian Busturiko Udaleko ordezkariek, Anton Gandarias Lekuonaren ilobak eta Jose Maria Uzelai ikastetxeko ikasleek parte hartu dute. Ikasleek lora eskaintza egin dute totemaren aurrean.

Totemaren aurrean agurra dantzatuta hasi dute ekitaldia. Segituan Gandariasek hartu du hitza, herriko ikastetxeko ikasleei Lekuona nor izan zen eta Busturiko herriak busturiarra omentzeko egindakoak azaltzeko. “Bere historia gogoratzen ez duten herriak hura errepikatzera kondenatuta daude”. Auschwitz- Birkenau kontzentrazio esparruan irakurri daitekeen George Santayana filosofo madrildarraren esaldi ospetsuarekin hasi du bere berbaldia Lekuonaren ilobak: “Busturiak esaldi hori bete du; Busturiak ez du bere historia ahaztu“.

Apraiz baserrian jaio zen Lekuona, omenaldia jaso duen plazatik gertu. 1937ko apirilaren 26an Gernika bonbardatu zutela gogoratu du Gandariasek, Busturiako zeruan hegazkinen joan-etorria etenik gabekoa izan zela zehaztuta: “Egun gutxira faxistak Busturian sartu eta hainbat lagun atxilotu zituzten. Horietako sei Derioko hilerrian fusilatu zituzten, abuztuaren 5ean”. Lekuonak Frantziara ihes egin zuen eta bertatik Kataluniara sartu zen, “faxisten aurka borrokatzeko”. 1939an baina, Katalunia faxisten esku erortzeagaz batera, Frantziara ihes egin zuen berriz, 500.000 lagunekin batera. Frantzian egon zen lanean, 1943an, erresistentziarentzat lanean ari zela egotzita Gestapok Pirinioetan atxilotu zuen arte.

Buchennwaldeko (Alemania) kontzentrazio esparrura eraman zuten Lekuona lehenengo, eta, Flossenbürgera (Alemania), gero. Bigarren kontzentrazio esparruaren adarretako bat zen Hradistkoko esparruan eman zituen bere azken egunak busturiarrak, bertan erail baitzuten 1945eko apirilaren 9an. Hamar egun beranduago, Lekuonaren gorpua Pragako Erraustegi Zibilera eraman zuten, Frantisek Suchy erraustegiko arduradunari gorpuak erre eta errautsak konpostera botatzeko agindua emanez: “Suchy jaunak ez zuen nazien agindua bete. Errautsak kutxetan gordetzen zituen, eta horregatik dakigu 2.200 lagunen errautsak eskutatu zituela. Errauts batzuk gordetzen zituen bakoitzean bere bizitza eta bere familiarena arriskuan jartzen zituen”.

Busturiaren lana. Busturiak Lekuonaren omenez egindako lanik garrantzitsuan haren “historia berreskuratzea” izan da: “2022an, hemen ikusi ahal dugun harri txiki hau, Stolperstein izenekoa jarri genuen. Horrek Lekuonaren bizi kontatzen du; Busturian jaio zela eta Hradistkon hil zutela”.

“Guk bagenekien Lekuona Hradistkon fusilatu zutela, eta horregatik, Busturia eta Txekiar Errepublikan dagoen herri txiki eta politarekin senidetze akordioa egin genuen. Guk, busturiarrok, neba-arrebak ditugu Hradistkon”, azpimarratu du Gandariasek. Gerora dokumental bat egitea otu zitzaiela gogoratu du, Oier Plaza gernika-lumotarraren laguntzagaz egin dutena. Iaz Pragan estreinatu zuten Popel ikus-entzunezkoak Busturian amaituko du bere ibilbidea, apirilaren 23an [eguena]: “Anjel Lekuona Busturiatik Pragara eraman zuten, eta dokumentala Pragatik Busturiara dator, Anjelekin batera”.

EAJren bozkekin onartutako udal aurrekontua "anbiziorik gabekoa" dela dio EH Bilduk

Busturialdeko Hitza — 2026-03-31 13:05:11

Busturiko Udalak onartutako 2026. urterako udal aurrekontua “konpromisozko aurrekontua” dela adierazi du udalerriko EH Bilduk. Aurrekontuetan jasotako berrikuntza eta proiektu bakarra San Kristobal eta Sakoneta auzoen arteko espaloia konpondu eta birmoldatzea dela salatu dute, aurrekontuak “anbiziorik gabekoak eta etorkizuneko proiekturik gabekoak” direla nabarmenduta.

EH Bildutik gogoratu dute urteak daramatzatela EAJren udal gobernu taldeari “erantzun gabeko galderak” egiten: “Zein da EAJk Busturirako duen etorkizuneko proiektua? Zer ikuspegi duzue gure herriaz hemendik hamar, hamabost edo hogei urtera? Zergatik duzue herritarren parte hartzearen beldurra? Erantzunik gabeko galderak, aurten ere”. Galdera horiekin eta “beste bi arrazoi zehatzekin” justifikatu zuten EH Bildukoek aurrekontua ez babestea.

Izan ere, EAJ aurrekontu ez parte hartzaileak egitearekin “tematuta” dagoela diote EH Bildukoek: “Aurrekontu batzuetarako lehen urratsa izan beharko litzateke herritarrei galdetzesa zer nahi duten, zer espero duten aurrekontuetatik. Entzutea, eztabaidatzea baita konbentzitzea ere”. Era berean, EAJk “behin baino gehiagotan benetako entzute prozesua haustekundeak direla” esan izana salatu dute, beraientzat herritarren parte hartzeak udal kudeaketaren funtsezko zutabeetako bat izan behar duela argituta: “Hauteskunde batzuk ez dira txeke zuri bat; izan ere, lau urtetan gauza asko alda daitezke”. Busturiko araudiak udala auzotarrekin kontsultak egitera behartzen dutela gehitu dute, eta horiek ez egitean, “araudia urratzen” ari direla.

Bestetik, udal gobernuari Agarreko baserriaren inguruan “ezer egin ez” izana leporatu diote, “busturiar guztion ondarea” dena “zatika erortzen” ari baita; “EAJk gai honetan duen geldotasuna bere proiektu politiko falta eta anbizio ezaren adibiderik onena da. Euren geldotasunaz erakusten dute sinesteko zaila zirudien zerbait: ez dutela Agarre birgaitzeko, gure ondarea zaintzeko eta, beraz, Busturia behar dituen azpiegiturez hornitzeko asmorik txikiena ere”, aldarrikatu dute.

Aurrekontuen eztabaida “zakarra eta desatsegina” izan zen EH Bidukoentzat, EAJk “ia sinestezina den hipokresia erakutsi” zuela uste baitute. Izan ere, udal gobernu taldeak EH Bilduko zinegotziei espaloiaren proiektua atzera bota eta Sakonetako bizilagunen segurtasuna arriskuan jartzea leporatu izana salatu dute: “Hori ez da egia, berriro ere. EH Bilduren hauteskunde programa guztiak edo gure argitalpenak ikustea bezain erraza da frogatzea, espaloia konpontzea eskatzen baitzuten. Bide batez esatea, ez etxebizitza blokeraino bakarrik, orain aurreikusita dagoen bezala, baizik eta osasune etxeraino”. Halere, espaloiko esku hartzea eta Agarreko proiektua bateragarriak direla uste dute.

Horregatik, Agarre proiektua hasteko “plan bideragarri bat” aurkeztu zioten EH Bildukoek udal gobernuaril. Zehaztu dutenez, udalak hamarkadetan zehar 25.000 euro inguru gastatu dute urteroko alokairuetan, “hipoteka gisa hartuta, 700.000 euroko mailegua“: “700.000 euroko mailegua lor genezake alokairuaren ordaintzen dugun zenbateko beraren truke. Gure proposamena sinplea zen: diru hori Agarre birgaitzeko eta zerbitzuak bertan birkokatzeko erabiliko dugu, adibidez haurtzaindegia,e do beste kolekiboen zerbitzua, alokairuko etxebizitzak berton egiteko aukera baztertu barik”. Neurri horrek urtero “pixka bat gehiago” gastatzea eskatuko zion udalari, baina “bizilagun guztien zerbait” izango litzatekela defendatu dute.

EAJren erantzuna “zinismo izugarri baten erakustaldi” gisa definitu dute EH Bildukoek, horrelako proiektu batek azterketa eta txosten teknikoak behar dituela argudiatu baitzuten. “Txosten eta azterketa horiek egin eta aurrekontuan sartzeko eskatzen ari gara hainbat urtez, eta EAJk erantzun digu proiekturako dirurik ez bazegoen, zertarako egin azterketak”, nabarmendu dute. Horren aurrean finantzaketa bilatzeko proposamenak helarazi zizkieten EH Bilduk, baina jasotako erantzuna “ez dagoela txostenik” izan dute. “EH Bilduk irtenbideak proposatzen ditu, eta EAJk ekintza ezaz erantzuten du”, berretsi dute.

Hala, udal gobernu taldeak oposizioaren edo herritarren presioa nabaritzean bakarrik ekiten dionaren “ondorio triste bezain argira” iritsi dira EH Bildukoak, eta horren adibidetzat jarri dituzte EAJkoak aurten onartu izanaz “harrotzen” dituen aurrekontuko bi diru sail: Hiri Garapenerako Plan Orokorra garatzeko esleitutakoa eta Bustuko energia-plana sortzeko enpresa bat kontratatzekoa. Bi proiektuak azken urteetan oposizionak eta herri mugimenduak etengabe eskatutako proiektuak direla azpimarratu dute EH Bildukoek.

Era berean, “aktak berrikusten dituen edonork” EH Bilduk esandakoa egia dela baieztatu dezakeela argitu dute, proposatzen duten guztiak “horma batekin, ezezko irmo batekin edo aitzakiekin topo” egiten duela baieztatzeagaz batera. Hala, “proiektu politikorik, gogorik eta anbiziorik ez dagoela” iritzita, EH Bilduk ez ditu 2026rako aurrekontuak babestu: “Ez dugu udaletxearen ardura duten finka kudeatzailerik behar, Busturiaren oraina eta etorkizuna hobetu nahi duen talde bat baizik”.

Zabalik dago jaietan txosna jartzeko eskaera egiteko epea

Busturialdeko Hitza — 2026-03-25 18:14:10

Busturiko Udaletik jakinarazi dutenez, txosnak udalerriko ostalariei esleitu gabe gelditu dira, eta horrenbestez, eskualdeko elkarte guztiei zabaldu diete eskaera aurkezteko deia. Interesa duten elkarteek apirilaren 15a [eguaztena] bitartean dute eskaera egiteko aukera, 94-617 10 04 telefono zenbakira deituta edota liburutegia@busturia.eus helbide elektronikora idatzita.

Zehaztu dutenez, Busturiko hiru auzotako jaietan txosna bakarra jartzeko aukera egongo da: San Kristobalen uztailaren 10, 11 eta 12an, Axpen uztailaren 24, 25, 26 eta 27an eta Altamiran, abuztuaren 8 eta 9an.

Gaztemunduri Ateak Ireki programan harrera-familia izateko deia zabaldu dute

Busturialdeko Hitza — 2026-03-10 14:25:12

Gaztemunduri Ateak Ireki egitasmoak bultzatuta, Euskal Herria Argentinako, Uruguaiko, Amerikako Estatu Batuetako, Kanadako eta Australiako euskal komunitate gaztearen harrera herrialde izango da ekainaren 27tik uztailaren 19ra bitartean. Eusko Jaurlaritzaren Gaztemundu proiektuak eta Bizkaiko Foru Aldundiak babestutako Batzen Kultur Elkartearen Ateak Ireki programak bat egin dute Euskal Herriaren eta diasporaren artean “zubi iraunkorrak” sortzeko helburuagaz, eta horregatik, aurten bi helmuga eskainiko dituzte: Goierri eta Busturialdea-Urdaibai. U rremendi Landa Garapen Elkartearen eskutik estreinatuko da Busturialdea harrera-lurralde gisa, eta bertako familiak diasporako gazteen harrera-familia izatera animatu dituzte antolatzaileek.

Ateak Ireki programak euskara eta euskal kulturaren ezagutzan murgildu nahi zuten AEB eta Kanadatik etorritako 102 gazte hartu ditu azken hiru urteetan Goierrin, eta Leixuri Arrizabalaga Bizkaiko Foru Aldundiko Euskara, Kultura eta Kirol Saileko diputaturentzat “pozgarria” da ekimenak Bizkaira salto egitea, parte hartze askoren arbasoen jatorria baita: “Beti amestu dugu gazteak hemen hartzea, bertoko familiekin egonaldia eskaintzea eta Bizkaiagaz harremana eguneko bisitez harago sakontzea. Aurten elkarrekin amets hori egi bihurtzea lortu dugu”.

Busturialdea harrera-lurralde izendatzeko “arrazoi ugari” izan dituzte, tartean gaur egun euskal diaspora osatzen duten atzerrian bizi diren euskaldunen “ehuneko handienetakoa” duen eskualdea izatea. Izan ere, programarekin “sustraiak indartu eta transmizioa bermatu” nahi dutela adierazi du diputatuak: “Egun batean alde egin behar izan zutenek beraien familiei transmititutako maitasuna, nortasuna eta balioak berdin jarraitzen dutela frogatu nahi da”. Gazteek, beste herrialde batzuetan bizi eta beraien jaioterriko kultura besarkatu arren, “bihotzean euskaldunak” izaten jarraitzea ikustea pozgarria dela nabarmendu du Arrizabalagak, horregatik, Busturialdera iritsiko diren gazteei “etxean daudela” sentiaraztearen garrantzia nabarmendu du.

“Proposamen indartsuagoa”.
Gaztemunduk egitasmoak, bestetik, 30 urtetan zehar euskal diasporako 800 gaztetik gora ekarri ditu Euskal Herrira, baina “berrikuntza kutsu baten beharra” antzemanda, Ateak Irekiren indarrak batzea erabaki zutela gogoratu du Ziortza Olano Eusko Jaurlaritzako Kanpoko Euskal Komunitatearen zuzendariak. Bi programak batuta proposamen “berezi eta indartsuagoa” lortu dutela nabarmendu du. Euskadi Globala” aldarrikatu du Olanok, “Euskadi euskaldunak dauden lekuan” dagoela zehaztuz: “Diaspora barik, diasporak ditugu munduan zehar. Oso ezberdinak dira, eta bakoitzak euskal nortasuna modu ezberdinean sentitzen du, eta denak daude ondo. Dibertsitatea besarkatu eta aurrera egin behar dugu”. Horregatik, Busturialdeak Argentinatik, Uruguaitik eta Australiatik iritsitako gazteak hartuko ditu, eta Goierrik, berriz, estatubatuarrak eta kanadarrak: “Momentuz horrela egingo da banaketa; esperientzia berria da eta bakoitzak bere lekua izatea bilatu dugu”. Halere, egonaldian zehar astean behin edo birritan ekintza bateratuak egingo dituzte, esaterako Basque Culinary Centerren eskutik gastronomia ikastaroa.

Urremendiren eskutik iritsiko dira gazteak eskualdera, eta Aitziber Ansotegi elkarteko gerentea “pozarren” agertu da egitasmoa Bizkaiara ekartzeko esperientzia pilotua Busturialdean gauzatuko delako. Zehaztu duenez, beraien jarduna gazteei laguntza eskaini eta euskal kulturari lotutako ekintzak antolatzea izango da “bertako bizitza ezagutu” dezaten. Horrez gain, Busturialdeko udalekin harrera-familiak bilatzeko lan egingo dutela azpimarratu du, “oso garrantzitsua” delako familiak diasporako pertsonak etxean hartu eta loturak sortzea.

Iñaki Goirizelaia Batzen Elkarteko eta Ateak Ireki egitasmoaren zuzendariak aldundiaren, Jaurlaritzaren, Urremendiren eta Gipuzkoari Goieki Goierriko Garapen Agentziaren babesa eskertu du, baita Euskal Australiar Elkartearen “babesa, kemena eta indarra” ere: “Lan handia egin dute euskal australiarrak animatzen”. Gaztemunduri Ateak Ireki egitasmoagaz diasporako gazteak euskal kulturan murgildu, euskal azpiegitura instituzionala ezagutu eta “Euskadi modernoa ezagutzea” bilatu gura dutela nabarmendu du: “Guk nahi duguna da benetan ezagutzea zer garen eta benetan murgiltzea euskal kulturan, gero beraien jaioterrira itzultzean gure herriaren aldeko pertsona aktiboak izateako”. Horretarako euskara eskolak “garrantzitsuak” direla nabarmendu eta Zornotzako barnetegiari ere eskerrik beroenak helarazi nahi izan dizkio Goirizelaiak, egonaldian zehar gazteek “ia egunero” euskara klaseak jasoko baitituzte bertan. Euskal Herrira iritsi aurretik, ostera, Etxepare Institutuaren eskutik euskara ikasteko online saioetan murgilduko dira parte hartzaileetako asko.

91 gazte.
Euskadi Globala hizpide, Gaztemunduri Ateak Ireki programagaz bat egiteko gogoa erakutsi duten 18 eta 25 urteko 91 gazteen jatorria “oso zabala” dela zehaztu du Goirizelaiak. Horietatik 54 dira Busturialdeko egonaldian izena eman dutenak: 42 argentinarrek, 6 uruguaitarrek, 4 australiarrek eta frantziar eta perutar banak: “Frantziako eta Peruko izen ematea sinbolikoa da, baina zenbaki osoa oso polita da”. Zuzendariak Argentinaren kasua nabarmendu nahi izan du, herrialdeko “ia toki guztietatik” etorriko baitira Busturialdera: “Euskal etxe asko dira ekimenean inplikatu direnak eta etorriko diren gazte asko —%90,5— euskal etxeotan sartuta daude. Horrek agerian uzten du euskal etxeen garrantzia“.

Ekimena 18 eta 25 urtekoei zuzenduta egon arren, gazteagoen zein adin nagusiagokoen arreta ere bereganatu du nahiz eta ez diren aurtengo egonaldiaren parte izango. Zehaztu dutenez, eskualdeak hartuko dituen gazte gehienak 21 eta 23 urte bitartekoak izango dira eta gehienak (%71,2), emakumeak. Izan ere, argentinarren artean %71,43 dira emakumeak; uruguaitarren artean ostera, %83,33 eta australiarrak, %50.

Parte hartzaileen arbasoen jaioterriari dagokionez, argentinarren artean Gipuzkoa (%33), Nafarroa (%29) eta Bizkaia eta Lapurdi (biak %17) nabarmentzen dira. Uruguiatik etorriko direnen artean, ostera, Araba eta Gipuzkoar jatorria dute gehienek (%33,33). Australiarren “ia %100-ak” berriz, jatorri bizkaitarra du. Gainera, Busturialdera etorriko diren gazte gehienentzat Euskal Herrira etorriko diren lehen aldia izango dela zehaztu dute: “Batzuentzat lehen aldia izango da eta hori oso momentu berezia izaten da. Batzuetan, gainera, lehenengo aldiz etorri eta arbasoak ezagutzejo aukera izaten dute. Hunkigarria izaten da”.

Hiru asteko egonaldia esperientzia guztiz murgiltzailea izango da parte hartzaileentzat: “Ez datoz oporretan, lanera baizik”. Hala, astegunetan 9:00etatik 19:30ak arte lanean ibiliko dira, denetariko jarduerekin. Ekimena aurrera eramateko familiak “gakoa” direla nabarmendu du Goirizelaiak, orain arte parte hartu duten familiak “oso pozik” daudela adierazi dutela zehaztuz.Hori horrela, Busturialdeko familiei bat egin eta Ateak Irekiren webgunearen bidez harrera-familia gisa izena emateko deia egin die, “oso aberasarria” izango delako.

Gogoratu du “edozein” familiak eman dezakela izena, egin behar duten gauza bakarra gaztea “etxeko beste bat balitz bezala” hartzea dela. Era berean egonaldiko asteburuen garrantzia azpimarratu du, gazteak familiekin egongo direlako: “Hor sortuko da harreman bereziena, betirako hor egongo dena”.

Busturiko Udalak ere, Atxurkulu Emakumeen Elkartearen ibilbidea nabarmendu du

Busturialdeko Hitza — 2026-03-06 10:57:29

Busturiko Atxurkulu Emakumeen Elkarteak Bizkaiko Foru Aldundiaren Zirgari saria jaso du, 26 urtez Busturiko emakumeen saretzea “erreferentzia komunitario bihur daitekeela” erakusteagatik. Hain zuzen ere, Busturiko Udalak proposatu zuen hautagai modura, “udalerrian egin duten lana ikusaraztearren eta lan hori balioestearren”, eta, Bizkaiko Foru Aldundiak sari hori herriko elkarteari eman izanaz “poztu” da udala. “Errekonozimendu honek Busturiko emakumeen partaidetza sozialaren defentsa aktiboan, konpromiso komunitarioan eta etengabeko lanean oinarritutako eta urteetan eraikitako ibilbide sendoa balioan jartzen du“, adierazi du Aitor Aretxaga Busturiko alkateak.

Azpimarratu du herriko elkarteak “merezi” zuela saria, urteetan izandako etengabeko lanerako konpromisoagatik. Eta, uste du, errekonozimenduak “elkarte eredugarriaren ahalegina nabarmentzeaz” gain, herriko komunitateek berdintasun erreal eta eraginkorragaz duten konpromiso kolektiboa ere indartzen duela: “25 urte baino gehiagoko ibilbidea dute, eta elkartean dauden 32 emakumeak udalaga zein tokiko beste eragile batzuekin aritu dira lankidetza estuan, eta horrek modu erabakigarrian lagundu du herriko dinamizazio sozio-kulturala aurrera eroateko, baita Busturiko bizitza sozialean emakumeen presentzia aktiboa eta agerikoa bermatzeko”. Eta, lan horren erakusle, zenbait ekarpen nabarmendu ditu Aretxagak: Busturiko kultur eta jai antolaketan zein dinamizazioan parte hartzen dutela esan du, baita tanborradan, inauterietan, Kantu Kantari ekimenean, Santa Agedan, Erregeen Kabalgatan eta Arrotegi egoitzan egiten diren ekimenetan ere izaten direla gehitu ere. “Horrez gain, Atxurkuluk euskarazko irakurketa tailerrak, topaguneak, elkarri laguntzeko eta parte hartzeko guneak sortzen dituzte, eta Busturian emakumeen kultura eta gizarte autonomia indartzen dituzte”, azaldu du alkateak.

25 urtetik gora.
Atxurkulu Emakumeen Elkartea 80ko hamarkadan sortu zen, herriko emakume talde batek topaketarako espazio propioa izateko zuen beharretik abiatuta. Hasieran, Atxurkuluk oinarrizko prestakuntza-jarduerak bultzatu zituen, emakumeek trebakuntzarako eta eskura zituzten baliabideetarako sarbidea hobetzeko helburuz. Halan be, denporaren poderioz, alkarteak bilakaera izan du, eta gizarte-aldaketetara egokitu da, Busturian emakumeen elkarteen erreferente bihurtu arte.

Gaur egun, taldearen erronketako bat emakume gazteen parte-hartzea mantentzea eta indartzea da, belaunaldien arteko erreleboa eta elkartearen jarraipena bermatzeko; izan ere, 25 urteetan, Atxurkuluk emakumeen eta gizonen arteko berdintasunari lagundu dio, emakumeen parte-hartze sozialaren sustapen aktiboaren bidez, eta asmo horrekin jarraitu nahi dute.

Udalak gogorarazi du tokiko elkarteekiko lankidetza “funtsezko pieza” dela politika publiko eraldatzaileak bultzatzeko. Ildo horretan, berretsi du Atxurkulu Emakumeen Elkarteari eta parte-hartze soziala, kohesio komunitarioa eta emakumeen eta gizonen arteko bardintasuna indartzen laguntzen duten ekimen guztiei ematen zaien babesa instituzinonala: “Udalak berriz ere zoriondu du elkartea merezitako errekonozimenduagaitik eta eskerrak emon dizkio bere dedikazinoagatik, jarraikortasunagatik eta aldaketa positiboak sortzeko erakutsi duten gaitasunagaitik”.

Atxurkulu Emakumeen Elkartea: saretzetik herrigintzari egindako ekarpenari aitortza

Busturialdeko Hitza — 2026-03-06 10:29:33

Historikoki emakumeak izan dira familia etxeen barne kudeaketa beregain hartu behar izan dutenak. Beraiek izan dira, kasu asko eta askotan, familien funtzionamendua eta egonkortasuna bermatu dutenak; etxeen kudeaketa eta antolaketaz arduratuz, zaintza eta seme-alaben hazkuntza eta osasuna beregain hartuz. Lanok familiaren iturri ekonomiko izanagaz uztartu dituzte emakume askok. Urteen joan-etorriagaz eta mugimendu feministaren indar hartzeagaz, gutxika, emakumeen funtsezko lanari aitorpena egiten joan da gizartea. Baina, emakumeek, etxetik harago, herrien bizirautea ere bermatu dute, saretu eta herrigintzatik lan eginez. Horren adibide dira, esaterako, Busturiko Atxurkulu Emakumeen Elkarteko emakumeak, eta horien jarduna balioan jarri asmoz, Bizkaiko Foru Aldundiak 2026ko Zirgari Saria eman zien atzo arratsaldean, Bilboko BBK aretoan.

Busturiako herriarekin lotura guztiz estua dauka Atxurkulu Emakumeen Elkarteak; izan ere, gaur gaurkoz errotua dagoen herriko ohitura bati zor dio, nolabait, bere izaera. Izan ere, duela 35 urte, herriko emakumeak inauteriak antolatzeko batzartzen hasi ziren: «Herriari begira antolatzen hasi ginen emakumeok. Hasieran, mozorrotu eta herriko Crispin tabernara joaten ginen afaltzera», gogoratu du Bihotza Araukua elkarteko lehendakariak. Gerora, antzerkirako eta bestelako ekintzetarako ere batzen hasi ziren.

Kalean elkarrekin egotetik sortutako ekimena izan zen, hasiera batean inauteriez haragoko asmorik ez zuena. «Ikuspegi hiritarragoa» zuen auzotar batek ordea, emakume taldeari izaera formalagoa ematea eta elkartea osatzea proposatu zien. «1999ko azaroko batzar batean, udaleko langile ohi batek lagunduta egindako elkartearen lehenengo estatutuak irakurri genituen», nabarmendu du Yolanda Vara Atxurkuluko idazkariak. Atxurkulu Emakumeen Elkartea lau hilabete beranduago jaio zen ofizialki, 2000.urteko otsailaren 6an, hain zuzen. Orduan ekin zioten zapaturo Altamirako kultur etxeko gela batean batzartzeari.

Kultur eragile gisa
Izenean jaso legez, Atxurkulu emakumeen elkartea da, eta hori du bere oinarri; halere, Busturiko kultur eragile nagusien artean ere kokatu daiteke, Busturiko Udalaren laguntzarekin, beregain hartzen baitute udalerriko kultur ekintzen antolakuntzaren zatirik handiena, jai, kultura zein berdintasun batzordeetan parte hartzen baitute: Santa Ageda, inauteriak, danborrada, jaietako txokolatea, Emakumeen Nazioarteko Eguneko kartelada, Errege Magoen ekitaldia… «Guk egin ezean, ez dakigu jaiok aurrera jarraituko luketen, ez baitugu erreleboa hartzeko jenderik ikusten», hausnartu du Adelaida Lazkano elkarteko diruzainak. Herriari egindako ekarpen hori da, hain zuzen, aldundiak atzo saritu nahi izan zuena, busturiarrek «argi frogatu» dutelako «udalerri txiki batean ere, emakumeen elkartegintza erreferentzia komunitario» bihur daitekeela. «31 emakume, 25 urte baino gehiagoz, parte hartzetik buru izatera igaro dira, kultura-jarduerak, herri-jaiak, boluntariotza-gaiak eta topaguneak antolatuz», zehaztu dute aldunditik.

Busturiarrek udaleko zinegotzi baten bidez jaso zuten sarituak izango ziren berria eta lehenengo momentutik «ilusioa» nabarmendu dela aitortu dute. Urte luzez egindako lana «gogotsu eta ezer espero barik» egin badute ere. Diotenez, aitorpen publiko horrek egindako lanaz jabetzeko balioko die, eta «zortea» baldin badago, belaunaldi gazteagoak Atxurkulura hurbiltzea eragingo du: «Elkartekideen batez besteko adina altutxoa da. Badaude emakume gazteagoak, inauterietan parte hartzen dutenak, baina ez dute elkartean izena ematen. Lagundu egiten dute, baina pauso hori ematea nahiko genuke. Atxurkulu Emakumeen Elkartea da, eta emakumeak batzea nahi dugu», adierazi dute elkartekideek. Elkarteak Axpen lokala daukala gogoratu dute, nahi duena, elkartekoa izan zein ez, jostera hurbildu dadin.

Busturian emakumeen elkartearen ordezkaritza ez daukan deialdiren bat imajinatzea zaila da; izan ere, Atxurkulu «beti egon da edozertarako prest», ukelele ikastaroa izan, antzerkia edo dantza: «Herrian egiten den edozein proposamenetan beti egongo da elkarteko norbait». Era berean, beraiek bultzatutako egitarauetan Busturiko Hirugarren Adineko Elkartearen eta Kantu Kantariren laguntza izaten dutela nabarmendu dute, danborradan gizonezkoek ere bat egiten dutela zehazteagaz batera.

Indarberrituta
Beraien lanaren garrantziaren jakitun dira elkarteko kideak, eta «karga handia» izan badaiteke ere, «zorionez » ez dute sakrifizio gisa ikusten: «Guri on egiten digu elkartu eta antolatzeak; aktibo mantentzen gara, ilusioz, eta gainera, lagunekin gaude». Halere, aitorpenari «dagokion pisua» eman behar zaiola deritze, Busturi bezalako herri txiki batentzat «sari handia» delako. Horregatik, atzoko saria eskertu dute, «motibazio puntu bat eman eta indarberritu» egin dituelako.

Testuinguru berezian jaso dute Atxurkulukoek saria, etzikoa Emakumeen Nazioarteko Eguna baita. Atzo saria jaso, eta bihar, berriz, Athleticen partidua San Mameseko palkotik ikusiko dute, gainontzeko sarituekin batera. Domekan, baina, festa aldarriagatik aldatuko dute Martxoaren 8ko kartelada egingo baitute, 13:00etarako deitutako irakurketa instituzionalaren ostean. Orduan bai, herrigintzari egindako ekarpenagatik jasotako saria herritarrei erakutsiko diete.

San Kristobal auzoa "gizatiartzeko" hirigintza birmoldaketa amaitutzat eman dute

Busturialdeko Hitza — 2026-02-19 14:49:29

Auzo guztietako bide-segurtasuna eta irisgarritasuna hobetzeko helburuari jarraituz, Busturiko Udalak San Kristobaleko hirigintza birmoldaketa gauzatu du, auzoaren “eraldaketa integrala” ekarri duena. Batez ere errepide orokorrak zeharkatzen duen auzoaren erdiko ardatzean egin dituzte lanak, auzotarren “segurtasuna, irisgarritasuna eta bizi-kalitatea hobetzeko” asmoz. Aitor Aretxaga Busturiko alkateak auzoa “gizatiartu” dutela azpimarratu du.

San Kristobal hiritartzearen kostua 185.880 eurokoa izan da, baina Aretxagak jakinarazi duenez, horietatik 145.681 euro Eusko Jaurlaritzaren eta Bizkaiko Foru Aldundiaren diru laguntzetatik finantzatu dituzte: “Kudeaketa horrekin aurrezpen bat lortu dugu eta, 2026an diru laguntza berriak izapidetzearekin batera, Sakonetako espaloi obrei ekin ahal izango diegu”.

Hirigintza birmoldaketaren barruan, errepidearen bi aldeetan zeharka aparkatzeko lekuak kentzea erabaki du udalak, maniobrei lotutako arriskuak murriztu eta gidari zein oinezkoentzat “ikuspena hobetuz”. Jarduketa horrek “ingurune seguruagoa eta ordenatuagoa sortzen laguntzen” duela nabarmendu dute udaletik. Horrez gain, hondatuta zeuden bide-zatietan zorua hobetu dute, baita zabaldutako eremuetan zoladura berritu eta bateratu ere.

Espaloiak ere handitu dituzte, oinezkoentzako tokia irabaziz eta mugikortasun eredu jasangarriago eta irisgarriago bat bultzatuz. Lanak amaituta, auzotarrek “erosoago ibilteko aukera” irabazi dute, besteak beste haurrentzako orgak edo gurpil-aulkiak igarotzea erraztu dutelako: “Ingurua oinezkoentzako izatea indartu da, familien biztzarako bereziki garrantzitsua baita”.

Lanak burututa auzoak “hiri irudi zainduagoa, koherenteagoa eta modernoagoa” eskaintzen duela nabarmendu dute udaletik, espazio publikoa modernizatzeaz harago, ingurune seguruago, irisgarriago eta atseginago baten alde egin dutela zehazteagaz batera: “Herritar guztien ongizaterako eta auzo biziago eta funtzionalago bat finkatzeko pentsatuta dago”.

Bestalde, zerbitzuei dagokionez, egoera txarrean zeuden linea elektrikoaren ubideratze eta kableak berritu dituzte, baita hirigintza diseinu berriarekin bat datozen eta eraginkortasun energetikoaren irizpideekin bat egiten duten argi berriak instalatu ere: “Argiteria publikoa modu integralea modernizatu eta hobetu dugu”.

Birmoldaketa biribildu eta “kale paisajismo berria are gehiago gizatiartzeko” helburuarekin, atseden leku eta elkargune berriak sortu dituztela azpimarratu nahi izan dute udaletik. Espazio horiek lorategietako landareria ezberdinekin osatuz joango direla aurreratu dute, landaketak espezie bakoitzaren “landaketa-egutegiaren arabera” egingo direla nabarmenduta: “Orain arte zugaska sorta zabala sartu da, eta udaberriaren etorreragaz baterra, hainbat espezietako erraboilak landatuko dira. Horri esker, urten zehar hainbat loraldiz gozatzeko auker egongo da”.

Bidea egiten jarraitzeko hitzordua

Busturialdeko Hitza — 2026-02-18 11:10:16

Oinetako eta arropa aproposa soinean eta ura eta mokadutxoa motxilan dituztela, Mape-Busturia Mendi Taldekoek ez dute ezer gehiago behar bidea hartu eta hango eta hemengo mendi eta bideak ezagutzera irteteko. Berdin dio azkarrena edo motelena izan, trebea edo traketsa; busturiarrek bermatuta dituzte giro ona, laguntza eta bidea elkarrekin egitea ze, azken finean, horiek dira taldea bere 10. urteurrenera eraman duten ezaugarriak.

Hamarkada bateko ibilbide ofizial gorabeheratsua ospatzen ari da mendi taldea aurten baina, atzera begiratuz gero, elkarte izendapena jaso arte hamaika tontorretatik igarotakoak ziren busturiarrak: “Duela 20 urte hasi ginen bost bat lagun, eta mezu bidez edo elkarri deituta gelditzen ginen. Gure kabuz ibiltzen ginen, taldeaz harago, deialdiak egin barik”, gogoratu du Gaizka Larrabaster elkartearen sortzaile eta lehendakariak. Halere, sorreraz geroztik, herrigintzan inplikatutako taldea izan da; izan ere, ia hasieratik, euskararen egunean mendi-irteerak antolatzearen ardura hartu zuten, beste zenbait ekintzagaz batera, eta horretan dihardute oraindik ere.

Jarduna aurrera eramateko, Busturiko Udalari laguntza eskatu zioten zenbait urtez, baina elkarte izaeraren faltan, ez zuten diru laguntzarik jasotzeko aukerarik. Orduan otu zitzaien hamar urteko bidea “ofizialtasunarekin” biribiltzea, Mape-Busturia Mendi Taldea sortuz: “Herrian hainbat talde zeudela ikusita, ‘zergatik ez dugu guk mendi taldea sortzen?’ esan genuen, eta galdetzen hasi ginen, ze, gu herrian ibiltzen ginen eta ez genuen hortik kanpora gehiegi joan nahi. 2016an sortu genuen legez taldea”.

Azken hamar urteetan, taldeak tokiko mendizaleak batzeko helburuari erantzuten dion funtzionatzeko modua aurkitu du. Hilean irteera bat egiten dute —batzuetan bi—: “Oro har, urrian hasi eta ekainera arteko denboraldia egiten dugu”, zehaztu du Iñigo Serna taldekideak. Udaletik jasotzen duten diru laguntza baliatuta, denboraldiari amaiera emateko, irteera “konpletoagoa” egiten dute: “Mendia, bazkaria eta kultur ekintza bat uztartzen ahalegintzen gara”.

Argazkia: Mape Busturia Mendi Taldea

Hasieran, Altamiran geratu eta herriko mendiak zeharkatzera mugatzen ziren, baina azken urteetan, herria “pixka bat txiki” gelditu zaiela nabaritu dute; horregatik, orain, Busturialdeko zein Bizkaiko beste tontor batzuetara ere jotzen dute: “Ez beti, hemendik ere ibiltzen gara-eta. Busturian finkoak diren irteerak ditugu, Basatozte eguneko edo abenduaren 31n Sollubera brindisa egiteko egiten dugun igoera, adibidez. Martxoaren 8aren inguruan ere irteera egiten dugu, zapiak jantzita”. Irteera guztietara “herriko jendea joatea” nahi dute taldekideek, baina sor daitezkeen ezbeharrei aurrea hartu asmoz, kartelak herrian zehar edota Whatsapp taldearen bidez soilik zabaltzen dituzte, deialdi handirik egin gabe: “Jendeak Busturian ikusi ditzake kartelak edo ahoz-ahoko komunikazioaren bidez izan dezakete gure berri, baina ez dugu informazioa lau haizetara zabaltzen”.

Urmugagaz bat.
Ohiko irteerez eta Busturiaz harago, bestelako ekintzetan ere buru-belarri sartuta dabiltza Mape Busturiakoak. Izan ere, bi urterik behin egiten den Urmuga mendi ibilaldiagaz bat egiten dute, baita tarteko urteetan egiten den Urmugaren Urtantak formatu txikiko egitasmoarekin ere. Duela bi urte, esaterako, Nestor Basterretxea artista bermeotarraren figura izan zuen oinarri Urtantak ekimenak, eta busturiarrekin harremanetan jarri ziren arduradunak: “Talde txikia izanik, ez genuen horretarako potentziala genuenik ikusten, eta gero kontrakoa demostratu bada ere, Gernikako eta Bermeoko taldeen batasuna bilatu genuen”, gogoratu du Sernak. Denen artean antolatu zuten egun bateko “irteera polita”, Bermeotik irten, Matxitxako eta Gaztelugatxe zeharkatu eta Jatarainokoa.

Lehenengo esperientzia horrek bultzatuta, iazko Urmugan ere parte hartu zuten, lau etaparen arduradun gisa: “Gaztelugatxen hartu genituen, eta hainbat herri zeharkatuta, Ereñon egin genuen lehen geldialdia. Hurrengo egunean, Ereñotik Ziortza-Bolibarrera joan ginen, eta bertan beste kontzertu berezi bat izan genuen. Hirugarren etapan, Oiz igo eta Durangora egin genuen eta laugarrenean, Urkiola partetik Arrasateraino”. Aurten, Urtantak-en txanda da, eta “berezia” izango dela aurreratu dute; izan ere, estreinakoz, Euskal Herritik kanpo egingo dituzte etapa batzuk, Kanariar uharteetan, hain zuzen. Gainera, aurten jorratutako gaia etorkinak izango dela zehaztu dute: “Mota guztietako etorkinak barne hartzen ditu, gaur egungoak, gerra garaian ihesi edo diru beharragatik AEBra joan ziren artzainak, muga zeharkatu behar izan zutenak, lanagatik bertora etorri zirenak…”. Argi izpiak agertzen badoaz ere, ibilbide eta etapak guztiz zehazteke daude, baina Mape-Busturia Mendi Taldekoak horren parte izango dira.

Oraina eta lehena batzeko.
Hamar urte ez dira gutxi, eta horien joan-etorriarekin, eta adina edota mugikortasun arazoak tarteko, taldearen lehen urratsetan parte hartu zuten mendizaleetako batzuek taldean jarrera aktiboa izateari utzi behar izan diote; halere, Mape-Busturia Mendi Taldekoek gogoan dituzte denak. Horregatik, Bilbao Bizkaia Mendi Film festibala baliatuta, mendia bertara joaterik ez dutenei hurbiltzeko aprobetxatzeko aukera gisa ikusi dute urtemuga. Proiekzioa Busturira eramateak “esfortzu handia” suposatu dio taldeari, baina udalaren laguntzarekin, etzi [otsailak 20] errealitate bihurtuko da: “Mendi Film nazioarteko mendi abentura eta natura jaialdia da, eta nazioarteko mendizale eta zinegile garrantzitsuenek parte hartzen dute; pelikula berriak dira, eta ez da merkea izaten, baina aurten guk hiru film ekarriko ditugu”.

Argazkia: Mape Busturia Mendi Taldea

Hala, barikuan kultur etxera hurbiltzen direnek K2 Mon Amour, 2025eko Mendi Filmekoeko mendiko film onena, Cantos y Flores kirol eta abentura film onena eta Izarren zaunka, euskarazko film onena ikusi ahalko dituzte. “Mendi Filmekoekin harremanetan gaude, eta ondo irteten bada, aurrerantzean ere Mendi Tourreko proiekzioekin jarraitzeko esperantza dugu”, aitortu du Sernak. Nabarmendu dute, gainera, “eskualdean ez dela sekula jaialdiko filmen proiekziorik egin”. Orain arte jasotako “harrera onagaz pozik” agertu dira deitzaileak, oraindik sarrerak erosteko aukera badago ere —kultur etxean, 3 eurotan—, erantzuna “ona” izaten ari delako.

Mape Busturia Mendi Taldekoek barikuan kultur etxera urreratzera animatu dituzte Busturiko zein inguruko mendizaleak: “Bete dezagun kultur etxea, hurrengo urtean ere errepikatu ahal izateko”.

Lehen sorospen tailerra.
Urteurrena biribiltzeko hitzordua izango da barikukoa, baina ez bakarra. Mape-Busturiakoek Nordic Walking ikastaroa egin zuten duela bi urte, eta aurten bestelako eskaintza prestatu dute. “Duela bi urte Nordic Walking ikastaroa antolatu genuen; menditik azkarrago eta erosoago joateko teknika da, eta frogatuta dago emakumeen bularreko minbizia prebenitzen laguntzeko kirol oso konpletoa dela”, azaldu dute. Aurten, ostera, beste ardura bati erantzun eta mendian zerbait gertatuz gero nola erantzun ikasiko dute, martxoaren 5ean, 19:00etan, kultur etxean.