Liburuen aurkezpena (Sukarrieta)
Sukarrieta. Sukarrietako Ludotekak bi libururen aurkezpena hartuko du azaroaren 9an [zapatua], 18:00etatik 20:00etara bitartean. Sarrera doakoa izango da.
Lehenengo, 18:00etan, Edorta Jimenezek Nikole Bijotzekua liburua aurkeztuko du.
Sinopsia: Nikolasa Atxikallende, sukarrietarra, Sabino Arana Goiriren alarguna, pertsonaia ahaztua, baztertua eta laidoztatua izan da, etsaiek ez ezik, baita hurbilekoek eta ahaideek ere. Haren figura berreskuratu, laudatu, eta haren historia kontatzen jarri da Jimenez, poesiarik onenaren edertasun lirikoaz eta thriller bizkorrenaren intriga guztiaz.
Jarraian, 19:00etan, Kepa Luzarragak Itotzeari beldurrez lehortu gara poesia liburua aurkeztuko du.
Poesia saila: Itsasertzean gaude, hondarrezko gazteluetan, segurtasunaren gatibu: itsasoa, askatasuna, zeharka begiratuz. Gure barne gatazkak, olatuak bezala, etengabe dabiltza hondarraren kontra borrokan. Kementsuak eta alaiak dira itsasbeheran, zorrotzak eta latzak itsasgoran. Itotzeari beldurrez lehortu gara, eta hauek, busti nahi gaituzte, behingoz, itsasoan murgildu gaitezen.
