Eztanda egin dute Gernika-Lumoko Andra Mari eta San Roke jaiek
Astelehenean [abuztuak 14] hasi dituzte herriko jaiak gernikarrek. Gernika Sporting futbol taldea eta Gernikako rugbyko basurdeak izan dira pregoiaren arduradunak.
Heldu dira gernikarrek hainbeste itxaron dituzte Andra Mari eta San Roke jaiak. Zelan gainera, gogotsu hartu dituzte, jendetza elkartu da herriko txoko guztietan. Astelehenean [uztailak 14], ohi bezala, mahaiaren inguruan elkartu dira kuadrillak. Elektrotxorongogaz arratsaldea igaro dute, baina 20:45erako denak prest zeuden.
Aurten Gernika Sporting futbol taldea eta Gernikako rugbyko basurdeak izan dira pregoilariak. Hitz onak besterik ez dituzte izan. Gernika Rugbyko Iker Olaetak gogoratu du klubak aurten 50 urte bete dituela eta eskerrak eman nahi izan dizkiote “modu batera edo bestera” taldea lagundu duten guztiei: “Denon artean, melle bat bailitzan, aurrera egiten dugu denok, baina, era berean, badakigu nondik gatozen, horregatik ematen ditugu paseak atzerantza”. Gernika Sportingek ere gogoratu du historia egin dutela, lehen aldiz lehentasun mailarako igoera lortu dute aurten. Ordezkariek esan dute “ohore bat” dela pregoilariak izatea eta herritar guztien laguntza eta hauspoa eskertu dute eta “ateak zabalik” dituztela denentzako.
Txupinazoagaz batera jaiak eztanda egin du. Makazaga musika elkartearen eta Adiskideak txarangaren doinuen artean gernikarrek jaitsiera osatu dute. Erraldoi eta buruhandien konpartsak hartu dituzte kaleak adin guztietako kuadrillekin batera: Pasealekua, San Juan Ibarra eta Merkatu Plazaren arteko ibilbidea osatu dute. Gauean, kontzertuak izan dira nagusi. Lehendabizi, Gisele Jacksonen ahotsak hartu du San Juan Ibarra plaza eta gero Supercremalleras eta Urrats erromeriagaz gozatua hartu dute herritarrek jai giroan erabat murgiltzeko.
IKUSI ARGAZKI GALERIA ZUZENEAN
Eraso matxista. Gernika-Lumoko Andra Mari eta San Roke jaietako Bezpera Egunean [abuztuak 14], txosnagunean, bi eraso matxista egon zirela salatu dute. Gernika-Lumoko Jaietako Protokoloak bi aldiz eten zuen musika baita txosnetan zerbitzatzeari utzi. Gernikako Sare Feministatik adierazi dute “nazkatuta” daudela: “Gauak eta jaiak gureak dira, erasorik ez erantzunik gabe”. Elkarretaratzea deitu dute martitzenean [abuztuak 15] 20:00etan Pasealekuko eskaileretan.
