Euskadiko Etika Batzordeak Euskadiko Turismoaren Kode Etikoaren ziurtagiria eman dio Ekoetxea sareari
Ingurumen politiken bidez "eraldaketa ekosoziala bultzatzeko" egindako lana aitortu diote Ekoetxea sareari.
Euskadiko Turismoaren Kode Etikoaren ziurtagiriak Arabako, Bizkaiko eta Gipuzkoako ingurumen zentroen sareak gauzatutako jardueran “jasangarritasunaren aldeko apustua bermatzen du”.
Sareko arduradunek gogora ekarri dutenez, Ihobe-Eusko Jaurlaritzako Ingurumen Jarduketarako Sozietate Publikoak bultzatuta, Ekoetxea sareak garapen jasangarria “sustatu nahi duten esperientziak” eskaintzen ditu, herritarren “konpromisoa bilatuz” eta haien eguneroko ekintzetan “aldaketak eginez”.
Argazkia: Ekoetxea
Ihobeko Ingurumen Hezkuntzako arduradunek Euskadiko Turismo Etikoa izeneko bost ziurtagiri jaso dituzte. Hain zuzen ere, 2021ean Ekoetxea Txingudik lehenengo ziurtagiria lortu ondoren, EkoetxeaUrdaibaik, Ekoetxea Meatzaldeak eta Azpeitiko Ekoetxea zentroek ere lortu dute ziurtagiria, etengabe handitzen ari den sare hori osatzen duten “bost ingurune enblematiko horietan ingurumen politiken bidez eraldaketa ekosoziala bultzatzeko egindako lanarengatik”.
Kodearen helburua. Euskadiko Turismoaren Kode Etikoaren helburua da turismo erakunde guztiek eguneroko jardunetan gizarte erantzukizunak eta ingurumen eta ekonomia jasangarritasuna txertatzea: “Eduki horrek Munduko Turismo Erakundeak landutako Munduko Turismoaren Kode Etikoa tokiko kultura eta nortasunera egokitzen du, eta pauso garrantzitsua da euskal turismoaren erakundeek GJHak lortzeko bidean aurrera egin dezaten”.
Munduko Turismo Erakundearen ustez, jasangarria izango da, hain zuzen, bisitarien, industriaren, ingurunearen eta komunitate gonbidatzaileen beharrak asetzen dituen turismo eredua, gaur egun eta etorkizunean ekonomian, gizartean eta ingurumenean izango dituen ondorioak kontuan hartuta.
Jasangarritasun printzipio hori Sarearen helburuarekin eta estrategiarekin txertatuta dago, eta zentroek 2030 Agenda ezartzen laguntzen dute, Garapen Jasangarrirako 17 Helburuen bidez (GJH).
Etika Batzordea. Turismoaren Etikako Batzordeak euskal garapen turistikoan parte hartzen duten eragileen arteko lankidetza sustatzen du, eta, modu berean, “Turismoaren Kode Etikoa praktikan jartzen dela eta atxikitako erakundeek betetzen dutela zaintzen du”. Ekoetxea sarea ere gehitu da batzordera, eta azpimarratu dute parte hartzeko, elkarrizketarako eta gatazkak konpontzeko espazioa dela: “Eta aldi berean, Euskadiko Etika Turistikoaren erregistroan ziurtatutako erakundeek turismo jasangarriaren printzipioak zabaltzeaz eta aplikatzeaz arduratzen da”.
Euskadiko Turismoaren Kode Etikoari atxikitako erakundeek zortzi konpromiso bete behar dituzte: turistak ulertzen eta errespetatzen laguntzea; berdintasuna, inklusioa eta aniztasunarekiko tolerantzia; jasangarritasuna; tokiko tradizioa eta kultura sustatzea; gizateriaren kultur ondarea babestea; bikaintasuna eta profesionaltasuna; pertsonen eskubideak errespetatzea; eta sektoreko langileei eta enpresariei tratu egokia ematea.
