Jaietako egun handiagaz amaitu dituzte sanjuanak, Ean

2023/06/26

Barikuan hasita, parrandarako aitzakiarik ez dute behar izan eatarrek, eta gaur San Juan jaien egun handiena ospatzeko batu dira: Erreka Eguna.

Jaietako ikurretako bat den Ate gainekoa dantza eskaini dute eguerdian. Donibane Enparantzan hasi eta amaitu dute erronda; ohi legez, bidean zenbait geldialdi egin dituzte dantzatzeko. Jarraian, Ardoa Barrura fanfarriakoek hartu dute lekukoa, eta kalerik kale musikaz jantzi dituzte bazterrak.

[IKUSI ARGAZKI GALERIA]

Arratsaldean, berriz, errekan sartzeko ohiturari eutsi diote. Eguerdian bezala, ume, gazte zein helduak batu dira. Busti-busti eginda, alkarri ura jaurtiz freskatu dira, beste urte batez. Gero, jaiak goi-goitik agurtzeko, Danbayan batukadaren erritmo artean astindu dituzte gorputzak.