Gernika KESBri buruzko informazioa kontsultatzeko aplikazioa sortu dute
Gernika KESBek klubaren informazio zabala jasotzen duen aplikazioa aurkeztu du gaur. Egutegiak, sailkapenak, taldeak, albisteak, harrobiko taldeen Malosteko partiduen zuzeneko emankizunak, mezuak… dena, eskaintzen die Gernika KESBeko bazkideei eta zaleei. Horiek doan deskargatu dezakete. “Marea granateko kide izateak abantaila asko ditu denboraldi honetan. Hasteko, GUUK mugikor eta fibra komunikazio konpainiak Gernika KESBekin batera helburu argi bat dugu: Loturak ezarri. Zaleengana hurbildu. Pertsonengana hurbildu. Horretarako, mugikorrerako aplikazio bat sortu dugu, ez dago modu hoberik. Edozein momentutan klubaren inguruko informazio dena eskuragarri izango duzu, eta zelan ez, baita Emakumezkoen Ligakoa ere”, azaldu dute.
Halako aplikazio bat daukan Emakumezkoen Ligako lehenengo taldea dela azpimarratu dute: “Aplikazio hau Guuk-ek garatu du Gernika KESBentzako, eta aurrerakuntza hau duen Emakumezkoen Ligako lehenengo taldea bilakatu da. Baina garrantzitsuena da klubaren eta marea granatearen arteko lotura sendo bat osatzeko balio duen erreminta dela”.
Lointek Gernikako bazkideek dagoeneko aplikazioa jaisteko eta haien pasahitza berriztatzeko mezu eletronikoa jaso dute. Zaleek, berriz, Play Store (Android) edo Apple Store (iOS) bidez bilatzailean Gernika KESB ipinita jaitsi behar dute.
Taldea osatzen. Bestalde, 2021-2022 denboraldiaren Emakumezkoen Ligaren taldea osatzeko lanean ari da kluba. Aurreko astean jakinarazi zuten Belen Arrojo gradanarrak talde gernikarrean segituko duela, eta atzo, berriz, Roso Buch katalanak ere jarraituko duela esan zuten.
