Bide margoketak egin dituzte auzoetan
Eleizalden, Goierri Aurreko bidean eta Olatxun egin dituzte margoketak.
Muruetako Udalak bide margoketak egin ditu zenbait auzotan. Eleizalden, esaterako, Elizpitxi eta Herriko Plaza bitarteko bidean stop bat margotu dute segurtasuna hobetzeko. Gainera, etxebizitzen aurreko bidean aparkalekuak margotu dituzte bide segurtasun arazoak saihesteko, etxebizitzetarako sarrerak bermatzeko eta aparkatzeko espazioa “ahalik eta ondoen” aprobetxatzeko.
Goierri Aurreko bidean, ostera, marra horiak margotu dituzte “ikuspen arazoak saihesteko eta bidea seguruagoa” izateko. Olatxun ere marra horiak margotu dituzte eta seinale bat jarri dute sarreran, zonalde guztian ibilgailuen erregulazioa hobetzeko. Sarreran, gainera, aparkatzeko bi leku jarri dituzte.
