Platerak ere burujabeak
Elikadura burujabetzarako pausoak ematea du helburu Errigoraren kanpainak; atzoz geroztik, eskariak egiteko aukera dute herritarrek.
Errigoraren aurkezpena Astran 
Plateretik baratzera. Elikadura burujabetzarako bidea egiteko beste aukera bat eskura ipini gura du Errigoraren kanpaina berriak. Martxoaren 4tik 24ra bitartean, Nafarroako uztaren alde eginez, etorkizuna bermatzeko oinarriak finkatu nahi ditu; plateretik hasita, kontsumo eta ekoizteko moduak aldatzeraino. Hain zuzen, kontsumitzaile eta ekoizleen arteko zubia auzolanean oinarrituta eraikitzeko helburua dauka Plateretik baratzera kanpainak. «Eserita itxaron ordez, aulkitik altxatu gabe egin baitezakegu bidea elikadura burujabetzara: jan dezagun pentsatzen dugunaren arabera», diote kanpainaren bultzatzaileek.
Oliba-olio birjina –5 litroko ontzia– eta kontserba, arroz eta pasta sortak —12 unitateka— eskatu ahalko dira. Eskala txikian ekoitzitako elikagaiak kontsumitzeko deia egiten du Errigorak, produktu agroekologikoak. Kontsumitzeko erak aldatuz, ekoizteko moduak aldatu daitezkeelako.
Pandemia egoerak hausnarketarako aukera eman die Errigorakoei, eta aurtengo kanpaina erronka bezala planteatu dute: «Hainbat produkturen ekoizpenean ditugun mugak ahultasun gisa beharrean, aukera gisa ikusi behar dugu; gaur eskaera indartuz gero, bihar produktuon ekoizpena indartzeko pausoak emateko moduan izango gara».
ESKARIAK EGITEKO: Hemen
Bi otzararen zozketa. Atzoz geroztik, eskariak egiteko epea zabalik da. Hala, Nafar hegoaldeko uzta banatzen hasteko prest dira eta, auzolanean, herriz herri kanpaina antolatuz, Euskal Herri osora heldu gura du.
Internet bidez egin daiteke eskaera, errigora.eus atarian.Halaber, 848 87 12 23 telefono zenbakira deituta ere eskatu daitezke produktuak, edota inguruko arduradunari zuzenean eskaria eginez.
Banaketa apirilaren bigarren hamabostaldian egingo dute, eta ohiko lekuetan jaso ahalko direla jakinarazi dute.
Lea-Artibai, Mutriku eta Busturialdeko Hitzak ere Errigoarren bi saski zozkatuko ditu harpidedun eta Hitzakide direnen artean. Hilaren 8tik 11ra zozketan parte hartzeko aukera izango da (16:00ak arte): lea-artibaietamutriku.hitza.eus/
busturialdea.hitza.eus eta 94-684 44 36/ 94-627 10 85.
NON BATU SASKIAK?
- Bermeo. Berhazen, Alkartetxean, eskola publikoan, kultur etxean, euskaltegian, Bolatokian, Eleizalden, Erroxapen eta LABen egoitzan.
- Ea. Natxituan.
- Gernika-Lumo. Barrutialden, Seber Altube ikastolan, AEKren bulegoan, Astran, institutuan eta Maierren.
- Busturian arduradunekin adostu daiteke produktuak nola jaso.
