Gernikak hutsean utzi du Bilboko taldea
Ohorezko B Mailaren A multzoaren sailkapenean bigarren postuan segitzen du Gernika RTk, Hernani liderrarengandik puntu bakarrera.
Argazkia: Gernika RT Gabonetako atsedenaldiaren ostean, errugbia Urbietako zelaira itzuli da asteburuan. Ohorezko B Mailaren 7. jardunaldian Gernika Rugby Taldeak 59-0 irabazi zion Valtecsa Universitario Bilbao Rugbyri, zapatuan.
Gernikarrek aurreikusten zuten bilbotarren aurkako neurketa ez zela erraza izango, haien lehen lerro indartsuari aurre egin beharko baitzioten. Hala ere, basurdeak indartsu zelairatu ziren, eta lehenengo zatian ia fase guztietan nagusi izatea lortu zuten.
Neurketa hasi eta bost bat minutura iritsi zen etxeko taldearen lehen entsegua Albertus de Bod-en eskutik. Pare bat minutu pasatuta, Gaizka Iturriagak bigarrena egin zuen. Basurdeen nagusitasuna nabaria izan zen lehen momentutik, eta horrek eragindako antsietateak zalantza une batzuk sorrarazi bazituen ere, atsedenaldira iritsi aurretik Gernikak beste hiru entsegu burutzea lortu zuen. Lehenengo zatiko hiru entsegu horiek Fagu Malloy, Albertus De Bod eta Andoni Larrabeitik egin zituzten.
31-0eko markagailuagaz ailegatu ziren atsedenaldira. Aurreko neurketaren batean izandako gabezei aurre egitea lortu zuen Gernika RTK, eta atsedenaldiaren ostean lehen zatiko nagusitasunari eutsi zion. Eduardo Maidagan entrenatzaile gernikarrak burututako aldaketek pizgarri izan ziren taldearentzat. Izan ere, aulkitik atera ziren jokalariek mailari eutsi zieten, taldeari egonkortasuna emanez. Gainera, Itai Marurik debuta zuen Urbietako berdegunean.
Neurketako azken hogei minutuetan, modu antolatuan jokatuz, Albertus De Bod, Jokin Eskolar eta Eneko Gorostizak egin zituzten entseguak.
Liderrarengandik puntu bakarrera. Bost puntu gehiago eskuratuta, sailkapen orokorrean bigarren postuari eusten dio talde gernikarrak. 34 puntu dauzka, Hernani liderrak baino puntu bat gutxiago.
Hurrengo jardunaldian Uribealdea RKE izango du parez-pare. Mungiarrak, zazpi jardunaldi igarota, sailkapen orokorrean hamargarren postuan daude, bost puntugaz.
