37 pertsonak eman dute positibo Busturialdean

Bestalde, gaur esan dutenez, Galdakao ESIko Psikiatria zerbitzuan ingresatuta dauden pazienteak Bizkaiko Osasun Mentaleko Sareak Bermeon duen unitate batera eroan dituzte, aldi baterako.

Aintzina Monasterio Maguregi

Busturialdea

2020/03/25

Miguel Sanchez Fernandez Plangintza, Antolamendu eta Ebaluazio Sanitarioko zuzendariak eman ditu koronabirusari buruzko datuak gaur, eta Osasun Sailaren datuen arabera, gaur 08:00ak arte, Busturialdeko 37 pertsonak eman dute positibo: Bermeon 19, Gernika-Lumon 11, Busturian 4 eta Elantxoben, Morgan eta Mundakan bana.

Araba, Bizkai eta Gipuzkoan 8.735 detekzio-proba egin dituzte eta horietatik 1.199 atzo, eta horietatik 543 pertsonak eman zuten positibo. 3.271 dira COVID-19an positibo emandakoak eta horietatik 1.150 herritar daude ospitaleetan. Gaur gaurkoz, 155 hildako zenbatu dituzte eta ospitaleko altak 407 dira eta osatutako pertsonak 59.

Gaurko agerraldian, COVID19ari aurre egiteko Osasun Saila eta Osakidetza hartzen ari diren ezohiko neurrien artean hartutako azken erabakiak jakitera eman ditu Sanchezek. Barrualde Galdakao ESIko Psikiatria zerbitzuan ingresatuta dauden pazienteak Bizkaiko Osasun Mentaleko Sareak Bermeon duen unitate batera eraman dituzte, aldi baterako. Horrez gain, Psikiatriako Larrialdien arreta Basurtu Unibertsitate Ospitalean eskeiniko dute gaurtik.

Osasun langileen plantillak indartzeko zereginean, Osakidetzak 161 mediku kontratatuko dituela zehaztu du Sanchezek. Horietako hamabi lanean Araban ari dira jada, eta besteak datozen egunetan hasiko direla azaldu du. Osakidetzak azken BAME Barne Mediku Egoiliarren frogan gutxieneko nota gainditu zuten ikasleak dira kontratatuko dituztenak. Era berean, erizain gehiago kontratatzeko asmoa ere badaukatela adierazi du.

Bermeoko urgentzietan ordutegi aldaketa. Bestalde, Bermeoko anbulategiak urgentzietako ordutegi berria dauka. Astelehenetik barikura, 08:00etatik 20:00etara emango dute zerbitzua. Gainontzeko egun eta orduetan, beraz, herritarrek Gernikako Ospitaleko urgentzietara joan beharko dute.

Datu eguneratuak:

BIZKAIAN 1501 lagun daude kutsatuta, eta horietatik 674 ospitalizatuta.
GIPUZKOAN 563 positibo daude, eta horietatik 166 ospitalizatuta daude.
ARABAN, 1207 kasu zenbatu dira, eta horietatik 310 ospitalizatuta daude.

datuak