Bittor Asteinza (EH Bildu): "Bermeon kalitatezko enplegu egonkorra eskainiko duten proiektuak babestu nahi ditugu"
Bermeoko EH Bilduk hautagaien eta programaren aurkezpen ekitaldia egin du gaur arratsaldean. Sei multzotan banatutako programa osatu dute.
Ainhoa Astui zerrendakideak sortu eta dantzatutako dantzagaz hasi du udal hauteskendeen kanpaina Bermeoko EH Bilduk. Hala, Lameran batu dira gaur arratsaldean udal hauteskundeetako hautagaien eta programaren aurkezpen ekitaldia egiteko.
Bertan, Idurre Bideguren Bermeoko alkateak, Iratxe Arriola Eako alkate eta Busturia-Uribe barrutiko zerrendaburuak eta Bittor Asteinza Bermeoko EH Bilduren alkategaiak hartu dute hitza.
Bidegurenen berbetan, koalizioak eratu duen taldea Bermeogatik “edozer emateko prest” dago. Maiatzaren 26an “jokoan asko” dagoela esan du alkateak. Herriak “zer nolako Europa” eta “zer nolako Bizkaia” nahi duen erabakiko duela aldarrikatu du.
Bizkaiko Foru Aldundiaren “ardatza eta ardurak Bilbo eta Bilbo Handia” direla salatu du alkateak, eta inguruko herriak “ahaztuta” dituela. Horri bira emateko unea iritsi dela uste du Bidegurenek, eta hori lortzeko beste apustu bat egitea beharrezkoa ikusten du. “EAJren apustua eta marka Bilbao Bizkaia da, eta guk hortik urrundu nahi dugu“.
Bermeoko zaharren egoitzako egoera gogora ekarri du, eta hori “aldundiaren eskuetan dagoen zerbitzua” dela adierazi du. Bermeotarrek urtero egoitzarengatik “milioi bat euro” ordaintzen dutela salatu du Bidegurenek, “aldundiak ez dituelako bere ardurak bere gain hartzen”.
Idurre Bideguren Bermeoko alkatea.
Arriolak beste hainbeste esan du: “Bizkaia orekatu bat defendatzen dugu“. Aktibitateak eta zerbitzuak “bertatik bertarakoak” izan behar direla aldarrikatu, eta eskualde kohesionatu baten alde egin du. “Pertsona guztientzako eskubideak” bermatzen dituen Bizkaia bat defendatu, eta aurrera egiteko bide luzea geratzen dela esan arren, “ontzi hori martxan” doala adierazi du.
Bittor Asteinza alkategaiak “itxaropena, positibismoa eta ilusioa” taldean nagusi direla aldarrikatu du. Bermeo hobe bat egitea posiblea dela dio Asteinzak, eta horren alde egiteko azken 8 urteetan EH Bilduk aurre egin beharreko “marroiak” aipatu ditu, “EAJk utzitako marroiak”. Ezbeharrak eta une txarrak ere gogoan izan ditu alkategaiak: suteak, esaterako. Egindako lanagaz, udalak ezbehar horiek “marroitik berdera aldatu” dituela aldarrikatu du.
Sei ardatz. Programari dagokionez, herritarrekin batera egindako parte hartze prozesu baten bidez 252 ekarpen jaso dituztela nabarmendu du Asteinzak. Ekarpen horiekin 100 proposameneko”programa berdea landu” dute.
Hori sei multzotan banatuta dago. Lehenik eta behin Bermeo sozioekonomikoki indartzeko proposamenak landu dituzte. Horretarako Bermeo Tuna World Capital ekimena indartzeko asmoa dutela iragarri du Asteinzak. Hala eginez “munduko beste hiri batzuekin harremanak landu” eta Bermeon “lanpostuak sortzeko aukera” eskaini gura dute. “Kontserba industriekin, atunontziekin eta kofradiagaz”, besteak beste, “elkarlana eta ekonomioa zirkularra” lantzen jarraitu nahi dute.
Nautika eskola ere gogora ekarri du, hori indartzeko nahia azalduz, baita herriko itsas ondarea ere: “Aita Guria eta Ortube balioan ipintzen jarraituko dugu”. Horiek ardatz hartuta “kalitatezko enplegu egonkorra” eskainiko dituzten “proiektuak babestu” gura dituzte.
Bigarren multzoan Bermeo natural baten alde egiteko proposamenak batu dituzte. Udalerriak “izugarrizko gune naturalak” dituela aldarrikatu, eta horiekin lanean jarduteko eta” herria eko-eraldatzeko” landu duten Bermeo Naturia proiektua aipatu du. “Auzoak balioan ipintzeko” ibilbide paisai-kulturalak egingo dituzte.
Gaztelugatxe Bermeoko “ikur” moduan izendatu, eta beragaz ere lanean jarraitzeko asmoa agertu du Asteinzak, herritik bertaraino helduko den oinezkoentzako bidea eginez. Tonpoiaren inguruko proposamenak ere plazaratu ditu alkategaiak: “aisialdirako gune natural moduan berreskuratu” gura dute, eta Aritzatxu hondartzagaz lotzen duen oinezkoentzako ibilbide bat eraiki.
Bermeo biziberritu. Proposamenen hirugarren multzoan Alde Zaharra nabarmendu du EH Bilduk. Hori biziberritzeko orube hutsak berreskuratzen jarraituko dutela adierazi du, horietan herritarrentzako “ekimen erakargarriak bultzatzeko”. Goiko Plaza edertu, eta bertako edukiontziak lurperatu egingo dituztela azaldu du. Bukatzeko, gazteak Alde Zaharrera erakartzeko alokailurako diru laguntzak eskaini nahi dituzte, eta lokal hutsetan negozio berriak sustatu.
Berdintasuna da beste multzo baten ardatza. “Emakumezkoen ahalduntzea” landuko dutela adierazi du Asteinzak, udalerriko emakumeen elkarteekin batera lan eginez. Berdintasunerako kontseilua indartu, ikastetxeekin batera heziketa programa landu, eta berdintasunerako udal teknikarien lanpostuak egonkortuko dituzte. Emakumeen aurkako indarkeriari aurre egiteko ekimenak martxan jarri, eta Berualaren eraikinean andrazkoen etxea sortzeko asmoa adierazi du.
Bermeoko konexioak hobetzeko beharra ere azpimarratu dute beste multzo batekin. Hori lortzeko Sollubeko tunelak egitea lortzeko lan egingo dutela dio alkategaiak, baita herriko garraio publikoa hobetzekoa ere. Herri barneko mugikortasuna eta irisgarritasuna beste ardatzetako bat da koalizioarentzat. Hala, Zarragoitxin, Iparragarrien eta Itsas Begin irisgarritasunerako lanak egin, eta azkenengoan igogailua ezarri nahi dute. Aldi berean 75 aparkaleku gehitu nahi dituzte. Lameran eta Portuzarrean oinezkoei lehentasuna eman nahi diete, eta Bizkaiko Jaurerria Alde Zaharragaz lotu nahi dute.
Azken multzoa bizitza aktiboari zuzenduta dago. Hala, adin guztietako pertsonen bizi kalitatea hobetzeko lan egingo dutela dio Asteinzak. Horretarako Araneko kiroldegia handitu eta kalitatezko kirol eskaintzagaz jarraitu nahi dute. Adinekoen kasuan, jarduera fisikorako tresnak jarri nahi dituzte udalerrian, eta Herri Lagunkoia programa bultzatzen jarraitu.
Bermeo errespetuzko herria, euskalduna eta balio natural eta kultural handikoa izateko lanean jarraituko dutela aldarrikatuz bukatu du EH Bilduren alkategiak.
