Emakumezko pilotari profesionalak batuko ditu aurtengo esku pilota txapelketak
Ajangizko VII. Esku Pilota Txapelketa jokatuko dute datozen hiru domeketan. Emakumezkoen txapelketa partidu bakarrera erabakiko da.
Berrikuntzagaz dator aurten Ajangizko Esku Pilota Txapelketa. Datozen hiru domeketan lehiatuko dute, eta maiatzaren 19an, gizonezkoen finalekin batera, emakumezkoena ere jokatuko dute. Hain zuzen, aurten partidu bakarrera erabakiko da emakumezkoen txapela. Arrizabalaga gernikarrak Espinarregaz osatuko du bikotea, eta Alday eta Etxaniz izango dituzte aurkari.
Beste urte batez inguruko pilotariak elkartuko dira Ajangizen. Gernikarrak, bermeotarrak, munitibartarrak, aulestiarrak… oro har, Busturialdeko eta Lea-Artibaiko gaztetxoek parte hartuko dute: “Horien parte hartzea bermatzen dugu, bertoko harrobia zaintzea da ardatzetako bat”, adierazi dute Gantzabale Elkartearen arduradunek. Hala, Arkupe Pilota Taldeko eta Lea Ibarra Motrollo Pilota Elkarteko kideez gain, Bermeoko eta Zornotzako taldeetako ordezkari bana ere egongo da.
Era berean, lehen mailako afizionatuetan Uriondo gizaburuagarra ariko da Alberdi IIena gipuzkoarragaz bikotea osatuta. Domeka honetan jokatuko dute Apezetxea gipuzkoarraren eta Lerena errioxarraren kontra. Hain zuzen, bizkaitar, gipuzkoar eta nafarrekin batera, errioxar pilotari bik ere parte hartuko dute oraingo honetan.
“Egonkortzen”. Zazpigarren urtez antolatu dute txapelketa, eta egonkortzen eta sendotzen asmatu dute. Beheko mailetako zein afizionatuetako txapelketak gero eta gutxiago direla azaldu dute herriko elkarteko kideek, eta txapelketaren sorreratik, euren apustua horiei aukerak ematea izan dela gogora ekarri dute: “Zazpigarren urtea da, eta gure asmoa da horretan aurrera egitea. Zoritxarrez gero eta txapelketa gutxiago daude maila horietan, eta harrobia zaintzen ez baduzu, aukerak ematen ez badizkiozu, ez dago profesionalik”. Horregatik, eskaintza hori txapelketa honen bitartez zelanbait “egonkortzea” da euren asmoa.
Azaldu dutenez, esku pelota bera “tresna moduan” erabiltzeko urratsak ematen ari dira hiru arlotan. Hau da, esku pilotaren balioak hiru eremutan garatu gura dituzte. Kirol eremuan, esku pilotak dauzkan berariazko balioak mahaigaineratu nahi dituzte. Balio kultural ere bultzatu nahi dute. “Gure ondare kulturalaren parte esanguratsu bat da esku pelota, eta horri lotu nahi diogu gure herria eta herriaren nortasuna; lotura hori garatu nahi dugu”. Arlo soziala da hirugarrena. Esku pilota “inklusioarako tresna izugarria” dela azpimarratu dute, eta horretan urratsak ematen joan nahi dute: “Esku pilotak pila bat urrats egiteko kristoren dohaiak eta kristoren ahalmena dauzka. Inklusioa genero aldetik, degaitasun aldetik…”.
Benetako parte hartzerako lekua izatea aldarrikatzen dute. Bide horretan, haziak ereiten ari dira, eta emakumeen txapelketa egonkortzea dute helburu: “Geratzeko etorri da. Emakumezkoen punta-puntako partidua antolatu dugu. Datorren urtera begira, agian, partidu gehiagoko txapelketa izango da. Eta desgaitasun funtzionala dutenei lekua egitea ere gustatuko litzaiguke. Aztertuko dugu”. Txapelketa kirolaren balioez harago, beste bide batzuk jorratzeko baliatu gura dute: “Kirola aitzakia izatea gura dugu herrian nahi ditugun balioak mahaigaineratzeko edo agertzeko”.
Gantzabale Elkartearen ordezkariek datozen hiru domeketan Ajangizera hurbiltzeko gonbidapena luzatu dute, eta zazpigarren urtez txapelketa antolatzea posible egin dutenen laguntza eskertu eta azpimarratu dute: “Eskertzekoa da antolatzeko dugun laguntza. 30 babesle ditugu, eta horiei eta udalari zein aldundiari esker lortzen dugu halako txapelketa antolatzea”.
Txapelketaren egutegia:
MAIATZAK 5 (11:00)
- Umetxoak: Bengoetxea-Rocha VS. Cid-Saez
- Alebinak: Andrinua anaiak VS. Lopez-Argarate.
- Infantilak: Gorostola-Malax VS. Laka-Arroita
- Lehen mailako afizonatuak: Lerena-Apezetxea VS. Alberdi II-Uriondo
MAIATZAK 12 (11:00)
- Umetxoak: Uriarte-Goikoetxea VS. Azkunaga-Legarreta
- Alebinak: Urzelai anaiak VS. Urzaa-Arrarte.
- Infantilak: Kareaga-Perez VS. Arrizabalaga-Aranbarri
- Lehen mailako afizonatuak: Larrazabal-Elizegi VS. Salaberria-Cuairan
MAIATZAK 19 (10:00)
- Emakumezkoen finala: Alday-Etxaniz VS. Arrizabalaga-Espinar
- Gizonezkoen finalak
